ރައްޔިތުންނަށް ސައުވީސް ގަޑިއިރު ކަރަންޓުގެ ޚިދުމަތް ސްޓެލްކޯއިން ފޯރުކޮށްދެވެނީ ސަރުކާރުގެ ހެޔޮފުޅުކަމުން ކަމުގައި ސްޓެލްކޯގެ މެނޭޖިންޑިރެކްޓަރ އަޙުމަދު ޝަރީފް އާދަމް ވިދާޅުވެއްޖެއެވެ.
އެކުންފުނީގެ ޚިދުމަތަށް 73 އަހަރު ފުރުން ފާހަގަ ކުރުމަށް ރޭ ބޭއްވި ޖަލްސާގައި ވާހަކަ ދައްކަވަމުން ޝަރީފް ވިދާޅުވީ އެ ޚިދުމަތް ދެވެނީ ސަރުކާރުން ދެއްވާ ސަބްސިޑީގެ ސަބަބުން ކަމަށެވެ.
"ކޮވިޑްގެ ދުވަސްވަރާއި، ދޭދޭ ހަނގުރާމައިގެ ސަބަބުން ތެލުގެ އަގުބޮޑުވެގެންގޮސް އަތް ނުފޯރާ ފަށަށް އަގު ގޮސްފައި ވީއިރުވެސް އަޅުގަނޑުމެންގެ މިކަރަންޓަށް އެއްވެސް ކަހަލަ ބުރޫއެރުމެއްނެތި ޚިދުމަތް ދެވެމުން މިގެންދެވެނީ ސަރުކާރުގެ ސަބްސިޑީޒް އަޅުގަނޑުމެމްނަށް ދެއްވާތީ،" ކަމަށް ޝަރީފް ވިދާޅުވިއެވެ.
އޭނާ ވިދާޅުވީ ސަރުކާރުން ޚާއްސަ ރޭޓެއްގައި ގެންދަވަނީ ސްޓެލްކޯއަށް ތެޔޮ ފޯރުކޮށްދެއްވަމުން ކަމަށެވެ. ސްޓެލްކޯއަށް ތެޔޮ ފޯރުކޮށްދޭ ފަރާތަށް ސަރުކާރުން ގެންދަވަނީ ތެލުގެ ހަމަ އަގު އަދާ ކުރައްވަމުން ކަމަށް ވެސް އޭނާ ވިދާޅުވިއެވެ.
