ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ކުރިއަށް ގެންދިޔަ 12 އަހަރުން ދަށު ޔޫތު ލީގުގެ ޗެމްޕިއަންކަން ސްޕަރ ޔުނައިޓެޑް ސްޕޯޓްސް (ސަސް) އިން ހޯދައިފިއެވެ.
ފަރީދު މުހައްމަދު (ފަރިިއްޓެ) ގެ އިރުޝާދުގެ ދަށުން ކުޅުނު ސަސްއިން 12 އަހަރުން ދަށުގެ ޔޫތު ލީގް ކާމިޔާބު ކުރީ ކުޅުނު 12 މެޗުގެ ތެރެއިން 10 މެޗް ކާމިޔާބުކޮށް، އެއްމެޗް އެއްވަރުވެ އަދި އެއްމެޗުން ބަލިވެގެންނެވެ. 10 މެޗުގައި ޖުމްލަ 56 ލަނޑު ސަސްގެ ޔޫތު ޓީމުން ވަނީ އިދިކޮޅު ޓީމުތައް ކޮޅަށް ކާމިޔާބު ކޮށްފައެވެ. ސަސް ކޮޅަށް ވަނީ އެންމެ 5 ލަނޑެވެ.
މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާގެ މަގާމް ސަސްގެ އިލްހާމް ހޯދީ 25 ލަނޑު ޖަހައިގެންނެވެ.
އެންމެ މޮޅު ކީޕަރަކަށް ހޮވުނީ ސަސްގެ ކީޕަރު ޔަނާހްއެވެ. އަދި މުބާރާތުގެ އެންމެ މޮޅު 9 ކުޅުންތެރިންގެ ތެރޭގައި ސަސްގެ 3 ކުޅުންތެރިން ހިމެނުމަކީ ފަރިއްޓެއަށް ލިބުނު ބޮޑު އުފަލެކެވެ.
ފަރިއްޓެ ކުރީގެ މަސައްކަތް ކޮބާ؟
12 އަހަރުން ދަށުގެ ޔޫތު ލީގް ފަރިއްޓެ އިރުޝާދުގެ ދަށުން ސަސްއިން ކާމިޔާބު ކުރިޔަސް އޭނާގެ މަސައްކަތުގެ ރޭޓް ދަންނަ މީހުން އެކަމާ ހައިރާނެއް ނުވާނެއެވެ. ސަބަބަކީ މިއަހަރު އެފްއޭއެމް 14 އަހަރުން ދަށުގެ ޗެމްޕިއަންކަން ހޯދި ވެލެންސިޔާގައި ތިބި ގިނަ ކުޅުންތެރިންނަކީވެސް ގާތްގަނޑަކަށް 7 އަހަރު ވަންދެން ފަރިއްޓެގެ އިރުޝާދުގެ ދަށުން ތަމްރީން ކުރި ކުޅުންތެރިންނަށް ވުމެވެ.
14 އަހަރުން ދަށުގެ ޔޫތު މުބާރާތުން އެންމެ ބޮޑަށް ވިދާލި ވެލެންސިޔާ ޓީމުގައި ހިމެނޭ ފޯވާޑް މުހައްމަދު އިލާން އާއި އީތަން ޒަކީ ނިއުގެ އެކަޑަމީއާ ގުޅުނުއިރު އެންމެ 4 އަހަރެވެ. އޭގެފަހުން ޓީސީ އެކަޑަމީގައި ގިނަ ދުވަސްތަކެއް ވަންދެން އިލާން އާއި އީތަން އަދި މިހާރު ވެލެންސިޔާގެ 14 އަހަރުން ދަށުގެ ޓީމުގައި ހިމެނޭ ގިނަ ކުޅުންތެރިންތަކެއް ތަމްރީން ކުރީ ފަރިއްޓެއެވެ.
