މިހާރު ކުރިއަށްދާ ގޯލްޑަން ފުޓްސަލް މުބާރާތުގައި މާލެ އަތޮޅު، އަތޮޅު ބުރުގައި ކުޅުނު ފުރަތަމަ މެޗުގައި ހިންމަފުށީ ކޮޅަށް ދިއްފުށިން މިރޭ 18 ލަނޑު ޖަހައިފިއެވެ.
މި މެޗް ދިއްފުށިން 18-2 އިން ކާމިޔާބު ކުރިއިރު، ކެޕްޓަން ޒައިން ޒަފަރު ވަނީ 6 ލަނޑު ކާމިޔާބު ކޮށްފައެވެ. މިއީ މިފަހަރުގެ ގޯލްޑަން ފުޓްސަލް މުބާރާތުގައި ފެނިގެންދިޔަ ފުރަތަމަ ޑަބަލް ހެޓްރިކެވެ.
ޒައިންގެ އިތުރުން ދިއްފުއްޓަށް ދެން ލަނޑު ޖަހައިދިނީ ރާއްޖޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމުގައި ހުރި އަހްމަދު ރިޒްވާން (ރިޒޭ) އާއި މުހައްމަދު ޝަމީމް، އަހްމަދު މާޒިން، އަދި އިބްރާހިމް މާއިޝްއެވެ. މީގެ ތެރެއިން ރިޒޭ އާއި ޝަމީމް ވަނީ ހެޓްރިކް ހަދާފައެވެ. މާޒިން 2 ލަނޑު ޖެހިއިރު، މާއިޝްގެ ފަރާތުން ފެނުނީ 1 ލަނޑެވެ. ހިންމަފުށީ ކުޅުންތެރިން އަތުން ބައިކޮޅަށް 3 ލަނޑުވަނެވެ. ހިންމަފުށީގެ ދެ ލަނޑު ކާމިޔާބު ކޮށްދިނީ ހުސައިން ނާފިޒެވެ.
މި ގްރޫޕުގައި ގާފަރާއި މާފުށި ބައްދަލު ކުރި މެޗް ނިމުނީ 1-1 އިން އެއްވަރުވެގެންނެވެ.
ގޯލްޑަންގައި މިރޭ ކުޅުނު އެހެން މެޗުތަކަށް ބަލާއިރު، މުބާރާތުގެ އެންމެ ކާމިޔާބު ރަށް، ތިމަރަފުށި ވަނީ 9-1 އިން ދިޔަމިގިނލި އަތުން މޮޅުވެފައެވެ. ހިރަލަންދޫ އަތުން 7-1 އިން ބުރުނި ބަލިވިއިރު މިގްރޫޕުގައި ހިމެނޭ ގާދިއްފުށި ވަނީ 4-3 އިން ކަނޑޫދޫގެ މައްޗަށް މިރޭ ކުރި ހޯދާފައެވެ.
