ސްޕެނިޝް ލަލީގާގައި ރޭ ރެއާލް މެޑްރިޑް އަތުން 1-2 އިން ވިޔަރެއާލްއަށް ލިބުނީ ހައްގު މޮޅެއް ކަމަށާއި ރެއާލް ފެނުނީ ޑިފެންސާއި މެދުތެރެ ދަށްކޮށް ކަމަށް އެކްލަބުގެ ކޯޗް ކާލޯ އަންޗެލޮއްޓީ ބުނެފިއެވެ.
މެޗަށްފަހު އޮތް ނޫސްވެރިންގެ ބައްދަލުވުމުގައި އިތުރަށް ވާހަކަ ދައްކަމުން އަންޗެއްލޮޓީ ބުނީ ޖުމްލަކޮށް އޭނާގެ ޓީމަށް ހިތްހަމަ ޖެހޭވަރުގެ ކުޅުމެއް ނުދެއްކުނު ކަމަށެވެ. "އަހަރެމެން އާދެވެގެން ކުޅޭ ކުޅުމެއް ނޫން މިމެޗުގައި ފެނުނީ. ވިޔަރެއާލްއިން ގިނަ ބޯޅަތަކެއް ވަރަށް ފަސޭހަކޮށް އަހަރެމެންގެ ޑިފެންސްލައިން ތެރޭގައި ކުޅެލި. އަހަރެމެންގެ މެދުތެރެ އާއި ޑިފެންސާ ދެމެދު ގުޅުމެއް ނެތް. ކުރިއަށް ހުރި މެޗުތަކުގައި މިކަން ރަނގަޅު ކުރަން ޖެހޭ" މިދިޔަ ސީޒަނުގައި ލަލީގާ އާއި ޗެމްޕިއަންސް ލީގް ރެއާލްއަށް ކާމިޔާބު ކޮށްދިން ކޯޗް އަންޗެލޮއްޓީ ބުންޏެވެ.
ވިޔަރެއާލްގެ ކޯޗް އަދި ކުރިން ބާސެލޯނާއަށް އިރުޝާދުދިން ސެޓިއެން ބުނީ މެޗް ފެށުނީވެސް ރަނގަޅުކޮށް ކަމަށެވެ. "އަހަރެމެން ނިކުތީ ވަރަށް ބޮޑަށް ޕްރެސް ކޮށްގެން ކުޅެން. މެޗުގެ ފުރަތަމަ މިނެޓުން ފެށިގެން ޕްރެސްކޮށްގެން ކުޅުމުގެ ނަތީޖާ މިފެނުނީ. އެއީ ރެއާލްއަށް ކުޅެން ފުރުސަތު ދީގެން ތިބިވިއްޖެނަމަ ނަތީޖާ ގޯސްވާނެތީ. ލަނޑު ޖަހަން ގިނަ ފުރުސަތުތަކެއްސް އަހަރެމެންނަށް ހޯދުނު. ރެއާލްއަށް އަހަރެމެންގެ ގޯލަށް ނުރައްކާ ކުރެވުނީ ވަރަށް މަދު ހާލަތެއްގައި" ސެޓިއެއް ބުންޏެވެ.
ރެއާލް ބަލިވުމުން އެންމެ ބޮޑު ހިތްހަމަ ޖެހުމެއް ލިބޭނީ، ތާވަލުގެ އެއްވަނައިގައި އޮތް ވާދަވެރި ބާސެލޯނާއަށެވެ. ބާސާ އާއި ރެއާލްއަށްވެސް 38 ޕޮއިންޓް ލިބިފައިވާއިރު، ބާސާއަށްވުރެ އިތުރަށް އެއްމެޗް ރެއާލް ވަނީ ކުޅެފައެވެ. މިރޭ ރާއްޖޭ ގަޑިން ދަންވަރު 1:00 ގައި އެތުކެޓިކޯ މެޑްރިޑުގެ ދަނޑުގައި ބާސާ އާއި އެތުލެޓިކޯ މެޑްރިޑް ބައްދަލު ކުރާނެއެވެ. މިމެޗުން ބާސާ މޮޅުވެއްޖެނަމަ ތާވަލުގެ ކުރީގައި ތިން ޕޮއިންޓުގެ ލީޑެއް ލިބޭނެއެވެ.