"ވެލެންސިޔާއިން 14 އަހަރުން ދަަށުގެ ޗެމްޕިއަންކަން ހޯދި ޓީމުގައި ގިނައިން އެތިބީ އަޅުގަނޑުމެން މެދުނުކެނޑި 7 އަހަރު ވަންދެން ގެންގުޅުނު ކުދިން. ނިއުއަށް އެކުދިން ފުރަތަމަ އައިރު ވާނީ 4 ވަރަކަށް އަހަރު. އަސްލު ޕްލޭނަކީ އޭރުގެ ނިއުގެ ޗެއާމަން ބަލަކް (އަލީ ވަހީދު) ގެންގުޅުއްވި ޕްލޭނެއް. ބަލަކް ބޭނުން ވެލެއްވީ ނިއުއިން ވަރުގަދަ ޔޫތު ޓީމުން ބިނާ ކުރަން. އެކަމަކު ބަލަކް ނިއުގެ ޗެއާމަންކަން ދޫކޮށްލެވި ހިސާބުން އަޅުގަނޑުމެންނަށް (އޭރު ނިއުގެ އެކަޑަމީ ކޯޗުންނަށް) ފާޑަކަށް މަޖުބޫރުވީ އެހެން ކްލަބެއްގެ އެހީގައި މިޓީމު (މިހާރު ވެލެންސިޔާގައި އޮތް 14 އަހަރުން ދަށުގެ ޓީމު) ކުރިއަށް ގެންދެވޭނެ ގޮތެއް ހޯދަން. ދެން އަޅުގަނޑުމެންނަށް މިކަމުގައި އެހީވީ ޓީސީ ސްޕޯޓްސް ކްލަބުން. ޓީސީގެ އެކަޑަމީގައި ގާތްގަނޑަކަށް 6 އަހަރު މިކުދިން އަޅުގަނޑުމެން ގެންގުޅުނިން. ދެން ހިނގައިދިޔަ ކަމެއް ހިނގައި ގޮސް އެޓީމު އަޅުގަނޑުމެން އަތުން ދޫވީ. އަޅުގަނޑު މިހާރުވެސް ޖެހިލުންވޭ މިހާރު އަޅުގަނޑުމެންގެ އަތުގައި މިއޮތް 12 އަހަރުންދަށުގެ ޓީމު، އަޅުގަނޑުމެން އަތުން ދޫވެދާނެތީ. މިއީ އެކަޑަމީގައި މަސައްކަތް ކުރާ ހުރިހާ ކޯޗުންގެ ވަރަށް ބުރަ މަސައްކަތް" ހަތް އަހަރު ވަންދެން ގެންގުޅުނު ޓީމުގެ ހަނދާންތައް އާކުރަމުން ފަރިއްޓެ ބުންޏެވެ.
ފަރިއްޓެ އަމާޒު ކުރިއަށް އޮތް 5 އަހަރަށް!
"މިހާރު އަޅުގަނޑުގެ އަމާޒަކީ ދެ އަހަރު ފަހުން، މިޓީމާ (12 އަހަރުން ދަށުގެ ޓީމު) އެކު 14 އަހަރުން ދަށުގެ ޔޫތު ލީގުގެ ޗެމްޕިއަންކަން ހޯދުން. މިކާމިޔާބަކީ ފެށުމެއްކަމަށް ބަލަމާ. ކުރިއަށް އޮތް 5 އަހަރު އަޅުގަނޑުމެން މަސައްކަތް ކުރާނީ މިޓީމު އަދި ދެން ހުރި އުމުރު ފުރާތަކުގެ ޓީމުތައްވެސް އެހެން ލެވެލްއަކަށް ގެންދަން. ހަގީގަތުގައި ސަސް ތަފާތުވާނެ ސަބަބަކީވެސް މިއީ. އަޅުގަނޑުމެންނަކަށް ނުތިބެވޭނެ ތިބި ހިސާބުގައި ހިތްހަމަ ޖައްސާލައިގެނެއް" ފަރިއްޓެ ބުންޏެވެ.
ފަރިއްޓެ ބުނަނީ ސަސްގެ އެކަޑަމީއިން ރަނގަޅު ކުޅުންތެރިންތަކެއް ތަމްރީންކުރުމަށް އޭނާއަށް އޮތް އެންމެ ބޮޑު ހިތްވަރަކީ ކްލަބުގެ ވެރިން ކަމަށެވެ. "ހަގީގަތުގައި ވަރަށް ބޮޑު ޒިއްމާއެއް އަޅުގަނޑުގެ ކޮނޑުގައި އެޅިފައި އޮތް ކަމަށް ގަބޫލް ކޮށްގެން މަސައްކަތް މިކުރަނީ. ސަސްގެ އިސްވެރިންގެ ހާއްސަކޮށް ދަގަނޑޭ (އަލީ އަޝްފާޤް) އަޅުގަނޑަށް މިކަމުގައި އަޅުގަނޑަށް ދެއްވާ ހިތްވަރަކީ މިކަމުގައި ކުރިއަށް ދިޔުމަށް އަޅުގަނޑަށް ލިބޭ އެންމެ ބޮޑު ހިތްވަރު" ފަރިއްޓެ ބުންޏެވެ.
