އިންޑިއާގެ ގުޖުރާތު ސްޓޭޓްގެ ޕުޝްޕަވަތީ ކޯރުގެ އައްސޭރީގައި ގަދީމީ ކުޑަ ރަށެއް ކަމަށްވާ މޮޑެރާއަކީ 8،000 މީހުން ދިރިއުޅޭ އަވަށެކެވެ.
މޮޑެރާ ވެގެން ދިޔައީ 2022 ވަނަ އަހަރުގެ ނޮވެމްބަރު މަހު އިންޑިއާގައި 24 ގަޑިއިރު އަވިން ކަރަންޓް އުފައްދާ ފުރަތަމަ ރަށަށެވެ. ފުރާޅުމަތީގައި ސޯލާ ޕެނަލް ބަހައްޓައިގެން 1000 އަށް ވުރެ ގިނަ ގެތަކަށް ސޯލާ ހަކަތަ ލިބެއެވެ.
ސޯލާ ޕަވަރ އާންމު ކޮށް ބޭނުންކުރުމަކީ އިންޑިއާގެ ހަކަތަ ފެހި ހަކަތައަށް ބަދަލުކުރުމުގެ ސްޓްރެޓެޖީގެ ބިންގަލެވެ. އިންޑިއާއިން ވަނީ ސޯލާގެ ޚަރަދު ކުޑަކުރުމުގައި ބޮޑެތި ކުރިއެރުންތަކެއް ހޯދާފައެވެ. 2013 އާއި 2020 އާ ދެމެދު އިންޑިއާގައި ގޭބިސީގައި ރޫފްޓޮޕް ސޯލާ ސިސްޓަމެއްގެ އެވްރެޖް އަގުން މިހާރު 73 ޕަސެންޓް ދަށްވެ ކިލޯވޮޓަކަށް އެވަރެޖުކޮށް 658 އެމެރިކާ ޑޮލަރު ޖެހެއެވެ.
އިންޑިއާގެ މަރުކަޒީ ސަރުކާރުން ވަނީ މައި ކަރަންޓް ގްރިޑާއި ސޯލާގެ ކަރަންޓު ގުޅާލުމުގެ ސޯލާ ޕްރޮގްރާމްގެ ފޭސް ދޭއް ފަށާފައެވެ. މި ފޭސްގައި ސޯލާ ޕެނަލް ފުރާޅުމަތީގައި ބެހެއްޓުމަށް ބާރު އަޅާފައި ވެއެވެ.
އިންޑިއާގައި ފުރާޅުމަތީގައި ސޯލާ ބެހެއްޓުން ކުރިއަށް ދިއުން އުޅެނީ ހީކުރ ާވަރަށް ވުރެން ލަސްކޮށެވެ. ޖޭއެމްކޭ ރިސާޗުން ލަފާކުރާ ގޮތުގައި 31 މާރޗް 2022 ގެ ނިޔަލަށް އިންޑިއާގެ ޖުމްލަ ފުރާޅުމަތީ ސޯލާ ބެހެއްޓުން 11،770 މެގަވޮޓުގައެވެ. މިއަދަދުން ގޭބިސީން ލިބުނީ 2،010 މެގަވޮޓްގެ ކަރަންޓެވެ. އެއީ އެންމެ 17 ޕަސެންޓެވެ. މިއީ ރޫފްޓޮޕް ސޯލާ ބެހެއްޓުމުގެ ޕްރޮގްރާމްގެ ދަށުން 2022 ވަނަ އަހަރުގެ ނިޔަލަށް ފުރަތަމަ ލަފާކުރި 40 ގިގަވަޓަށްް ވުރެ މާ ދަށް އަދަދެކެވެ. އިންޑިއާގައި 300 މިލިއަން ގެ ހުންނަ ކަމަށް ވެއެވެ.
