ވެރިކަމުން ފައިބައިގެންދާ ރައީސް ޖޯ ބައިޑެންގެ ޚާރިޖީ ވަޒީރު ވަނީ އެމެރިކާއިން ފަލަސްޠީނު މީހުންނާ މެދު ގެންގުޅޭ ސިޔާސަތު އެންމެ ފަހު ދުވަސްތަކުގައި މުރާޖައާ ކުރައްވާފައެވެ.
އެޓްލާންޓިކް ކައުންސިލް ގައި ތަގްރީރު ކުރައްވަމުން، ޚާރިޖީ ވަޒީރު އެންތޮނީ ބްލިންކެން ވިދާޅުވީ، ޣައްޒާގައި ހާލުގައި ޖެހިފައިވާ މީހުންނާ މެދު ހަމްދަރުދީއެއް ނުދައްކާނަމަ އެހެން ތަންތާނގައި ހިނގާ ކާރިސާގައި ޝިކާރައަކަށްވާ މީހުންނާ މެދުވެސް މީހުން ހަމްދަރްދީ ފާޅެއް ނުކުރާނެ ކަމަށެވެ.
އެމެރިކާއާއި އިޒްރޭލުގެ ރަށްވެހިކަން ގެންގުޅުއްވާ ބްލިންކެން ވިދާޅުވަނީ، ޣައްޒާގައި ހިނގަމުންދާ ހަނގުރާމައިގެ ނުރައްކާތެރި ހާލަތުގެ ނޭދެވޭ އަސަރު ދުނިޔޭގެ އެހެން ހިސާބުތަކުގެ މީހުންގެ އިހުސާސްތަކަށްވެސް ކުރަމުންދާނެ ކަމަށެވެ.
"ފަލަސްޠީނު މީހުންނަށް ތަކުލީފު ލިބޭވަރަކަށް ދެން ތިބި މީހުންނާ މެދު ހަމްދަރުދީވާ މިންވަރު ކުޑަވާނެ" ބްލިންކެން ވިދާޅުވިއެވެ.
ޣައްޒާގެ ހަނގުރާމައާ ގުޅިގެން މީހުން ދަނީ ކެލިފޯނިޔާގެ އަލިފާން ކާރިސާގައި އެމެރިކާއަށް މަލާމާތް ކޮށް މީސްމީޑިއާގައި ފާޑު ކިޔަމުންނެވެ. އެކަމަ ގުޅިގެން، އެމެރިކާއަށް ވަނީ އެމީހުންގެ އަމިއްލަ އަމަލުތަކުގެ ނަތީޖާ އިހުސާސްވާން ފަށާފައެވެ.
ބްލިންކެން ވިދާޅުވީ، "މުޅި އަރަބި އަދި މުސްލިމް ދުނިޔޭގައި ވެސް ބޮޑު އަޣުލަބިއްޔަތުން ގަބޫލުކުރާ ގޮތުގައި އޮކްޓޯބަރު ހަތް ވަނަ ދުވަހަކީ، ނުހިނގާ ކަމެއް. ނުވަތަ ހިނގާފައި ވާކަމަށް ގަބޫލު ކުރާނަމަ، އެއީ އިޒްރޭލު ސިފައިންނަށް ދިން ޝަރުއީ ހަމަލާއެއް." ކަމަށެވެ.
އޭގެ އިތުރުން ބްލިންކެން ވިދާޅުވީ، ޣައްޒާގައި މީހުން އުޅޭ ހާލާބެހޭ ގޮތުން އިޒްރޭލު މިޑިއާއިން އެއްވެސް ވަރަކަށް ރިޕޯޓު ނުކުރާ ކަމަށެވެ. އެހެންވެ، "މިހަނގުރާމައިގެ އެންމެ ލާއިންސާނީ ކަމަކީ، (ޣައްޒާގެ) މި ހިތާމަވެރި ހާދިސާ އަށް މީހުން ހައްސާސް ނުވުން" ބްލިންކެން ވިދާޅުވިއެވެ.
