ކޮޅުފުށީގައި ސަރުކާރުން އަޅަންފަށާފައިވާ 100 ހައުސިންގ ޔުނިޓްގެ މަސައްކަތް އަވަހަށް ނިންމުމަށް މަސައްކަތް ކުރައްވަމުން ގެންދަވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅު ވެއްޖެއެވެ.
ރައީސް މިހެން ވިދާޅުވީ ކޮޅުފުށީ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީއާ މިއަދު ބައްދަލުކުރައްވައި އަންނައަހަރު ކޮޅުފުށީގައި ހިންގުމަށް ހަމަޖެހިފައިވާ މަޝްރޫޢުތަކާބެހޭ މައުލޫމާތު ދެއްވަމުންނެވެ.
އެރަށު ކައުންސިލުން ވިދާޅުވީ 100 ހައުސިންގ ޔުނިޓްގެ މަސައްކަތް އަވަސް މުސްތަޤުބަލެއްގައި ނިމިގެން ދިޔުމުން މިހާރު ހުރި ހައުސިންގެ ގިނަ ދަތިތައް ހައްލުވެގެންދާނޭ ކަމަށެވެ. ކައުންސިލުން ވިދާޅުވީ ރަށުގެ މަގުތައް ހެދުމާއި، ބޯޅަދަނޑު ހެދުމާއި، އިޖުތިމާއީ މަރުކަޒަކާއި، އަދި އަތޮޅުވެރިކަން ކުރާރަށް މުއްޔަށް ފަޅުތެރެއިން ދަތުރުކުރެވޭނެ ގޮތް ހަމަޖެއްސެވުމަކީ ރައްޔިތުން ވަރަށް ބޭނުންވާ ކަންކަން ކަމަށެވެ. މި ސަރުކާރަކީ އެއްފަހަރާ އެންމެ ގިނަ ތަރައްޤީގެ މަޝްރޫޢުތައް ކޮޅުފުށީގައި ހިންގަމުން އަންނަ ސަރުކާރު ކަމަށް ވެސް ކައުންސިލުން ފާހަގަ ކުރެއްވިއެވެ.
މިބައްދަލުވުމުގައި ރައީސް ވިދާޅުވީ ރަށްރަށަށް އެމަނިކުފާނު ކުރައްވާ ދަތުރުފުޅުތަކުގައި، ކައުންސިލްތަކާއި، އ.ތ.މ ކޮމީޓީތަކާއި ބައްދަލުކުރެއްވުމުގެ ބޭނުންފުޅަކީ ރަށްރަށުގެ ތަރައްގީގައި އެރަށެއްގެ ރައްޔިތުންގެ ބައިވެރިވުން އިތުރު ކުރެއްވުން ކަމަށެވެ.
ރައީސްގެ ދެ ކަނބަލުން އެރަށަށް ވަޑައިގެންނެވީ އެއްބައިވަންތަކަމުގެ ދުވަހުގެ ހަރަަކާތްތަކުގައި ބައިވެރިވެ ވަޑައިގެންނެވުމަށެވެ.
