އިޓަލީ ގައުމީ ޓީމުގެ ކުރީގެ މަޝްހޫރު ފޯވާޑް ޖިއަންލޫކާ ވިއަލީ އުމުރުން 58 އަހަރުގައި ކެންސަރު ބަލީގައި މިއަދު މަރުވެއްޖެއެވެ.
އިޓަލީ ގައުމީ ޓީމަށް 1985 އިން 1992 އަށް 59 މެޗް ކުޅެދިން ވިއަލީ ވަނީ އިޓަލީ ގައުމީ ޓީމަށް 16 ލަނޑު ކާމިޔާބު ކޮށްދީފައެވެ.
ކްލަބު ލެވެލްގައި ޔުވެންޓަސް 100 މެޗް ކުޅެދީ ޔުއެފާ ޗެމްޕިއަންސް ލީގާއި އިޓާލިއަން ސީރިއޭ އާއި ޔުއެފާ ކަޕާއި އިޓާލިއަން ސްޕަރ ކަޕް ކާމިޔާބު ކުރިއެވެ. އަދި ފަހުން ޗެލްސީއަށް ބަދަލުވެ އެކްލަބާއެކު ޔުއެފާ ކަޕްވިނަރސް ކަޕާއި ލީގް ކަޕާއި އެފްއޭ ކަޕް ކާމިޔާބު ކުރިއެވެ. އަދި ކޯޗެއްގެ ގޮތުގައިވެސް ވިއަލީ ވަނީ ޗެލްސީއާއެކު މިކާމިޔާބީތައް ހޯދާފައެވެ. މީގެ އިތުރުން އަމިއްލަ ގައުމުގައި 1990 ވަނަ އަހަރު ބޭއްވި ވަރލްޑް ކަޕުގެ ތިންވަނަ ހޯދި ޓީމުގައިވެސް އޭނާ ހިމެނުނެވެ.
ވިއަލީ ކެންސަރާ (ޕެންކްރިއޭޓިކް ކެންސަރ) ހަނގުރާމަ ކުރަމުންދާކަން ފުރަތަމަ ހާމަ ކުރީ 2018 ވަނަ އަހަރުއެވެ. ކެންސަރާ ހަނގުރާމަކޮށް 2020 ވަނަ އަހަރުގެ އޭޕްރީލް މަހު ކެންސަރު ބަލިން ރަނގަޅުވެފައިވާކަން އޭނާ ހާމަ ކުރިއެވެ. އެއަށްފަހު އޭނާ ވަނީ މިދިޔަ އަހަރު ޔޫރޯ ފުޓްބޯޅަ މުބާރާތް ކާމިޔާބު ކުރި އިޓަލީ ގައުމީ ޓީމުގެ ކޯޗިންގ ޓީމުގައި މަަސައްކަތް ކޮށްފައެވެ.
ވިއަލީ މަރުވެފައި މިވަނީ ބްރެޒިލްގެ މަޝްހޫރު ފުޓްބޯޅަ ޝަހްސިއްޔަތު ޕެލޭ މިދިޔަ ހަފްތާގައި މަރުވެ، ފުޓްބޯޅައިގެ ދުނިޔެ ހިތާމާގައިވާ ދަނޑިވަޅެއްގައެވެ.
