އެއްޖިންސުން ގުޅުން ހިންގާ މީހުންގެ ރަމްޒީ ކުލަތައް ކީރިތި ޤުރުއާން ޗާޕް ކުރުމުގައި ބޭނުންކޮށްފައި ވުމުން އެ މުސްޙަފްތައް ނައްތާލައިފިއެވެ. އޭގެ އިތުރުން އެއްޖިންސުން ގުޅުން ހިންގާ މީހުންގެ ޝިއާރާއި ކުލަތައް ވަނީ ކުޑަ ކުދިންގެ ކުޅޭ ސާމާނުގައިވެސް ބޭނުން ކޮށްފައިވާ ކަމަށް ބޭޒާރު ވެފައެވެ.
އަލްޖަޒާއިރުގެ ސަރުކާރުން ވަނީ އެފަދަ އެއްވެސް ޝިއާރަކަށް އެގައުމުގައި ފިރުސަތު ނެތް ކަމަށް ބުނެ އެސާމާނުތައްވެސް ނައްތާލާފައެވެ.
އަލްޖަޒާއިރުގެ އައްނަހާރު ނޫހުގެ ރިޕޯޓެއްގައިވާގޮތުން އެއްޖިންސުން ގުޅުން ހިންގާ މީހުންގެ ކުލަތައް ފާޅުކަން ބޮޑު ގޮތެއްގައި ބޭނުންކޮށްގެން ޗާޕްކޮށް 4561 މުސްޙަފް ނެރެފައި ހުއްޓެވެ. އަދި އެއީ ބާޒާރުގެ އަގަށް ބަލާއިރު 4.5 މިލިއަން އަލްޖީރިއާ ދީނާރުގެ މުދާ ކަމަށްވެސް އެގައުމުގެ ޓްރޭޑް މިނިސްޓްރީން ބުނެއެވެ. އެހުރައި މުސްޙަފެއް ސަރުކާރުން ވަނީ ނައްތާލާފައެވެ.
އަލްޖަޒާއިރުގެ މިނިސްޓަރު އޮފް ޓްރޭޑް ކަމާލް ރިޒިގް ވިދާޅުވީ ކުޑަކުދިންނަށް ހާއްސަކޮށްގެން އުފައްދާފައިވާ ކުޅޭ ސާމާނާއި ސްކޫލު އައިޓަމްތަކުގެ 38،000 އަށް ވުރެ ގިނަ ސާމާނު ސަރުކާރުން އަތުލައިގަތް ކަމަށް ވިދާޅުވެފައެވެ.
އެއްޖިންސުން ގުޅުން ހިންގުމަކީ އަލްޖަޒާއިރުގައި ޖިނާއީ ކުށެކެވެ. އެއްޖިންސުން ގުޅުން ހިންގުމުގެ އަދަބަކީ ދެ އަހަރަށް ޖަލަށް ލުމެވެ.