މޮޑެރާގައި ހިންގާފައިވާ ސޯލާ މަޝްރޫޢުގެ މުހިންމު އެއް އެއްޗަކީ 6 މެގަވޮޓްގެ ބިންމަތީގައި ބަހައްޓާފައިވާ ސޯލާ ޕަވަރ ޕްލާންޓެކެވެ. މިއީ ގާތްގަނޑަކަށް 1300 ގޭބިސީއެއްގެ ފުރާޅުމަތީ ގައި ބަހައްޓާފައިވާ ނިޒާމުތަކަށް އިތުރު ކުރެވުނު ހަކަތައެވެ. ގެތަކުގެ އިތުރުން ބަސް ސްޓޭންޑާއި، ޕޮލިސް ސްޓޭޝަނާއި، ޕްރައިމަރީ ހެލްތު ސެންޓަރާއި، ޕަންޗޭޓް އޮފީސް އަދި ސަރުކާރުގެ އެހެން އިމާރާތްތަކުގައިވެސް ސޯލާ ޕެނަލް ވަނީ ބަހައްޓާފައެވެ.
ގުޖުރާތު ޕަވަރ ކޯޕަރޭޝަނުން، ވަނީ ފުރޅުމަތީގައި ސޯލާ ބެހެއްޓުމުގެ ޚަރަދު މުޅި ރަށަށް ހިލޭ ކޮށްދީފައެވެ.
އެއާއެކު 15 މެގަވޮޓްގެ ހަކަތަ ރައްކާ ކުރެވޭ ބެޓެރީ އެނާޖީ ސްޓޯރޭޖް ސިސްޓަމެއް ވެސް އިންސްޓޯލްކޮށްފައި ވެއެވެ. ނަތީޖާއެއްގެ ގޮތުން އެވްރެޖްކޮށް ދުވާލަކު ގާތްގަނޑަކަށް 30،000 ޔުނިޓް ސޯލާ ޕަވަރ އުފައްދާއިރު، 5،500 ޔުނިޓް ބޭނުން ކުރެވި، 6،000 ޔުނިޓް ބެޓެރީގައި ރައްކާކުރެވެއެވެ. އަދި އިތުރުވާ ކަރަންޓް ދުވަހުން ދުވަހަށް މައި ކަރަންޓު ގްރިޑަށްް ފީޑް ކުރެވެ އެވެ. މިކަމުގެ ސަބަބުން އާންމުން މަހަކު ގާތްގަނޑަކަށް ކުރިން ޚަރަދު ކުރި 3،000 ރުފިޔާގެ ކަރަންޓް ބިލުން މިހާރު ވަނީ ގާތްގަނޑަކަށް 1،000 ރުފިޔާއަށް ކުޑަ ކުރެވިފައެވެ. މި މަޝްރޫއުގެ ސަބަބުން އެ ރަށުގެ ރައްޔިތުންގެ ދިރިއުޅުމުގެ ފެންވަރު ރަނގަޅުވެފައިވެއެވެ. އަދި ގިނަ ބަޔަކު ކަރަންޓު ބޭނުން ކުރުންވެސް އިތުރު ވެފައިވެއެވެ.
މުޅި ގުޖުރާތު ސްޓޭޓަކީ ސޯލާ ޕަވަރ، ޚާއްސަކޮށް ފުރާޅުމަތީ ސޯލާގެ ދާއިރާއިން ކުރިއެރުންތަކެއް ހޯދަމުން އަންނަ ސްޓޭޓެކެވެ. އެއީ އިންޑިއާއިން ހާސިލް ކުރަން މަސައްކަތްކުރާ އިއާދަކުރަނިވި ހަކަތައިގެ އިންގިލާބުގެ އެންމެ ކުރީގައި އޮތް ސްޓޭޓެކެވެ. އިންސްޓިޓިއުޓް ފޯ އެނާޖީ އިކޮނޮމިކްސް އެންޑް ފައިނޭންޝަލް އެނަލިސިސް (އައިއީއީއެފްއޭ) އާއި ޕާޓްނަރ އޯގަނައިޒޭޝަން ޖޭއެމްކޭ ރިސާޗްގެ ރިޕޯޓެއްގައިވާ ގޮތުން 2022 ވަނަ އަހަރު އިންޑިއާގައި ރެޒިޑެންޝަލް ރޫފްޓޮޕް ސޯލާގެ ޖުމުލަ އިންސްޓޯލްޑް ކެޕޭސިޓީ ހިމެނެނީ 61 ޕަސެންޓްގައެވެ.
