މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ މަތި އުތުރު ދާއިރާގެ ރައީސްކަމަށް ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން އިންތިޚާބުވެވަޑައިގަންނަވައިފިއެވެ.
އެދާއިރާގެ ރައީސްކަން އަކްރާމް ކާމިޔާބު ކުރެއްވީ ހެލްތު މިނިސްޓްރީގެ ސްޓޭޓް މިނިސްޓަރު އަހްމަދު އާދިލް އާއި ހެރިޓޭޖް މިނިސްޓްރީގެ ސީނިއާ ޕޮލިސީ ޑިރެކްޓަރު އަހްމަދު ހާޝިމްއާ ވާދަކޮށްގެންނެވެ.
އަކްރަމް އިންތިހާބު ކާމިޔާބު ކުރައްވާފައި ވަނީ 71 އިންސައްތަ ވޯޓާއި އެކުގައެވެ. ވޯޓު ލިބުނު ގޮތުގެ ތަފްސީލަށް ބަލާއިރު މާލެއިން 391 ވޯޓު އަދި ރަށްތަކުގައި ބެހެއްޓި ވޯޓުފޮށިތަކުން 2597 ވޯޓު އަކްރަމް އަށް ލިބިވަޑައިގަތެވެ. އެއީ ޖުމުލަ 2،988 ވޯޓެވެ.
އަކުރަމްއާ އެންމެ ކައިރިން ވާދަކުރެއްވި ކުރެއްވި އާދިލަށް ލިބިވަޑައިގަތީ 804 ވޯޓެވެ. އަދި ހާޝިމަށް ލިބިލެއްވީ 262 ވޯޓެވެ
އެންމެ އުތުރުގެ ތިން އަތޮޅުކަމަށްވާ ހއ. ހދ. އަދި ށ. އަތޮޅުގެ ސާޅީސް ރަށެއްގައި މި އިންތިޚާބުގެ ވޯޓުލުން ކުރިއަށް ދިއައެވެ. މަތި އުތުރު ދާއިރާގެ އިންތިޚާބު ބާއްވާފައި ވަނީ ކުރިން އެ މަގާމުގައި ހުންނެވި އިބްރާހިމް ވަހީދު (އިބުރޭ) އެމްޑީޕީގެ ޑެޕިއުޓީ ޗެއާޕާސަންގެ މަގާމަށް އިންތިޚާބުވުމާއި ގުޅިގެންނެވެ
