އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ ހަރުކަށި ތާލިބާން ސްޓައިލް ގުޅިފައިވާ ސަރުކާރުން އެގައުމުގެ ސުޕްރީމް ކޯޓު ބަލިކަށި ކޮށްލުމަށް ރާވައިގެން ގާނޫނަށް ބަދަލު ގެނައުމަށް ހުށަހަޅާފައި ވެއެވެ. ނަތަންޔާހޫގެ ސަރުކާރުން އެ ފަދަ ފިޔަވަލެއް އަޅައިފިނަމަ އިޒްރޭލުގެ ސުޕްރީމް ކޯޓު ބަލިކަށި ވެގެންދަނެ ކަމަށް މީޑިއާއިން ބުނެއެވެ.
އައު ސަރކާރުން އިއުލާންކުރި ޕްލޭންގެ ސަބަބުން އިސްރާއީލުގެ ޗެކް އެންޑް ބެލެންސްގެ ނިޒާމު ފުނޑުފުނޑުވާނެ ކަމަށާއި، ޑިމޮކްރެޓިކް މުއައްސަސާތަކަށް ބުރޫއަރާނެ ކަމަށް ފާޑުކިޔާ ފަރާތްތަކުން ބުނެފައި ވެއެވެ. އިޒްރޭލުގެ އައު ސަރުކާރަކީ އެގައުމުގެ ތާރީޚްގައި އައިސްފައިވާ އެންމެ ހައްދުފަހަނައަޅާފައިވާ ކަނާތުފިޔާގެ ހަރުކަށި ސަރުކާރެވެ.
ސުޕްރީމް ކޯޓު ބަލިކަށި ކުރުމަށް ޕްލޭން ހުށަހަޅާފައި ވަނީ ނަތަންޔާހޫގެ އިތުބާރު ލިބިފައިވާ އަދި ސުޕްރީމް ކޯޓަށް ގިނަ ދުވަސްތަކެއް ވަންދެން ފާޑުކިޔަމުންދާ އައު ސަރުކާރުގެ ޖަސްޓިސް މިނިސްޓަރު ޔާރިވް ލެވިން އެވެ. އޭނާގެ ޕްލޭން ހުށަހެޅުއްވީ ޓެކުހަށ ްމަކަރު ހެދިކަމުގެ ކުށް ސާބިތުވެފައިވާ ސިޔާސީ މީހަކަށް ކެބިނެޓް މިނިސްޓަރުގެ މަގާމު އަދާކުރުމުގެ ހުއްދަ ދޭ ގޮތަށް ފާސްކޮށްފައިވާ އާ ގާނޫނަކަށް ސުޕްރީމް ކޯޓު ފަނޑިޔާރުން ބަހުސް ކރަން ފެށުމުންނެވެ.
"އަމަލު ކުރަންވީ ވަގުތު އައިސްފި،" ކޯޓު އޯވަހޯލް ކުރަން ރާވާފައިވާ ޕްލޭނާ ބެހޭ ގޮތުން ލެވިން ބުންޏެވެ.
ލެވިން ހުށަހަޅަނީ 61 ވޯޓުގެ ސާދާ އަޣުލަބިއްޔަތަކުން ސުޕްރީމް ކޯޓުގެ ނިންމުންތައް ބާތިލް ކުރުމުގެ ބާރު އެގައުމުގެ 120 ގޮނޑި ހިމެނޭ ޕާލަމެންޓް ނުވަތަ ކެނެސެޓް އަށް ލިބިގެންދާނެ ފަދަ ގާނޫނެއް ފާސްކޮށްދިނުމަށް ހުށަހަޅާފައެވެ. އަދި ސުޕްރީމް ކޯޓުގެ ފަނޑިޔާރުން އައްޔަންކުރުމުގައި ސިޔާސީ ބޭފުޅުން ބޮޑު ދައުރެއް އަދާކުރުމަށާއި، މިނިވަން ޕްރޮފެޝަނަލުން ބޭނުން ކުރުމުގެ ބަދަލުގައި، ވަޒީރުން އަމިއްލައަށް ސުޕްރީމް ކޯޓު މެމްބަރުން އައްޔަން ކުރުމަށްވެސް އޭނާ ހުށަހަޅާފައި ވެއެވެ.
