އިޒްރޭލުގައި އެކުލަވާލި ހައްދުފަހަނައަޅާފައިވާ ހަރުކަށި ކަނާތު ފިޔައިގެ ސަރުކާރާ ގުޅިގެން ކުރީގެ އިސްޑިޕްލޮމޭޓުން އިޒްރޭލުގެ ބޮޑުވަޒީރަށް ސިޓީއެއް ފޮނުއްވައިފިއެވެ. އަދި ފްރާންސްގައި ހުންނަވާ އިޒްރޭލު އެމްބެސެޑަރުވެސް ވަނީ ނުރުހުން ފާޅުކުރައްވަމުން އިސްތިއުފާ ދެއްވާފައެވެ.
ފްރާންސްގައި ހުންނަވާ އިސްރާއީލުގެ ސަފީރު ޔައެލް ޖަރުމަން އިސްތިއުފާ ދެއްވާފައި ވަނީ އާ ކަނާތު ފިޔައިގެ ސަރުކާރާ ދެކޮޅަށް އިޙުތިޖާޖު ކުރެއްވުމުގެ ގޮތުންނެވެ.
ޖަރުމަން ފޮނުއްވި އިސްތިއުފާ ސިޓީގައި ވަނީ ބެންޖަމިން ނަތަންޔާހޫގެ އާ ސަރުކާރަކީ "އިސްރާއީލް ދައުލަތުގެ ބުރު ސޫރައާއި އަގުތަކަށް ނުރައްކާވާނެ ސަރުކާރެއް" ކަމަށެވެ. އޭނާ ވިދާޅުވީ ހައްދުފަހަނަޅާފައިވާ ޚިޔާލުތައް ފާޅުކޮށްފައިވާ ޕާޓީތަކުގެ މަންދޫބުން އައު ސަރުކާރުގައި ހިމެނޭ ކަމަށެވެ. އަދި އެފަދަ ސަރުކާރެއްގެ ސިޔާސަތު އޭނާއަށް ތަމްސީލުނުކުރެއްވޭނެ ކަމަށެވެ.
ބެންޖަމިން ނަތަންޔާހޫގެ އައު ސަރުކާރަކީ އޭނާ އެކުލަވާލައްވާ ހަ ވަނަ ސަރުކާރެވެ. އައު ސަރުކާރު ހުވައި ކޮށްފައި ވަނީ ކެނެސެޓްގައި ބުރާސްފަތި ދުވަހު އެވެ. މީހުން ވަނީ ކެނެސެޓްގެ ކުރިމަތީގައި މުޒާހަރާ ކޮށްފައެވެ.
އާ ސަރުކާރުގެ މައިގަނޑު ސިޔާސަތަކީ "އިސްރާއީލުގެ ބިމުގެ ހުރިހާ ސަރަހައްދެއްގައި ޔަހޫދީންނަށް ދެބަސްނުވެވޭ ފަދަ ހައްގެއް ލިބިގެންވާ" ކަމަށް އެއްބައްވެ އެކަން ތަންފީޒު ކުރުމެވެ.
އެ ގޮތުން ޚަލީލާއި ނަޤަބް ސަހަރާއާއި ގޯލާންގެ އުސްބިންތަކާއި ހުޅަނގު އައްސޭރީގެ ހުރިހާ ހިސާބެއްގައި ވެސް ޔަހޫދީ އިސްތިއުމާރީން ވަޒަން ވެރިކުރުމަށް މަސައްކަތް ކުރާނެ ކަމަށް އައު ސަރުކާރުން ބުނެފައި ވެއެވެ.
ކުރީގެ ބޮޑު ވަޒީރު ޔާއީރް ލަޕިޑް ވަނީ ނަތަންޔާހޫގެ ސިޔާސަތުތައް ކުށްވެރި ކުރައްވައި އޭނާ އިޒްރޭލު ގެންދަވަނީ އަނދިރި، ފަނާ ކުރަނިވި ދީނީ ގާނޫނުތަކެއް ތައާރަފް ކޮށް ގައުމު އަނދަވަޅަކަށް ވައްޓާލުމާ ދިމާއަށް ކަމަށެވެ.
އިސްރާއީލުގެ ކުރީގެ ޑިޕްލޮމެޓުންގެ 100 އަށް ވުރެ ގިނަ ބޭފުޅުން ވަނީ ނަތަންޔާހޫއަށް ސިޓީއެއް ލިޔުއްވައި އާ ކަނާތުފިޔައިގެ ސަރުކާރުން ދުނިޔޭގެ ގައުމުތަކުންނާއި މީހުން އިޒްރޭލާ މެދު ދެކޭ ގޮތަށް ހުތުރު އަރުވާނެ ކަމަށް ވިދާޅުވެފައެވެ.
އެމެރިކާ ރައީސް ވިދާޅުވީ ނަތަންޔާހޫއަކީ ޒަމާންވީ ރަހުމަތްތެރިއެއް ކަމަށާއި އެމެރިކާއަށް އޭނާއާއެކު މަސައްކަތް ކުރެވިދާނެ ކަމަށެވެ.
