ސްރީލަންކާގެ ކުރީގެ ރައީސް ގޮޓަބަޔާ ރާޖަޕަކްސާ އާއި އޭނާގެ އަނބިކަނބަލުން އިއޯމާ ރާޖަޕަކްސާ ދުބާއީގައި ޗުއްޓީ ހޭދަކުރުމަށް ފަހު ބުރާސްފަތި ދުވަހު އެނބުރި ވަޑައިގެންފިއެވެ.
ރާޖަޕަކްސާ އާއި އޭނާގެ އަނބިކަނބަލުން ދުބާއީ އިން ބުރާސްފަތި ދުވަހުގެ ހެނދުނު ބަންޑާރަނައިކަ އިންޓަނޭޝަނަލް އެއާޕޯޓަށް ވަޑައިގެންނެވި ކަމަށް އެއާޕޯޓް ޑިއުޓީގެ މެނޭޖަރާއި އެއާޕޯޓް އިމިގްރޭޝަން ޑިޕާޓްމަންޓުގެ ތަރުޖަމާނު ވަނީ ކަށަވަރުކޮށްދީފަ އެވެ.
އެ ދެބޭފުޅުން ވަޑައިގަތީ ދުބާއީން އެމިރޭޓްސްގެ އީކޭ-650 ފްލައިޓްގައެވެ.
ކުރިން ސްރީލަންކާގެ މީޑިއާއިން ބުނެފައި ވަނީ ރާޖާޕަކްސަ ފިއްލަވައިގެން އެމެރިކާއަށް ވަޑައިގެން އެމެރިކާގެ ރަށްވެހިކަން ހޯއްދެވުމަށް މަސައްކަތް ކުރައްވަމުން ގެންދަވާ ކަމަށެވެ.
ކުރީގެ ރައީސް ގައުމުން ފިއްލަވައިގެން ވަޑައިގަތީ އެގައުމުގެ އިގްތިސާދީ ދަތިކަމުގެ ސަބަބުން ރުޅިވެރި މުޒާހަރާތަކަށް ކެތގް ނުކުރެއްވިގެންނެވެ. އަދި އޭނާ އިސްތިއުފާ ދެއްވީ ހީނަރު އިގްތިސާދީ ދަތިކަމަށް ރުޅިއައިސްފައިވާ މީހުން އޭނާގެ އޮފީހާއި ގެކޮޅަށް ވަދެގަތުމުންނެވެ. ޖުލައި މަހުގެ 9 ވަނަ ދުވަހު ލަންކާގައި ވަނީ ރާޖަޕަކްސަ އިސްތިއުފާ ދެއްވުމަށް ގޮވާލައި ގިނަ އަދަދެއްގެ ހަރަކާތްތަކެއް ހިންގާފައެވެ.
