ޗައިނާއިން ކޯވިޑްގެ ފިޔަވަޅުތަކަށް ލުއި ދިނުމުން ޗައިނާއިން ބޭރަށް ދަތުރުކުރާ މީހުން ކޯވިޑަށް ސްކްރީން ކުރާނެ ކަމަށް ބައެއް ގައުމުތަކުން ދަނީ އިއުލާން ކުރަމުންނެވެ. ޗައިނާގެ ބޯޑަރު ހުޅުވާލާނެ ކަމަށް އިއުލާން ކޮށްފައި ވަނީ 8 ޖެނުއަރީގައެވެ.
މިހާރު ޗައިނާއިން އަންނަ މީހުން ޓެސްޓް ހެދުން ލާޒިމުކޮށްފައި ވަނީ އެމެރިކާ، ފްރާންސް އަދި އިންޑިއާއިންނެވެ.
އިނގިރޭސިވިލާތުގެ ޑިޕާޓްމަންޓް އޮފް ހެލްތު އެންޑް ސޯޝަލް ކެއާ އިން ބުނީ 5 ޖެނުއަރީ އިން ފެށިގެން ޗައިނާއިން ދަތުރު ފަށާ މީހުންނަށް ޕްރީ ޑިޕާޗާ ކޯވިޑް ޓެސްޓެއް ހަދަން އަންގާނެ ކަމަށެވެ.
ޖެނުއަރީ މަހުގެ 8 ވަނަ ދުވަހުން ފެށިގެން ޗައިނާއިން އަންނަ ފަސިންޖަރުންގެ ސާމްޕަލް ނަގައި ކޮވިޑަށް ފައްސިވޭތޯ ޓެސްޓް ކުރާނެ ކަމަށް އިނގިރޭސިވިލާތުގެ ހެލްތު ސެކިއުރިޓީ އެޖެންސީން ވެސް ވަނީ އަންގާފައެވެ.
އިނގިރޭސިވިލާތުގެ ހެލްތު ސެކްރެޓަރީ ސްޓީވް ބާކްލޭ ވިދާޅުވީ ސަރުކާރުން އަޅާ ފިޔަވަޅުތަކަކީ ރައްކާތެރި ހަމަހަމަ އަދި ދުރާލާ ފާރަވެރިވުމަށް އަޅާ ފިޔަވަޅުތަކެއް ކަމަށެވެ. އަދި އޭނާ ވިދާޅުވީ އެއީ "ވަގުތީ" ފިޔަވަޅުތަކެއް ކަމަށެވެ.
ދުނިޔޭގެ ސިއްޙަތު ޖަމުއިއްޔާއިން ވަނީ ޗައިނާއިން ކޮވިޑްގެ ޑޭޓާ ހިއްސާކުރަން ޖެހޭނެ ކަމަށް ބުނެފައެވެ. އަދި ސްޕެއިން، ދެކުނު ކޮރެއާ އަދި އިޒްރޭލުންވެސް ވަނީ ކޮވިޑް ޓެސްޓު ކުރުމުގެ އުސޫލުތައް ހަރުކަށިކޮށްފައެވެ.
ޗައިނާގެ ފޮރިން މިނިސްޓްރީން މި ހަފްތާގެ ކުރީކޮޅު ބުނެފައި ވަނީ ޖުމްލަ ގޮތެއްގައި ޗައިނާގެ ކޯވިޑްގެ ބަލި ހާލަތު އަންދާޒާ ކުރެވޭ ގޮތުގައި އަދި ކޮންޓްރޯލް ކުރެވިފައިވާ ކަމަށެވެ.
ޗައިނާ ސަރުކާރުން ބުނާ ގޮތުން ދުވާލަކު ގާތްގަނޑަކަށް 5،000 ކޭސް ރިޕޯޓް ކުރަމުންދެއެވެ. ނަމަވެސް އެހެން ފަރާތްތަކުން ލަފާ ކުރަނީ ދުވާލަކު ކޭސްލޯޑް އެއް މިލިއަނާ ގާތްވެދާނެ އެވެ.
ޗައިނާގައި ދުވާލަކު ކޮވިޑް-19 އަށް ޕޮޒިޓިވްވާ މީހުންނާއި މަރުވާ މީހުންގެ ހަގީގީ އަދަދު ނޭނގެނީ އޮފިޝަލުން ކޭސްތައް ރިޕޯޓްކުރުން ހުއްޓާލައި، ކޯވިޑްގައި މަރުވާ މީހުންގެ ކްލަސިފިކޭޝަން ބަދަލުކޮށްފައިވާތީ ކަމަށް ބެލެވެއެވެ.
