ގާތްގަނޑަކަށް 20 އަހަރު ފަހުން ބްރިޓިޝް އެއާވޭސް އިން ވަނީ ކެބިން ކުރޫންގެ ޔުނީފޯމް އަޕްގްރޭޑްކޮށްފައެވެ. މިހާރު ބްރިޓިޝް އެއަރވޭޒްގައި މުސްލިމު އަންހެނާއަށް ހިޖާބު އަޅައިގެން އެއަރހޮސްޓެސްއެއްގެ ގޮތުގައި މަސައްކަތް ކުރެވޭނެއެވެ.
ބްރިޓިޝް އެއާވޭސް އިން ތައާރަފްކުރި އާ ޔުނީފޯމް ކަލެކްޝަނެއްގައި ފިރިހެނުންނަށް ތިން ޕިސް ސޫޓެއް އަދި އަންހެނުންނަށް ހެދުމާއި ސްކާޓާއި ޓްރައުޒަރުގެ އިތުރުން ޖަމްޕްސޫޓާއި ޓިއުނިކް އަދި ހިޖާބު އެޅުން ހުއްދަކޮށް އޭގެ ޑިޒައިން ހާމަކޮށްފައި ވެއެވެ.
އިނގިރޭސިވިލާތުގެ ފެޝަން ޑިޒައިނަރު އޮޒްވާލްޑް ބޯއެޓެންގް ފަރުމާކޮށްފައިވާ މި އާ ކަލެކްޝަން ފަރުމާ ކުރުމުގެ މަސައްކަތްތައް ކުރަމުން އަންނަތާ ފަސް އަހަރު ވެފައިވެއެވެ. މިމަސައްކަތް ލަސްވީ ކޮވިޑާ ހެދިއެވެ.
50 ވޯކްޝޮޕެއްގައި 1،500 އަށް ވުރެ ގިނަ މީހުން މި ޑިޒައިނިންއާއި އުފެއްދުމުގެ ބައިވެރިވެފައިވާއިރު، ފާއިތުވި ހަ މަސް ދުވަހު ބްރިޓިޝްއެއަރވޭޒްއިން ވަނީ ސިއްރުން ކާގޯ ފްލައިޓްތަކުގައި އެ ޔުނިފޯމްތައް ޓެސްޓްކޮށްފަ އެވެ.
އައު ޔުނިފޯމް ރަސްމީކޮށް އަޅަން ފަށާނީ 2023 ވަނަ އަހަރުގެ އޭޕްރީލް މަހުން ފެށިގެންނެވެ. އެއިރުން އެއާލައިންގެ 30،000 އަށް ވުރެ ގިނަ މުވައްޒަފުން މި އާ ޔުނީފޯމް އަޅާނެ އެވެ.
ބްރިޓިޝް އެއާވޭޒްގެ ޗެއާމަން އަދި ޗީފް އެގްޒެކެޓިވް ޝޯން ޑޮއިލް ވިދާޅުވީ، އައު ޔުނީފޯމަކީ އެ އެއަރލައިންގެ ބްރޭންޑްގެ ނިޝާނެއް ކަމަށެވެ. އަދި އެއީ މިހާރުގެ އިނގިރޭސިވިލާތް ތަމްސީލުކުރާނެ އަދި ކަސްޓަމަރުންނަށް އަޖައިބު ކުރުވަނިވިފަދަ އަސްލު އިނގިރޭސި ޚިދުމަތެއް ފޯރުކޮށްދިނުމަށް އެހީތެރިވެދޭނެ ހެދުމެއް ކަމަށް ދެކޭ ކަމަށެވެ.
