ޗައިނާގެ ކުންފުނިތަކުން އެމެރިކާގެ ގައުމީ ސަލާމަތަށް ކުރިމަތިވެފައިވާ ނުރައްކަލަށް އަލިއަޅުވާލައްވަމުން ސެނެޓަރު ޓޮމް ކޮޓަން ވަނީ ޗައިނާގެ ޓެކް ޖަޔަންޓް ވާވޭ އިން 5ޖީ ޓެކްނޮލޮޖީ ޑޮމިނޭޓް ކުރަން މަސައްކަތްކޮށް އެމެރިކާގެ ޑޭޓާ ވަގަށް ނަގާ ކަމަށް ތުހުމަތު ކުރައްވާފަ އެވެ.
އެމެރިކާގެ ރައްޔިތުންގެ ޕާސަނަލް ޑޭޓާއާއި އެމެރިކާގެ އެންމެ ނާޒުކު ޑިފެންސް ސިސްޓަމްތަކަށް ވާވޭ އާއި ޗައިނާގެ ކޮމިއުނިސްޓް ޕާޓީއަށް ފުރުސަތު ނުދެވޭނެ ކަމުގައި އޭނާ ވިދާޅުވިއެވެ. އަދި ގައުމީ ސަލާމަތަށް ކުރާ ނުރައްކާތެރިކަން ހައްލުކުރަން ޖެހޭ ކަމަށް ކޮޓަންގެ ބަޔާނުގައިވެ އެވެ.
އޭނާ މިވާހަކަ ދެއްކެވީ އެމެރިކާގެ ގާނޫނު ހަދާ މަޖިލީހުގެ ދެ ޕާޓީގެ ގްރޫޕަކުން ޗައިނާގެ ވާވޭ ޓެކްނޮލޮޖީސް އާއި ޗައިނާގެ 5ޖީ ކުންފުނިތަކަށް ދަތިކުރުމުގެ ފިޔަވަޅު އެޅުމަށް "ނެޓްވޯކްސް އެކްޓް" ގެ ނަމުގައި ބިލެއް ހުށަހަޅަމުންނެވެ.
ޗައިނާގެ ޓެކްނޮލޮޖީ ކުންފުނި ވާވޭ އާއި އިތުބާރު ނުކުރެވޭ ޗައިނާގެ އެހެން ފަރާތްތަކަށް ދަތިކުރުމުގެ ފިޔަވަޅު އެޅުމަށް އާކެންސޯ ސެނެޓަރ ޓޮމް ކޮޓަން އެހެން ތިން ސެނެޓަރަކާ އެކު ބިލެއް ހުށަހަޅުއްވާފަ އެވެ.
އެ ބިލްގެ މަގްސަދަކީ އެމެރިކާއަށް ޖާސޫސްކޮށް ގާނޫނުތަކާ ހިލާފުވާ ބޭރުގެ ކުންފުނިތައް ޒިންމާދާރު ކުރުމެވެ. މި ބިލުގެ ސަބަބުން އެ ފަރާތްތައް އެމެރިކާގެ ޓްރެޜަރީ ޑިޕާޓްމަންޓުގެ ސްޕެޝަލީ ޑެޒިގޭޓެޑް ނޭޝަނަލްސް (އެސްޑީއެން) ލިސްޓަށް އިތުރު ކޮށް، އެމެރިކާގެ މާލީ ނިޒާމުގައި އެފަރާތްތަކުގެ އެސެޓްތައް ފްރީޒް ކުރެވޭނެއެވެ.
