ކޮރޯނާވައިރަސްގެ އާ ވައްތަރުތައް އާލާވުމާއި ބެއިޖިން އިން ކޮވިޑް-19އާ ގުޅޭ މައުލޫމާތު ހާމަކުރާ ގޮތާ މެދު ކަންބޮޑުވުން ފާޅުކޮށް ކޮރޯނާވައިރަސް އިންފެކްޝަންތައް އިތުރު ވުމާ ދެކޮޅަށް އައު ފިޔަވަޅުތައް ގާތްގަނޑަކަށް ދިހަ ގައުމަކުން ވަނީ ތައާރަފް ކޮށްފައެވެ.
އެމެރިކާ، ފްރާންސް، ސްޕެއިން، އިޓަލީ، އިންޑިއާ، އިސްރާއީލް، އޮސްޓްރޭލިއާ، ކެނެޑާ އަދި ޖަޕާނުން ބުނެފައި ވަނީ ހުކުރު ދުވަހުން ފެށިގެން ޗައިނާއިން އަންނަ އެންމެންގެ ކޮރޯނާވައިރަސް ޓެސްޓްތައް ނެގެޓިވްވާން ޖެހޭނެ ކަމަށެވެ.
ޔޫރަޕިއަން ޔޫނިއަންގެ އޮފިޝަލުން ވެސް ވަނީ ގުޅިގެން ޗައިނާ އިން އަންނަ ފަރާތްތަކާ ދެކޮޅަށް ފިޔަވަޅު އެޅުމަށް މަޝްވަރާތައް ބާއްވާފައެވެ. ވިލާތު އިއްތިހާދުގެ ރިއާސަތުން ނެރުނު ބަޔާނެއްގައި ބުނާ ގޮތުން ޗައިނާއިން ދަތުރުކުރާ ފަރާތްތަކުން 48 ގަޑިއިރު ނުވާ ނެގެޓިވް ޕީސީއާރް ޓެސްޓެއް ދައްކަން ވާނެއެވެ. އަދި ޗައިނާއިން އަންނަ ފްލައިޓްތަކުގައި މާސްކް އެޅުމަށް ލަފާދިނުމަށް ވެސް އިލްތިމާސްކޮށްފައިވެއެވެ.
ދެކުނު ކޮރެއާއިން ވަނީ ބުރާސްފަތި ދުވަހުން ފެށިގެން ޗައިނާއިން ދަތުރުކުރާ ހުރިހާ ފަރާތްތަކުން ފްލައިޓްތަކަށް އެރުމަށް ކޮރޯނާވައިރަސް ނެގެޓިވް ޓެސްޓު ދަންޖެހޭ ގޮތަށް ހަމަޖައްސާފައެވެ. އަދި ޗައިނާއިން އަންނަ ހުރިހާ ފަރާތްތަކެއް ވެސް އެތެރެވާތާ ފުރަތަމަ ދުވަހުގެ ތެރޭގައި ޕީސީއާރު ޓެސްޓެއް ހަދަން ޖެހުން ލާޒިމުކޮށްފައެވެ.