ފުރާޅުމަތީ ސޯލާ ބެހެއްޓުމަކީ އާންމު މީހާ ދެކޭ ގޮތުން ބަލާއިރު އޭނާއަށް ކަރަންޓް ބިލްތައް ކުޑަވެދާނެ ކަމެކެވެ. އަދި އޭނާ ބޭނުންކޮށް އިތުރު ވާ ކަރަންޓު ސަރުކާުރގެ ގްރިޑަށް އަނބުރައި ފޮނުވިދާނެ އެވެ. އަދި އެކަމަށް މީހާއަށް އާމްދަނީއެއް ލިބޭގޮތް ވެދާނެއެވެ.
މޮޑެރާގައި ސޯލާ ޕެނަލްތައް ބަހައްޓުމުގެ މުޅި ހަރަދުގެ 800 މިލިއަން ރުޕީސްގެ ޚަރަދު އުފުލީ ސްޓޭޓް ސަރުކާރުންނެވެ. އިންޑިއާގެެ 6 ލައްކަ ރަށުގައި ސޯލާ ބެހެއްޓުން އެގޮތަށް ގެންދެވޭނެ ކަމަކަށް ނުބެލެވެއެވެ. ސަރުކާރުން އެ ރަށުގެ ޚަރަދު ހަމަޖެއްސި ކަމުގައި ވިއަސް ސޯލާއާއި ސޯލާ ހަކަތައިގެ ވިޔަފާރީގައި އުޅޭ ކުންފުނިތަކުން އެފަދަ ބޮޑެތި ކެޕިޓަލް ހަރަދުތަކެއް ކުރަން ބޭނުމެއް ނުވެއެވެ.
އެކަމަށް އޮތް ހައްލަކީ ސޯލާ ބެހެއްޓުމުގެ މަސައްކަތުގެ ރިސްކާއި ފައިދާ ހަމަހަމަ ގޮތަކަށް ބަހާލައިގެން އާ ފައިނޭންސިން މެކޭނިޒަމެއްގެ ދަށުން ލޯނު ފައިސާއާއި ސަރުކާރުގެ އެހީއާއި އަދި އަމިއްލަ ފަރާތްތަކުގެ ހޭދަ އެއްކޮށްލައިގެން ކެޕިޓަލް ޚަރަދު ހައްލު ކުރުމެވެ.
އިންޑިއާއިން ވަނީ ސޯލާ ބެހެއްޓުމުގެ މަސައްކަތް ސްޓްރީމް ލައިން ކުރުމަށް ޑިޖިޓައިޒޭޝަން ޕްރޮގްރާމުގެ ދަށުން ހައްލެއްވެސް ހޯދާފައެވެ. އެގޮތުން ސަރުކާުރން ހަދާފައިވާ ޕޯޓަލް މެދުވެރިކޮށް އެކަމަށ ްބޭނުންވާ މީހާއަށް އެޕްލައި ކުރެވޭނެއެވެ. https://solarrooftop.gov.in އަކީ އެކަކަށް ހަދާފައިވާ ޚާއްސަ ޕޯޓަލްއެވެ. ސޯލާއަކީ ގިނަ ލޮޖިސްޓިކްސް އަދި އިދާރީ މައްސަލަތައް ހިމެނޭ މަސައްކަތެކެވެ. އެއް ބައެއްގެ ތަޖުރިބާއިން އިބުރަތް ލިބިގަނެ ހުރި ގޮންޖެހުންތައް ހައްލު ކުރުމަށް އެހެން މީހުން މަސައްކަތް ކުރަން ޖެހެއެވެ.
