ޗައިނާގައި ކޯވިޑް ފެތުރޭ މިންވަރު އިތުރުވެގެން ދިއުމުން ޗައިނާގައި ދުވާލަކު ގާތްގަނޑަކަށް 9،000 މީހުން މިހާރު މި ބަލީގައި މަރުވަމުންދާ ކަމަށް ތަޖުރިބާކާރުން ލަފާ ކުރެއެވެ. ކޯވިޑް ފެތިރެމުންދާ މިންވަރާއި އަދި އައު ވައްތަރުތައް އާލާވަމުންދޭތޯ ބެލުމަށް އެމެރިކާއިން ވަނީ ބައިނަލްއަގްވާމީ މަތިންދާބޯޓުތަކުން ނަގާ ނަޖިސް ފެނުގެ ސާމްޕަލް ތަހުލީލު ކުރަން ނިންމާފައެވެ.
އެމެރިކާގެ ސެންޓަރސް ފޯ ޑިޒީސް ކޮންޓްރޯލް އެންޑް ޕްރިވެންޝަނުން ނަޖިސް ފެން ޓެސްޓް ކުރުމަށް ހުށަހަޅާފައިވާ މައްސަލައަކީ މި ހަފްތާގައި އިއުލާންކުރި ދަތުރުފަތުރުގެ އާ ހުރަސްތަކަށް ވުރެ ރަނގަޅު ހައްލެއް ކަމަށް ތަޖުރިބާކާރުން ބުނެއެވެ. އަދި އޭގެ ސަބަބުން ވައިރަސް ޓްރެކްކޮށް މޮނީޓާ ކުރެވޭނެ ކަމަށްވެސް އެފަރާތްތަކުން ދެކެއެވެ.
އިނގިރޭސިވިލާތުގެ ހެލްތު ޑޭޓާ ފާމް އެއާފިނިޓީން ވެސް ލަފާ ކޮށްފައިވާ ގޮތުގައި ޗައިނާގައި ކޮންމެ ދުވަހަކު ގާތްގަނޑަކަށް 9،000 މީހުން ކޯވިޑް ޖެހިގެން މަރުވެއެވެ. އަދި މި އަންދާސާއަކީ މީގެ ހަފްތާއެއްހާ ދުވަސް ކުރިއާ އަޅާބަލާއިރު ގާތްގަނޑަކަށް ދެގުނަ އިތުރު އަދަދެކެވެ.
އެއާފިނިޓީން ބުރާސްފަތި ދުވަހު ނެރުނު ބަޔާނެއްގައި ބުނެފައި ވަނީ ޑިސެމްބަރު މަހުގެ އެއްވަނަ ދުވަހުން ފެށިގެން ޗައިނާގައި ޖުމްލަކޮށް މަރުވި މީހުންގެ އަދަދު 100،000 އަށް އަރާނެ ކަމަށާއި ޖުމްލަ 18.6 މިލިއަން މީހުންނަށް ބަލި ޖެހިފައިވާ ކަމަށެވެ. އެ އަންދާސާ ބިނާ ކޮށްފައި ވަނީ ކޭސްތައް ރިޕޯޓްކުރުމުގައި ދާދިފަހުން ޗައިނާއިން ތައާރަފް ކުރި ބަދަލުތައް ތަންފީޒު ކުރުމުގެ ކުރިން ޗައިނާގެ ޕްރޮވިންސްތަކުން އާންމު ކުރި ޑޭޓާގެ މައްޗަށް ބިނާކޮށް ކަމަށް ވެސް އެ ފަރާތުން ބުނެ އެވެ.
