ޔޫކްރޭންގެ ޖާސޫސީ އެސެސްމަންޓުން ބުނާ ގޮތުގައި މިދިޔަ އަހަރުގެ ތެރޭގައި ޔޫކްރޭންގައި ވައްޓާލާފައިވާ އީރާނުގައު އުފައްދާފައިވާ ޑްރޯނެއްގެ ތެރެއިން އެމެރިކާ އާއި ހުޅަނގުގެ ދިހަވަރަކަށް ކުންފުނިން އުފެއްދި ބައިތައް ފެނިފައިވާ ކަމަށެވެ. މިދިޔަ އަހަރުގެ ފަހުކޮޅު އެމެރިކާ ސަރުކާރުގެ އޮފިޝަލުންނާ ހިއްސާކުރި މި އިންޓެލިޖެންސް ރިޕޯޓުން ދައްކުވައި ދެނީ ރަޝިޔާއިން ޔޫކްރޭނަށް ފޮނުވާލާ ޑްރޯންތައް ހުއްޓުވަމީ ހުޅަނގުގެ ގައުމުތަކަށް ޗެލެންޖެއް ކަމަށެވެ.
ސީއެންއެން އިން މިދިޔަ މަހު ރިޕޯޓްކޮށްފައިވާ ގޮތުގައި އެމެރިކާ އާއި ހުޅަނގުން އުފައްދާ ޓެކްނޮލޮޖީ އާއި ސެމީކޮންޑަކްޓަރާއި ޖީޕީއެސް މޮޑިއުލް ފަދަ ކުދި ސާމާނުން ފެށިގެން އިންޖީނު ފަދަ ބޮޑެތި ބައިތަކާ ހަމައަށް އީރާނުގެ ޑްރޯންތަކުގައި ހިމެނިފައި ވެއެވެ. އަދި އެ ސާމާނުތައް އީރާނަށް ލިބުނީ ކިހިނެއްތޯ ބެލުމަށް ވައިޓް ހައުސްއިން ވަނީ ސަރކާރުގެ ހުރިހައި އިދާރާއެއް ހިމެނޭ ޓާސްކް ފޯހެއް އުފައްދާފަ އެވެ.
އީރާނުގެ ޝަހީދު 136 ޑްރޯން އިން ޔޫކްރޭނު ސަރުކާރުން ނަގާފައިވާ 52 ކޮމްޕޯނެންޓްގެ ތެރެއިން 40 ކޮމްޕޯނެންޓަކީ އެމެރިކާގެ ތަފާތު 13 ކުންފުންޏަކުން އުފައްދާފައިވާ ކޮމްޕޯނެންޓްތަކެކެވެ. ބާކީ 12 ކޮމްޕޯނެންޓް އުފައްދާފައި ވަނީ ކެނެޑާ، ސްވިޒަލޭންޑް، ޖަޕާން، ޓައިވާން، އަދި ޗައިނާގެ ކުންފުނިތަކުން ކަމަށް އެރިޕޯޓްގައި ބުނެފައި ވެއެވެ.
