ބައިނަލްއަގްވާމީ މައިދާނުގައި އިޒްރޭލާ ދެކޮޅަށް ފަލަސްތީނުން ހޯދަމުންދާ ކާމިޔާބީއާ ގުޅިގެން ފަލަސްތީނާ ދެކޮޅަށް އިޒްރޭލުން ފިޔަވަޅު އަޅަން ނިންމައިފިއެވެ. އިޒްރޭލުގެ ސެކިއުރިޓީ ކެބިނެޓުން މިއަދު ހުކުރު ދުވަހު ބައްދަލުވުމަށްފަހު ނިންމާފައި ވަނީ ފަލަސްތީނުގެ ސަރުކާރަ ލިބޭ ޓެކްސްފައިސާ އެފަރާތަށް ނުދީ މާލީ ގޮތުން ބަނޑަށް ޖައްސާލުމަށާއި ފަލަސްތީނު މީހުންނަށް އިމާރާތް ކުރުމަށް ހުއްދަ ނުދިނުމަށާއި އޭގެ ބަދަލުގައި ޔަހޫދީންނަށް ގަވާއިދާ ޚިލާފަށް ބިން ހިފައި ކޮންސްޓްރަކްޝަންގެ މަސައްކަތް ހިންގުމަށް ފުރުސަތު ދޭށެވެ. އަދި ފަލަސްތީނުގެ އިންސާނީ އެހީއަށް މަސައްކަތް ކުރާ ޖަމުއިއްޔާތައް މަނާކޮށް ފަލަސްތީނުގެ މަސްއޫލުވެރިންނަށް ދޭ ވީއައިޕީގެ ޚިދުމަތް ނުދީ ހުއްޓާލުމަށެވެ.
އިޒްރޭލުގެ މީޑިއާގައި ސެކިއުރިޓީ ކެބިނެޓްގެ މި ފިޔަވަޅުތައް ރިޕޯޓް ކުރަމުން ބުނެފައި ވަނީ ފަލަސްތީނުގެ ސަރަހައްދުތަކުގައި އިސްރާއީލުން އަމަލުކުރާ ގޮތާ ގުޅޭ ގާނޫނީ ރައުޔެއް ހޯދުމަށް ބައިނަލްއަގްވާމީ ކޯޓަށް ހުށަހެޅުމަށް އދން ނިންމި ނިންމުމާއި އިޒްރޭލާ ދެކޮޅަށް ބައިނަލްއަގްވާމީ ގާނޫނުގެ ބާރު ބޭނުން ކުރުމަށް ފަލަސްތީނު ސަރުކާރުން މަސައްކަތްކުރާތީ އެފިޔަވަޅު އަޅަން ނިންމީ ކަމަށެވެ.
ރާއްޖެއާއި އޯއައިސީގެ މެމްބަރުން ވަނީ ޔޫއޭއިއާއި ޗައިނާއާއި ގުޅިގެން އިޒްރޭލު ސެންސަރު ކުރުމަށް ސަލާމަތީ މަޖިލީހަށް ބަހުސް ކުރުމަށް ބުރާސްފަތި ދުވަހު މައްސަލަ ހުށަހަޅާފައެވެ. ނަމަވެސް އަލްޖަޒާއިރާއި މަޣްރިބާ ދެމެދު ޖެހުނު މައްސަލައެއްގެ ސަބަބުން އޯއައިސީން އިޒްރޭލާ ދެކޮޅަށް ސަލާމަތީ މަޖިލީހުގައި އިއްވަން އުޅުނު ބަޔާން އިއްވޭ ގިތެއް ނުވިއެވެ.
ސަލާމަތީ މަޖިލީހަށް އިސްލާމީ ގައުމުތަކުން މައްސަލަ ވެއްދީ ކުރިން ޓެރަރިސްޓެއްގެ ގޮތުގައި އެމެރިކާއިން ލޭބަލް ކޮށްފައިވާ ޔަހޫދީ ހައްދުފަހަނައަޅާފައިވާ ޓެރަރިސްޓް ރާބާއި މާއީރު ކާހާނާގެ ސަޕޯޓަރެއް ކަމަށްވާ މިހާރުގެ އިޒްރޭލުގެ ސެކިއުރިޓީ މިނިސްޓަރ އިޓާމާރު ބިން ޣަފީރް އަލްއަޤްސާގެ ހަރިއްމައަށް ވަނުމާ ގުޅިގެންނެވެ.
