ފްރާންސްގެ ރައީސް އެމެނުއަލް މެކްރޮންއާއެކު ފްލައިޓުގައި ދަތުރުކޮށް އެމަނިކުފާނުގެ އަރިހުގައި، ފްރާންސާއި އާޖެންޓީނާ މާދަމާ ރޭ ބައްދަލު ކުރާ ވަރލްޑް ކަޕުގެ ފައިނަލް މެޗް ބަލަން ލިބުނު ދައުވަތަށް ފްރާންސްގެ ތަޖުރިބާކާރު ފޯވާޑް ކަރީމް ބެންޒެމާ ފުރަގަސްދީފި ކަމަށް "އީއެސްޕީއެން" އިން ބުނެފިއެވެ.
ރައީސް މެކްރޮން ދަތުރު ކުރައްވާ ފްލައިޓުގައި ގަތަރަށް ދަތުރު ކުރުމުގެ ފުރުސަތު، އަނިޔާގެ ސަބަބުން ފްރާންސް ސްކޮޑުން ބާކީ ކުރަން ޖެހުނު ހުރިހާ ކުޅުންތެރިންނަށް ދިނެވެ. މީގެ އިތުރުން ފްރާންސް ގައުމީ ޓީމުގެ ކުރީގެ ތަރިން ކަމުގައިވާ ޒައިނުއްދީން ޒިދާން އާއި މިޝޭލް ޕްލެޓީނީ އަދި ކުރީގެ ކޯޗް ލައުރެންޓް ބްލޭންކަށްވެސް ދިނެވެ.
މަޝްހޫރު "އީއެސްޕީއެން" އިން ބުނެފައި ވަނީ ރައީސް މެކްރޮންގެ ދައުވަތު ގަބޫލް ނުކުރަނީ ހަމައެކަނި ބެންޒީމާ ނޫން ކަމަށެވެ. ޒިދާނާއި ޕްލެޓީނީ އަދި ބްލޭންކްވެސް ރައީސް މެކްރޮންގެ ދައުވަތު ގަބޫލް ނުކުރާ ކަމަށެވެ. ދައުވަތު ގަބޫލް ކުރި ކުޅުންތެރިންގެ ތެރޭގައި ޕައުލް ޕޮގްބާ އާއި އެންގްލޯ ކަންޓޭ ހިމެނެއެވެ.
ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމުގައި މިވަގުތު ހުރި ބެންޒީމާއަކީ މިހާރުވެސް ފްރާންސް ސްކޮޑުގައި ނަން އޮތް ކުޅުންތެރިއެކެވެ. ސްކޮޑުން އެއްފަރާތް ވެލަން އޭނާއަށް ޖެހުނީ ވަރލްޑް ކަޕް ފެށެން އެއްދުވަހަށް ވެފައި ވަނިކޮށް ލިބުނު އަނިޔާއަކާ ގުޅިގެންނެވެ. އެކަމަކު މިހާރު އަނިޔާއިން ރަނގަޅުވެ ބެންޒީމާ ހުރީ ކުޅެވޭ ހާލަތުގައެވެ. އަދި ފައިނަލް މެޗުން އޭނާ ފެނިދާނެ ކަމަށް ޔޫރަޕުގެ ބައެއް މީޑިޔާތަކުން ހަބަރު ފެތުރިއެވެ. އެކަމަކު ފްރާންސް ކޯޗް ޑިޑިއެ ޑޯޝެމްޕް ހުރީ ބެންޒީމާއަށް ފުރުސަތު ދޭގޮތަކަށް ނޫނެވެ.
މީޑިޔާ ބައެއް ރިޕޯޓުތައް ބުނާ ގޮތުން ބެންޒީމާ އާއި ޑޯޝެމްޕާ ދެމެދު ހިތްހަމަނުޖެހުންތައް ވަނީ އުފެދިފައެވެ. މީގެ ކުރިންވެސް ފްރާންސް ގައުމީ ޓީމުން ވަނީ ބެންޒީމާ ގައުމީ ޓީމުން ދުރުކޮށް ގިނަ ދުވަސްތަކެއް ވަންދެން އެކަހެރި ކޮށްލާފައެވެ.
ފްރާންސާއި އާޖެންޓީނާ ބައްދަލު ކުރާ ފައިނަލް މެޗް ފަށާނީ މާދަމާ ރޭ ރާއްޖޭ ގަޑިން 20:00 ގައެވެ.
