ސްކޮޓްލޭންޑްގެ ލޮކަރބީގެ މަތިން 1988 ވަނަ އަހަރު ގޮއްވާލި ޕެން އެމެރިކަން އެއަރލައިންގެ ފްލައިޓް 103 ގައި ހަރުކުރި ބޮން އުފެއްދި ކަމަށް ޝައްކު ކުރެވޭ ލީބިޔާގެ ޖާސޫސީ އިދާރާގެ އެޖެންޓުގެ މައްޗަށް ދައުވާ ކުރުމަށް މިއަދު އެމެރިކާގެ ވޮޝިންޓަންގެ ފެޑެރަލް ކޯޓަކަށް ހާޒިރުކޮށްފި އެވެ.
ލަންޑަނުން ނިއުޔޯކް ސިޓީއަށް ދަތުރުކުރި ބޮއިންގް 747 މަތިންދާބޯޓުގައި ބޮމެއް ގޮއްވާލުމުން އެ ބޯޓުގައި ތިބި 259 މީހުންނާއި އަދި ބޯޓު ވެއްޓުނު އިރު ބިމުގައި ތިބި 11 މީހުން މަރުވިތާ މިހާރު ގާތްގަނޑަކަށް 34 އަހަރު ވެއްޖެއެވެ.
ލީބިޔާގެ އަބޫ އަގީލާ މުހައްމަދު މަސްއޫދު ޚައިރު އަލްމަރީމީ އަށް އެމެރިކާގެ ކޯޓެއްގައި އަދި ކިރިޔާ ޝަރީއަތް ފެށުނީއެވެ.
ފެހިކުލައިގެ ޖަމްޕްސޫޓެއް ލައިގެން ހުރި އުމުރުން 71 އަހަރުގެ މަސްއޫދު ކޯޓަށް ހާޒިރު ކުރި އިރު އަރިދަފުސް ޖެހިފައިވާ ކަމަށް ބެލެވެއެވެ.
"އަޅުގަނޑުގެ ވަކީލު ފެނުމުގެ ކުރިން ވާހަކައެއް ނުދެއްކޭނެ،" ތަރުޖަމާނަކު މެދުވެރިކޮށް ވާހަކަ ދައްކަމުން އެމެރިކާގެ މެޖިސްޓްރޭޓް ގާޒީ ރޮބިން މެރިވެޑާ ކުރިމަތީގައި އޭނާ ބުންޏެވެ.
އެމެރިކާގެ ޖަސްޓިސް ޑިޕާޓްމަންޓުން ބުނި ގޮތުގައި މަސްއޫދު ވަނީ މީގެ ކުރިން 2012 ވަނަ އަހަރުގެ ސެޕްޓެމްބަރު މަހު ލީބިޔާގެ ގާނޫނު ތަންފީޒުކުރާ ފަރާތްތަކުގެ ކުރިމަތީގައި އޭނާގެ ކުށްތަކަށް އިއުތިރާފުވެފަ އެވެ. އަދި އޭނާ ލީބިޔާއިން ހައްޔަރުކޮށްފައިވަނީ މީގެ ދުވަސްކޮޅެއް ކުރިންނެވެ.
