އިންޑިއާއިން އަމިއްލައަށް އުފައްދާފައިވާ ގައިޑްޑް މިސައިލް ޑިސްޓްރޯޔަރ 'އައިއެންއެސް މޯރްމުގާއޯ' އިންޑިއާ ސިފައިންގެ ޚިދުމަތުގައި ބޭނުން ކުރަން ފަށައިފިއެވެ.
އިންޑިއާ ކަނޑުގެ ސަރަހައްދުގައި ޗައިނާގެ ކަނޑުގެ ގާބިލްކަން އިތުރުވަމުންދާ ދަނޑިވަޅެއްގައި ތައާރަފް ކޮށްފައިވާ މިމަނަވަރުގައި ގިނަ އަދަދެއްގެ ތަޖުރިބާކާރު ސެންސަރުތަކާއި ޒަމާނީ ރާޑަރާއި ހަތިޔާރުގެ ނިޒާމުތައް ހިމަނާފައި ވެއެވެ. އަދި އެއީ ކަނޑުގެ ސަތަހައިންނާއި ޖައްވުން މިސައިލް ފޮނުވާ ލުމުގެ ގާބިލުކަން ލިބިފައިވާ މަނަވަރެސްވެސް މެއެވެ.
7،400 ޓަނުގެ މި މަނަވަރަކީ މި ފަހުން އިންޑިއާއިން އުފެއްދި އެންމެ ޒަމާނީ ޑެސްޓްރޯޔާ މަނަވަރެވެ.
ގޯއާގެ ތާރީހީ ބަނދަރު ސިޓީ މޮރްމޫގާއޯގެ ނަމުން ނަން ދީފައިވާ މި ބޯޓު ބާލާފައި ވަނީ މިދިޔަ އަހަރުގެ ޑިސެމްބަރު މަހުގެ 19 ވަނަ ދުވަހު ގޯއާ ގައޮ ޕޯޗުގީޒުންގެ ވެރިކަން ނިމުނުތާ 60 އަހަރު ފުރުން ފާހަގަކުރި ދުވަހު އެވެ.
އައިއެންއެސް މޮރްމުގާއޯ އަކީ އިންޑިއާގެ ކަނޑުގެ ސިފައިންގެ މަނަވަރުތައް ޑިޒައިން ކުރާ އިދާރާއިން އަމިއްލައަށް ޑިޒައިންކޮށްފައިވާ އަދި ގޯއާގެ ޝިޕްބިލްޑާސް ލިމިޓެޑުން އުފައްދާފައިވާ މަނަވަރެކެވެ. މިއީ އިންޑިއާއިން ގެންގުޅޭ 'ވިޝާކަޕަޓްނަމް' ކްލާހުގެ ހަތަރު ޑިސްޓްރޯޔަރުގެ ތެރެއިން ދެވަނަ މަނަވަރެވެ.
މި މަނަވަރުގެ ސްޕީޑް 30 ނޯޓިކަލް މޭލަށް ވުރެން ބާރެވެ.
އިންޑިއާގެ ކަނޑުގެ ސިފައިން ބުނިގޮތުގައި މިއީ ނިއުކްލިއާ، ބަޔޮލޮޖިކަލް އަދި ކެމިކަލް ހަނގުރާމައިގެ ހާލަތުގައި ހަނގުރާމަ ކުރުމުގެ ކުޅަދާނަކަން ލިބިފައިވާ ބޯޓެއް ކަމަށެވެ.
މި މަނަވަރުގައި ސަބްމެރިން އާ ދެކޮޅަށް ހަމަލަ ދިނުމުގެ ކުޅަދާނަކަން ފޯރުވައި ދެނީ އިންޑިއާގެ އަމިއްލަ އުފެއްދުމެއްކަމަށްވާ ރޮކެޓް ލޯންޗާތަކާއި ޓޯޕީޑޯ ލޯންޗާތަކާއި ހެލިކޮޕްޓަރުތަކުންނެވެ.
