ސްޓެލްކޯގެ މުވައްޒަފުންގެ ތެރެއިން ބޯހިޔާވަހިކަން މިހާތަނަށް ނުލިބިފައިވާ މިވައްޒަފުންނަށް ބޯހިޔާވަހި ކަމުގެ ސްކީމެއް ތަޢާރަފް ކުރުމަށް ވިސްނަމުންދާ ކަމަށް އެކުންފުނީގެ މެނޭޖިން ޑިރެކްޓަރ އަޙްމަދު ޝަރީފް ރޭ ވިދާޅުވެއްޖެއެވެ.
ސްޓެލްކޯއަށް 73 އަހަރު ފުރުން ފާހަގަކުރުމަށް ރޭ ބޭއްވި ޖަލްސާގައި ވާހަކަ ދައްކަވަމުން އޭނާ ވިދާޅުވީ ހުޅުމާލޭ ފޭސް ދޭއްގައި އިމާރާތް ކޮށްފައިވާ އެކުންފުނީގެ ދެ ޓަވަރުގައި މިހާރުވެސް އެކުންފުނީގެ 360 މުވައްޒަފުންގެ އާއިލާތައް އުޅެމުންދާ ކަމަށެވެ. އޭގެ އިތުރިން ބޯހިޔާވަހިކަން ނުލިބި ބާކީ ތިބި މުވައްޒަފުންނަށް ބޯހިޔާވަހިކަމުގެ "ސްކީމެއް ތަޢާރަފްކުރަން އަޅުގަނޑުމެން އެބަ ޚިޔާލު ކުރަން،" ޝަރީފް ވިދާޅުވިއެވެ. އޭނާ ވިދާޅުވީ އެ ސްކީމަކީ އެހެން ފަރާތްތަކުން ތަޢާރަފްކުރާ ބޯހިޔާވަހިކަން ސްޓެލްކޯގެ މުވައްޒަފުންނަށް ހޯދައިދިނުމަށް އެހީވާ ސްކީމެއް ކަމަށެވެ.
އޭނާ ވިދާޅުވީ އެސްޓީއޯ ދެ ޓަވަރުގައި އުޅެމުންދާ އެ ކުންފުނީގެ މުވައްޒަފުންނަށް ވެސް ލުއިތަކެއް ހޯދައިދޭން މިހާރު ނިންމާފައިވާ ކަމަށެވެ. "ޑިސެމްބަރުގެ ނިޔަލަށް އެޑުވާންސްޕޭމަންޓު ނުދެއްކިފައިވާ ސްޓާފުންގެ އެޑްވާންސް ޕޭމަންޓް ޕްރައިމަރީ ޕޭމަންޓުގެ ތެރޭގައި ހިމަނައިގެން ކުރިއަށް ގެންދަން ސްޓެލްކޯއިން މިހާރުވަނީ ނިންމާފައި. އަދި ހަމައެއާއެކީގައި މުވައްޒަފުންގެ މުސާރައަށް ބަލައި، މުވައްޒަފުންގެ ފުލެޓަށް ދައްކަންޖެހޭ ކުލީގެ އަގު ކުޑަކުރުމަށްޓަކައި މަޝްވަރާ ކުރުމަށްފަހު މިހާރު ވަނީ އަށާއަހަރުގެ ބަދަލުގައި 25 އަހަރަށް ބަދަލުކޮށް މުވައްޒަފު ދައްކަންޖެހޭ އަދަދު ކުޑަކޮށްފައި،" ޝަރީފް ވިދާޅުވިއެވެ.
އޭނާ ވިދާޅުވީ އެކަން މިހާރުވަނީ މެނޭޖުމެންޓުން ނިންމުމަށްފަހު ސްޓެލްކޯގެ ބޯޑަށް ހުށަހަޅާފައި ކަމަށެވެ. ބޯޑުން އެކަން ފާސްވުމުން މުވައްޒަފުންނަށް އަންގާނޭ ކަމަށް ވެސް ޝަރީފް ވިދާޅުވިއެވެ. އެކަން ބޭނުންވާ މުވައްޒަފުން ލިޔުމުން އަންގަންވާނޭ ކަމަށް ވެސް ޝަރީފް ވިދާޅުވިއެވެ.
