މަރުގެ ތުހުމަތެއްގައި ފުލުހުންގެ ބަންދުގައިހުރި ގދ. ތިނަދޫ މާނަރު، މުހައްމަދު ނިޒާމުގެ 60 ދުވަހަށް ބަންދުގައި ބެހެއްޓުމަށް ކްރިމިނަލް ކޯޓުން މިއަދު އަމުރުކޮށްފިއެވެ.
މި ނިޒާމަކީ ތެޔޮބޯޓުން "ގެއްލުނު" ނިޒާމެވެ. އޭނާ ފެނިފައިވަނީ މާލޭގެ ގެެސްޓުހައުސްއަކުން ކަމަށް ފުލުހުން އިއްޔެ ވަނީ ވިދާޅުވެފައެވެ. އުމަރުން 45 އަހަރުގެ ނިޒާމުގެ މައްޗަށް ކުރެވެނީ އޭނާއާ އެކު ތެޔޮ ބޯޓުގައި ދަތުރުކުރި ބަނގްލަދޭޝްގެ ރައްޔިތެއް ކަމަށްވާ މޮހަމަދު ލިޓަން މަރީލި ކަމުގެ ތުހުމަތި ކަމަށް މައުލޫމާތު ލިބިފައިވެއެވެ. އެެހެންނަމަވެސް ރަސްމީ އެއްވެސް ފަރާތަކުން މިކަން ކަށަވަރު ކޮށްދީފައެއް ނުވެއެވެ.
ގެސްޓުހައުސްއެއްގައި އުޅެނިކޮށް އެނާ ހައްޔަރު ކޮށްފައިވަނީ ކޯޓު އަމުރެެއްގެ ދަށުން ކަމަށް ފުލުހުން ވިދާޅުވިއެވެ. އޭނާ ހައްޔަރު ކޮށްފައިވަނީ އިއްޔެެގެ ވަގުތެއްގައެވެ.
ވިލިމާލޭ ބަނދަރުން މި ދެމީހުން ތެޔޮބޯޓުގައި ފުރީ ނިމިގެންދިޔަ ޑިސެމްބަރު މަހުގެ 28 ވަނަ ދުވަހު އެވެ. އެހެންނަމަވެސް 29 ވަނަ ދުވަހު އެމީހުން ގެއްލިގެން ފުލުހަށް ރިޕޯޓު ކޮށްފައިވެއެވެ. ހަަމަ އެދުވަހު އެމީހުން ދަތުރުކުރި ބޯޓު ހުޅުމާލޭ ކައިރިން ވަނީ ފެނިފައެވެ. އެހެނަމަވެސް އޭގައި މީހަކު ނެތެވެ. އެންމެން ވެސް ހީކޮށްގެންތިބީ ކަނޑުމަތީ ހާދިސާއެއްގައި އެ ދެމީހުން ވެސް ގެއްލުނީ ކަމަށެވެ. ނަމަވެސް ހޯމަދުވަހުން ފެށިގެން މާލެތެރެއިން ނިޒާމު ފެންނަމުންދާ ކަމުގެ އަޑުތައް ފެތުރި އެންމެފަހުން އޭނާ ހައްޔަރުކުރީއެވެ.
