އަފްޣާނިސްތާނުގައި ތިބި ޗައިނާ ރައްޔިތުން "ވީހާވެސް އަވަހަކަށް" އެގައުމުން ފުރައިގެން ދިއުމަށް ޗައިނާއިން ނަސޭހަތްތެރިވެއްޖެއެވެ. އައިސްއެސްގެ ހަނގުރާމަވެރިން ވަނީ ކާބުލްގައި ހުންނަ ޗައިނާ މީހުން ހިންގާ ހޮޓަލަކަށް ހަމަލަ ދީފައެވެ. އައިއެސްއިން ވަނީ ޗައިނާ ހޮޓަލަށް ދިން ހަމަލާގެ ޒިންމާ ނަގާފައެވެ. އެހަމަލާގައި ހޮޓަލުގެ ގެސްޓުންގެ ތެރެއިން ދެ މީހަކަށް އަނިޔާވެފައި ވަނީ ކުޑަދޮރަކުން ބޭރަށް ފުންމާލައިގެން ފިލަން އުޅުމުގެ ތެރޭގައެވެ.
ޗައިނާއިން ޗައިނާ މީހުން ބޭރުވެގެން ދިއުމަށް ގޮވާލުމަކީ، އަފްޣާނިސްތާނުގެ އިގްތިސާދު ހީނަރުވުން ހުއްޓުވުމުގެ އުންމީދުގައި ބޭރުގެ އިންވެސްޓްމަންޓްތައް ހޯދުމަށް ތާލިބާނުން ކުރާ މަސައްކަތަށް ލިބުނު ނާކާމިޔާބީއެއް ކަމުގައި ބެލެވެއެވެ.
ކާބުލްގެ މެދުތެރޭގައި އޮންނަ ޝާރިއޭ ނައު ސަރަހައްދުގައި ހުންނަ 10 ބުރީގެ އިމާރާތަށް ދީފައިވާ ހަމަލާގައި ބޯކޮށް ދުންތައް އަރާ މަންޒަރު މީސްމީޑިއާގައި ހިއްސާކޮށްފައިވާ ފޮޓޯތަކުން ފެނެއެވެ. އާންމުން ބުނިގޮތުގައި ބަޑިންހަމަލަ ދިނުމުގެ އިތުރުން ގޮއްވުންތަކެއްވެސް ގޮއްވާލާފައި ވެއެވެ.
ކާބުލް ފުލުހުންގެ ތަރުޖަމާނު ޚާލިދު ޒަދްރާން ވިދާޅުވީ އެ ހަމަލާ އެތައް ގަޑިއިރެއް ވަންދެން ދެމިގެން ދިޔަ ކަމަށެވެ.
