މޯލްޑިވްސް ނެޝަނަލް އިންސްޓިޓިއުޓް އޮފް ސްޕޯޓްސްއިން މި އަހަރު ހިންގުމަށް ހަމަޖެހިފައިވާ ޑިޕްލޮމާ އިން ސްޕޯޓްސް މެނޭޖްމެންޓް (އެމްކިއުއޭ އެޕްރޫވްޑް ލެވެލް 5) ކޯހުގެ މުއްދަތު އިތުރުކޮށް މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓްއިން އިޢުލާން ކޮށްފިއެވެ.
އެ އިންސްޓިއުޓުން ވިދާޅުވީ، މިދިޔަ މަހު 26ގައި އިޢުލާން ކުރި މި ކޯހުގެ މުއްދަތު އިތުރު ކުރީ މި ކޯހުގައި ކިޔަވާނެ ދަރިވަރުން އިތުރަށް ހޯދުމުގެ ބޭނުމުގައި ކަމަށެވެ. އެ އިޢުލާނުގައި ވާގޮތުން އިތުކޮށްފައިވާ މުއްދަތު ދެން ހަމަވާނީ މިމަހުގެ ބާރަވަނަ ދުވަހުގެ 12:00ގެ ނިޔަލަށެވެ.
އަދި ހަމައެއާއެކު މި ކޯހުގެ ރަޖިސްޓްކުރުމުގެ ފުރުސަތު އެ ތާރީޙުން ފެށިގެން ޢާއްމުކޮށް ހުޅުވައިލެވިފައިވާއިރު މިހާތަނަށް ކޯހަށް ފޯމު ހުށަހަޅާފައިވާ ފަރާތްތަކުން އިތުރަށް ފޯމު ހުށަހަޅަން ނުޖެހޭނެކަންވެސް އެ ފަރާތުން ކޮށްފައިވާ އިޢުލާނުގައި ވެއެވެ.
މިކޯހުގު ޝަރުތުތަކުގެ ތެރޭގައި:
- ހ. ޖީ.ސީ.އީ އޭލެވެލް އިމްތިޙާނުން 3 މާއްދާއިން ފާސްވެފައިވުން ނުވަތަ އެފެންވަރުގެ ފާހެއް އޮތުން. ނުވަތަ
- ށ. މޯލްޑިވްސް ކޮލިފިކޭޝަން އޮތޯރިޓީގެ ސެޓްފިކެޓް ލެވެލް 4 ގެ ފާހެއް އޮތުން. ނުވަތަ
- ނ. މި ޑިޕްލޮމާ ޕްރޮގްރާމަށް ފާސްކޮށްފައިވާ ލެވެލް 4 ގެ ފައުންޑޭޝަން ސްޓަޑީ ޕްރޮގްރާމެއް ހާސިލުކޮށްފައިވުން. ނުވަތަ
- ރ. ލެވެލް 4 ގެ ސަނަދެއް ފުރިހަމަކޮށްފައިއޮތުން (ގުޅުން ނެތް)، އަދި އެމް.ކިޔު.އޭ އިން ފާސްކޮށްފައިވާ 'ޔުނިވަރސިޓީ ޕްރިޕެރޭޝަން ޕްރޮގްރާމެއް' ކާމިޔާބުކަމާއެކު ފުރިހަމަކޮށްފައިއޮތުން.
- ބ. އުމުރުން 20 އަހަރު ފުރިފައިވުމާއެކު ސެކަންޑަރީ ސްކޫލް (ގްރޭޑް 6 – 10 އަށް) ފުރިހަމަކޮށްފައިވުމާއި ކުޅިވަރާއި ގުޅުންހުރި ދާއިރާއަކުން 2 އަހަރު ދުވަހުގެ މަސައްކަތު ތަޖުރިބާ ލިބިފައިވުން، އަދި އެމް.ކިޔު.އޭ އިން ފާސްކޮށްފައިވާ 'ޔުނިވަރސިޓީ ޕްރިޕެރޭޝަން ޕްރޮގްރާމެއް' ކާމިޔާބުކަމާއެކު ފުރިހަމަކޮށްފައި އޮތުން ހިމެނެއެވެ.
މުޅިން ހިލޭ ކިޔަވައިދޭ މި ކޯހުގެ ކިޔެވުން އޮންނާނީ މޯލްޑިވްސް ނެޝަނަލް އިންސްޓިޓިއުޓް އޮފް ސްޕޯޓްސް (ހ. ބޯޅަގެ) ގައެވެ. އަދި މި ކޯސް ފެށުމަށް ހަމަޖެހިފައިވަނީ މިއަހަރުގެ ފެބްރުއަރީ މަހުގެ ފުރަތަމަ ދުވަހުއެވެ. މިގޮތުން މި ކޯހުގެ އެޕްލިކޭޝަން (ގޫގަލް ފޯމް މެދުވެރިކޮށް) ފޯމާއިއެކު ހުށަހަޅަންޖެހޭ ތަކެތީގެ ތެރޭގައި ދިވެހިރައްޔިތެއްކަން އަންގައިދޭ ލިޔުމާއި ،ސީވީ، ތަޢުލީމީ ސެޓްފިކެޓްތަކުގެ އިތުރުން ދާއިރާއާއި ގުޅުންހުރި ލިޔުންތައް ހިމެނެއެވެ.
ޖުމުލަ 35 މީހުންނަށް ބައިވެރިވެވޭ މި ކޯހުގެ ކިޔެވުމުގެ މުއްދަތަކީ ދެ ސެމިސްޓަރއެކު 1 އަހަރެވެ. ކޯހުގެ ޖާގައަށްވުރެ ކުރިމަތިލާފައިވާ ފަރާތްތައް ގިނަ ނަމަ، ޝޯޓްލިސްޓް ކުރުމުގައި ދާއިރާއާއި ގުޅުންހުރި ދާއިރާތަކުގެ މަސައްކަތު ތަޖުރިބާއާއި ތަޢުލީމީ ސެޓްފިކެޓްތަކަށް ބެލެވޭނެ ކަމަށްވެސް އެ އިންސްޓިޓިއުޓް އިން ވަނީ ވިދާޅުވިއެވެ.
