ސައުދީ ޕްރޯ ލީގުގައި މިރޭ، މަޝްހޫރު ކްރިސްޓިއާނޯ ރޮނާލްޑޯ ނުލައި އަލް ނަސްރުން އަލް ތައީ 2-0 އިން ބަލިކޮށް ތާވަލުގެ އެއްވަނަ މަގާމަށް ކުރިއަށް ޖެހިލައިފިއެވެ.
އަލް ނަސްރަށް ދެލަނޑުވެސް ކާމިޔާބު ކޮށްދިނީ ބްރެޒިލްގެ ފޯވާޑް ޓަލިސްކާއެވެ. ފުރަތަމަ ލަނޑު 42 ވަނަ މިނެޓުގައި އަދި ދެވަނަ ލަނޑު އޭނާ
ކާމިޔާބު ކޮށްދިނީ 47 ވަނަ މިނެޓުގައެވެ.
މިމޮޅާއެކު ތާވަލުގެ އެއްވަނައިގައި އަލް ނަސްރު އޮތީ މިހާތަނަށް ކުޅުނު 12 މެޗުން ހޯދި 29 ޕޮއިންޓާއެކުއެވެ. މިބާރަ މެޗުގެ ތެރެއިން ނަސްރު ބަލިވީ އެންމެ މެޗަކުންނެވެ. ދެވަނައިގައި 11 މެޗް ކުޅެގެން ހޯދި 25 ޕޮއިންޓާއެކު އޮތީ އަލް ޝަބާބެވެ.
ނަސްރަށް ކުރިއަށް އޮތީ މިމަހުގެ 14 ވަނަ ދުވަހު އަލްޝަބާބާ ދެކޮޅަށް ކުޅެން ޖެހޭ މެޗެވެ. މިމެޗުގައިވެސް ރޮނާލްޑޯއަށް ނުކުޅެވޭނެއެވެ. ދުނިޔޭގެ އެންމެ މުސާރަ ބޮޑު ކުޅުންތެރިޔާގެ ގޮތުގައި ނަސްރަށް މިދިޔަ ހަފްތާގައި ބަދަލުވި ރޮނާލްޑޯ މިވަގުތު ހުރީ 2 މެޗުގެ ސަސްޕެންޝަނެއްގައެވެ. އެއީ ސައުދީ ލީގަށް ރޮނާލްޑޯ ބަދަލުވުމުގެ ކުރިން، އިނގިރޭސި ޕްރިމިއަރ ލީގުގައި މިސީޒަނުގައި ސަޕޯޓަރެއްގެ ފޯނު ބިންމައްޗަށް ޖަހައި ހަލާކު ކޮށްލި މައްސަލައިގައި އިނގިރޭސި އެފްއޭއިން އޭނާއާ ދެކޮޅަށް އެޅި ފިޔަވަޅުގެ ސަބަބުންނެވެ.
މީޑިޔާ ބައެއް ރިޕޯޓުތައް ބުނާ ގޮތުން ނަސްރުގެ ޖާޒީގައި ރޮނާލްޑޯ ކުޅޭ ފުރަތަމަ މެޗަކަށް ވެގެންދާނީ މިމަހުގެ 22 ވަނަ ދުވަހު ލީގުގައި އަލް އިއްތިފާގާ ދެކޮޅަށް ނަސްރު ކުޅެން ޖެހޭ މެޗެވެ.