އިޒްރޭލުގެ ކެބިނެޓްގެ ނިންމުމަކީ ފަލަސްތީނުގެ އޮތޯރިޓީ ހަރުދަނާ ކުރުމަށް ކުރީގެ ސަރުކާރުތަކުން ކުރަމުން އައި މަސައްކަތް ހުއްޓާލުމަށް ނިންމި ނިންމުމެކެވެ. ކުރިން ފަލަސްތީނު ސަރުކާރު ވަަރުގަދަ ކުރުމަށް އިޒްރޭލުން އެހީތެރިވީ، ހަމާސްފަދަ ޖަމާއަތްތައް ވަރުގަދަ ވެދާނެތީ އެކަމާ ދެކޮޅަށެވެ. ނަމަވެސް މިފަހުން ވެރިކަމަށް އައި އިޒްރޭލު ސަރުކާރުގެ ބޮޑުވަޒީރުން ކަމަށްވާ ނަފްތާލީ ބެނެޓް އާއި ޔާއިރް ލަޕިޑް ގެ ތެރޭން އެކަކުވެސް ފަލަސްތީނުގެ ރައީސް މަހްމޫދު އައްބާސްއާ ބައްދަލު ކޮށްފައެއް ނުވެއެވެ. އަދި ދެ ދައުލަތުގެ ހައްލަށްޓަކައި ސުލްހައަށް އެއްވެސް މަސައްކަތެއްވެސ ކޮށްފައެއް ނުވެއެވެ.
އިޒްރޭލުގެ ސެކިއުރިޓީ ކެބިނެޓުން މިއަދު ނިންމި ނިންމުމުގައި ފަލަސްތީނުގެ ސަރުކާރަށް ޓަކައި އިޒްރޭލުން ބަލައިގަންނަ ޓެކްސް އާމްދަނީގެ ތެރެއިން 139 މިލިއަން ޝޭކަލް (39 މިލިއަން ޑޮލަރު) ހިފެހަހައްޓައި ފަލަސްތީނަށް ނުދިނުމަށް ނިންމުން ހިމެނެއެވެ.
އަދި އޮސްލޯ އެއްބަސްވުންތަކުގެ ދަށުން އިސްރާއީލުން މަދަނީ އަދި ސަލާމަތީ ގޮތުން ކޮންޓްރޯލް ކުރާ ސަރަހައްދުތަކުގައި ފަލަސްތީނު މީހުންނަށް އިމާރަތް ކުރިޔަ ނުދިނުމާއި ގަވާއިދާ ޚިލާފަށް ޔަހޫދީން އިމާރާތް ކުރުމަށް ހުއްދަ ދިނުން ހިމެނެއެވެ.
އަދި އދ އާއި ބައިނަލްއަގްވާމީ އެހެން މައިދާންތަކުގައި އިސްރާއީލަށް ދަތިކުރުމުގެ ފިޔަވަޅު އެޅުމަށް ކުރާ މަސައްކަތުގައި ބައިވެރިވާ ޕީއޭގެ އޮފިޝަލުންގެ ވީއައިޕީ ކަނޑާލުމަށްވެސް ނިންމާފައި ވެއެވެ. ފަލަސްތީނު މަސްއޫލުވެރިންނަށް ވިއައިޕީ ލިބުމުން އާންމުންނަށް ހުރަސް ނުކުރެވޭ ބައެއް ޗެކްޕޯސްޓްތަކުން އެމީހުންނަށް ދަތުރު ކުރެވެއެވެ. އަދި ބައެއްފަހަރު ކިޔޫ ޖެހޭ ތަންތާގައި އެމީހުން ކިއުގެ ކުރިއަށް ލުންވެސް ހިމެނެއެވެ. މިހާރު ނިންމާފައިވާ ގޮތުން ދެން މީގެ ފަހުން އެފަދަ ޚާއްސަ އިމްތިޔާޒެއް އެމީހުންނަށް ނޯންނާނެއެވެ.
މީގެ އިތުރުން ސަލާމަތީ ކެބިނެޓުން ނެރުނު ބަޔާނެއްގައި ބުނެފައި ވަނީ ހުޅަނގު އައްސޭރީގައި އިންސާނީ އެހީ ދިނުމުގެ ނިވަލުގައި އުޅޭ ޖަމާއަތްތަކުގެ މަސައްކަތް ހުއްޓުވުމަށެވެ.
ޔަހޫދީ ކާން ނިއުސްއަށް ހުކުރު ދުވަހު ދިން އިންޓަވިއުއެއްގައި އދ.ގައި ހުންނަ އިސްރާއީލުގެ ސަފީރު ގިލާޑް އެރްޑާން ފަލަސްތީނު ސަރުކާރު ސިފަކުރީ "އަހަރެމެންގެ ދުޝްމަނެއް" ކަމަށެވެ.
