ޗައިނާއަށް އެމެރިކާގެ މީހުންގެ މައުލޫމާތު ލިބޭނެ ޖާސޫސީ ވަސީލަތަކީ ޓިކްޓޮކް ކަމަށް ބުނަމުން ޖޯޖިއާ ސްޓޭޓުން ޓިކްޓޮކް މަނާ ކޮށްފިއެވެ.
ޖޯޖިއާގެ ގަވަރުނަރު ބްރައިއަން ކެމްޕް ނެރުނު އަމުރަކީ، ގައުމީ ސަލާމަތާ ބެހޭ ކަންބޮޑުވުންތަކާ ގުޅިގެން އެ ސްޓޭޓް ސަރުކާރުން ދޫކުރާ ހުރިހާ ފޯނާއި ކޮމްޕިއުޓަރުތަކުގައި ވީޑިއޯ ހިއްސާކުރާ ސޯޝަލް މީޑިއާ ޕްލެޓްފޯމް ޓިކްޓޮކް މަނާކުރުމުގެ އަމުރެކެވެ.
ގަވަރުނަރުގެ އަމުރުގައި ބުނެފައި ވަނީ އެ އަމުރަށް ވަގުތުން އަމަލުކުރަން ޖެހޭނެ ކަމަށާއި އެގްޒެކެޓިވް ބްރާންޗްގެ ކޮންމެ އެޖެންސީއަކާއި ޑިޕާޓްމަންޓެއް، ޑިވިޝަނެއް، ބިއުރޯއެއް، ބޯޑެއް، އޮތޯރިޓީއެއް، އަދި ކޮމިޝަނެއް ކަމުގައިވިއަސް ސަރުކާރުން ދޫކުރާ ހުރިހާ ސިސްޓަމްތަކާއި ޑިވައިސްތަކާއި ލެޕްޓޮޕާއި ފޯނުގައި ޓިކްޓޮކް، ވީޗެޓް، އަދި ޓެލެގްރާމް ބޭނުންކުރުމަކީ މަނާ ކަމެއް ކަމަށެވެ.
މި ގޮތަށް ނިންމުމުގެ އެއް ދުވަސްކުރިން އެމެރިކާގެ ސެނެޓުން ފާސްކޮށްފައި ވަނީ އެމެރިކާގެ އެއްވެސް ފެޑެރަލް ޑިވައިސްއެއްގައި ޓިކްޓޮކް ބޭނުން ކުރުމަކީ ނުވަތަ ޑައުންލޯޑްކުރުމަކީ މަނާ ކަމެއް ކަމަށެވެ.
ޖޯޖިއާގެ ގަވަރުނަރު ވިދާޅުވީ އޭނާގެ މި ނިންމުމަކީ ޗައިނާގެ ޖާސޫސީ ފަރާތްތަކަށް ސޯޝަލް މީޑިއާ އެޕް ޓިކްޓޮކް މެދުވެރިކޮށް އެމެރިކާގެ ޔޫޒަރުންގެ ޑޭޓާ ލިބިދާނެ ކަމުގެ ކަންބޮޑުވުންތަކެއް ހުރުމުން ނިންމާފައިވާ ނިންމުމެއް ކަމަށެވެ.
ޖޯޖިއާގެ އިތުރުން އެމެރިކާގެ އެހެން ސްޓޭޓްތައް ކަމަށްވާ ނިއު ހެމްޝަޔަރ، އެލަބާމާ، ޓެކްސަސް، އަދި ނޯތު ޑެކޮޓާ އިން ވެސް ވަނީ ސްޓޭޓް ސަރުކާރުން ދޫކުރާ ޑިވައިސްތަކުގައި ޓިކްޓޮކް ބޭނުންކުރުން މަނާކޮށްފަ އެވެ.
