ޓުއިޓާ ގަތުމަށްފަހު އިލޯން މަސްކު ދނީ މަޝްހޫރުކަން ހޯދުމަށް ތަފާތު މައުޟޫއުތަކަށް ވާހަކަ ދައްކަމުންނެވެ. އެމެރިކާގެ ކޮވިޑް19އާ ދެކޅަށް ކުރާ މަސައްކަތުގެ އިސްލަފާދާރު އެންތޮނީ ފައުޗީއާ ދެކޮޅަށް މަސްކު ނިކުތުމުން އެމެރިކާގެ ގާނޫނު ހަދާ މަޖިލީހުގެ މެންބަރުން ވަނީ މަސްކު ލަދު ގަންނަވާލާފައެވެ.
ފައުޗީއަކީ އެމެރިކާގެ ނޭޝަނަލް އިންސްޓިޓިއުޓް އޮފް އިންފެކްޝަސް ޑިޒީޒްސްގެ ޑިރެކްޓަރެވެ.
ކޯވިޑް19އާ ގުޅުވައިގެން ފައުޗީގެ މައްޗަށް ދައުވާ ކުރުމަށް މަސްކް ގޮވާލުމުން އެމެރިކާގެ ސެނެޓަރު އެމީ ކްލޮބޫޗާ ވިދާޅުވީ ކޮވިޑް ވެކްސިންއާ ދެކޮޅު މީހުންނާ ގުޅިގެން ވާހަކަ ދެއްކުމަކީ ސްމާޓް ވިޔަފާރީގެ ސްޓްރެޓެޖީއެއް ކަމުގައި ނުފެންނަ ކަމަށެވެ. އަދި ސަމާލުކަން ހޯދުމަށް ކުރާ މަސައްކަތުގައި ފައުޗީއަށް ހަމަލާ ދިނުމަކީ ބުއްދިވެރި ކަމެއް ތޯވެސް އޭނާ ސުއާލު ކުރެއްވިއެވެ.
އަނެއްކޮޅުން ހައުސް އޮފް ރެޕްރެޒެންޓެޓިވްސްގެ މެމްބަރު ރިޗީ ޓޮރޭސް ވިދާޅުވީ މަސްކު އެންތޮނީ ފައުޗީގެ މައްޗަށް ތުހުމަތު ކުރަނީ އޭނާއާ ޚިޔާލުތަފާތުވާތީ ކަމަށެވެ. އަދި މަސްކަކީ ޚިޔާލު ފާޅުކުރުމުގެ މިނިވަންކަމަށް ވަކާލާތުކުރާ މީހެއް ނޫންކަމަށެވެ.
ހައުސް އޮފް ރެޕްރެޒެންޓެޓިވްސްގެ މެމްބަރ ޑީން ފިލިޕްސް ވިދާޅުވީ ދިރި ހުރި އެއްވެސް މީހަކަށް ވުރެން ގިނައިން ފައުޗީ ވާނީ އިންސާނުންގެ ފުރާނަ ސަލާމަތްކޮށްދީފަ ކަމަށެވެ.
ސީއައިއޭގެ ކުރީގެ ޑިރެކްޓަރު ޖޯން ބްރެނާން ކުރެއްވި ޓްވީޓެއްގައި ވިދާޅުވީ ފައުޗީ އަކީ އާންމު ސިއްހަތަށް ކޮށްދެއްވި އެތައް ޚިދުމަތެއްގެ ސަބަބުން ކުރިއަށް އޮތް ޖީލުތަކުގައި އޭނާގެ ހަނދާން ދެމި ހުންނާނެ ގައުމީ ބަޠަލެއް ކަމަށެވެ.
ކޮރޯނާއާ ދެކޮޅަށް މަސައްކަތް ކުރައްވާ ވައިޓް ހައުސްގެ އެޑްވައިޒަރު ފައުޗީ މަގާމު ދޫކުރައްވާނީ ޑިސެމްބަރު މަހު އެވެ.
