ޗައިނާގެ އާ ފޮރިން މިނިސްޓަރު ކަމުގެ މަގާމަށް ޗައިނާއިން އެމެރިކާއަށް ކަނޑައަޅާފައިވާ ސަފީރު ޗެން ގޭންގް އައްޔަން ކޮށްފިއެވެ.
ހުޅަނގަށް ފާޑުކިޔުމުގައި މަޝްހޫރު ޗެން މަގާމާއި ހަވާލުވެ ވަޑައިގަތީ 2013 ވަނަ އަހަރުން ފެށިގެން ޗައިނާގެ ޑިޕްލޮމެސީގެ ސޫރައަކަށް ވެވަޑައިގަތް ވާންގް ޔީގެ ބަދަލުގައެވެ. ލަފާ ކުރެވޭ ގޮތުގައި ކޮމިއުނިސްޓް ޕާޓީގެ ޚާރިޖީ ސިޔާސަތުގެ އެންމެ މަތީ މަގާމު ބަލަހައްޓަވާނީ ވަންގް ޔީ އެވެ.
އުމުރުން 56 އަހަރުގެ އާ މިނިސްޓަރު ހުންނެވީ 2021 ވަނަ އަހަރުން ފެށިގެން ވޮޝިންޓަންގައި ހުންނަވާ ޗައިނާގެ ސަފީރުގެ މަގާމުގައެވެ. ފުރަތަމަ ބަޔާނުގައި އޭނާ ވިދާޅުވީ އެމެރިކާއާއި ޗައިނާގެ ގުޅުން "ރަނގަޅު މަގަށް" އަނބުރާ ގެންދިއުމަށް އޭނާ އުންމީދު ކުރައްވާ ކަމަށެވެ.
ޗެން އަކީ ކޮމިއުނިސްޓް ޕާޓީ ޕްރޮމޯޓު ކުރެއްވުމުގައި ހަނގުރާމަވެރި ޑިޕްލޮމެޓެއްގެ ގޮތުގައި މަޝްހުރު ބޭފުޅެކެވެ. އަދި ފްރާންސްގެ ޕްރެސް އެޖެންސީން ބުނީ ޗެންގެ ޝަޚުޞިއްޔަތަކީ ޕެރިހުގައި ހުންނަވާ ޗައިނާގެ ސަފީރު ލޫ ޗައި އާއި އެއްގޮތް ޝަޚުޞިއްޔަތެއް ކަމަށެވެ. މާޒީގައި ލޫ ޗައި ދެއްވާފައިވާ އެތައް "ޑިޕްލޮމެޓިކް ނޫން" ބަޔާންތަކުގެ ސަބަބުން ފްރާންސްގެ ފޮރިން މިނިސްޓްރީއަށް އނާ ހާޒިރުކުރެވިފައި ވެއެވެ.
ވޮޝިންޓަންގައި ހުންނަވާ ސަފީރުގެ މަގާމުގައި ހުންނެވި ދުވަސްވަރު ޗެން ވަނީ ބެއިޖިންގެ މަސްލަހަތު ދިފާއުކުރުމާއި ޗައިނާގެ ޑިޕްލޮމެސީއަށް މަޑުމައިތިރި މޫނެއް ދެއްކެވުމާ އެކު ރީތި މިސާލެއް ދައްކަވާފައި ކަމަށް އެހެން ބައެއް މީޑިއާއިން ރިޕޯޓް ކުރެއެވެ.
ޗެން މަގާމަށް އައްޔަން ކުރެއްވުމާ ދިމާވަނީ އެމެރިކާއާއި އެކު ގޯސްވެފައިވާ ގުޅުން ރަނގަޅު ކުރުމަށް ޗައިނާގެ ރައީސް ޝީ ޖިންޕިން މަސައްކަތް ކުރައްވާ ދަނޑި ވަޅެއްގައެވެ. އަދި ދެކުނު ޗައިނާ ކަނޑާއި އިރުމަތީ ޗައިނާ ކަނޑުގައި ދެ ފަރާތުން ކޯޅުމެއްގައި އުޅެ ދުވަސްވަރެއްގައިވެސް މެއެވެ.
