އެންމެ ޒަމާންވީ އެއް ހަޟާރާ ކަމުގައިވާ ފާރިސްކަރައިގެ ޙަޟާރާ ފަނޑުކޮށް ލެވިދާނެ ހެއްޔެވެ؟ ކާމިޔާބު ކޮންމެ މުސްލިމު މުޖުތަމައެއްގައި ހުޅަނގުގެ ހަސަދަވެރިކަން ފެނިގެން ދަނީ އެތަނެއް ސުންނާފަތިވެ ހަލާކުވެގެންދާ ފަހުންނެވެ. އަލަތު ކައިވެންޏާއެކު ފްލެޓް ލިބި ދެމަފިރިންނަށް ފައިސާގެ ބޯނަސްއާއި ހަދިޔާތައް ދިން ލީބިޔާއަށް ހަދާލީ ކިހިނެއް ހެއްޔެވެ؟ މިހާރު އެއީ ސަލާން ޖަހާ ބިކަ އާބާދީއެކެވެ. ތެލުގެ މުއްސަނދިކަމުން ފުދިގެން އަރަބި ދުނިޔޭގެ އެންމެ މޮޅު ސައިންޓިސްޓުންނާއި ތައުލީމީ ޖީލެއް ބިނާ ކުރި އިރާގުގައި ޚުޝާމަދު ކުރާ ބޭރުގެ ނޫސްވެރިންނަށް ހަދިޔާއަކަށް ދެމުން ދިޔައީ މަރސީޑިސް ބެންޒު ކާރެވެ. މިހާރު އެގައުމުގެ ހާލަކީ ކޮބައި ހެއްޔެވެ؟
މާސާ އަމީނީ ބުރުގާ ނޭޅުމުގެ ސަބަބުން އީރާނުގެ އަޚުލާގު ބަލަހައްޓާ ފުލުހުން އަނިޔާ ކުރުމުން އޭނާ މަރުވީ ޕޮލިސް ސްޓޭޝަނެއްގައި ކަމަށް ރިޕޯޓް ކޮށްފައި ވެއެވެ. އެހާދިސާއަށް ފަހު ލިބުނު ހިތް ވަރާއެކު މީހުން ގެންދަނީ އީރާނުގެ ދަންނަ ބޭކަލުންގެ ފަގުޑި މަގުމައްޗަށް ހޫރާލަމުންނެވެ. އެކަމަކު ހަގީގަތަކީ އީރާނާ ދެކޮޅަށް މީޑިއާއިން ދައްކާ ވަރަށް ވުރެން އަދި ހުޅަނގުގެ އަންހެނުންނަށް ވުރެން އީރާނުގެ އަންހެނުންގެ ހާލަތު މުޖުތަމައުގައި ރަގަޅު ކަމެވެ. ތެދެކެވެ! އަންހެނުންނަށް ބިކިނީއާއި ކުރު ހެދުން ލައިގެން އުޅުމާއި ބާރތަކަށް ގޮސް ގައިގޯޅިވެ ޑާންސް ކުރުމަށް ހުއްދައެއް ނޯވެއެވެ.
އީރާނުގައި އަންހެނުންގެ ތައުލީމު:
ލިޓަރޭސީ މޫވްމަންޓް އޮގަނައިޒޭޝަންގެ ރިޕޯޓެއްގައިވާ ގޮތުން އީރާނުގައި ލިޔަން ކިޔަން ދަންނަ އަންހެނުންގެ ނިސްބަތަކީ ހުޅަނުގެ ގައުމުތަކަށް ވުރެން މަތީ ނިސްބަތެކެވެ. އެއީ އީރާންގެ ނުވަދިހަ އިންސައްތަ އަންހެނުންނަށް ލިޔަންކިޔަން އެނގެއެވެ.
މެޑިކަލް ޔުނިވަރސިޓީތަކުގެ ފެކަލްޓީ މެމްބަރުންގެ ގޮތުގައި އީރާނުގައި 34 ޕަސެންޓަށް އަންހެނުން ހިމެނެއެވެ. ސަރުކާރު ޔުނިވަރސިޓީތަކުގެ 56 ޕަސެންޓަކީ އީޜާންގައި އަންހެން ދަރިވަރުންނެވެ. އީރާނުގައި 9500 އަންހެން ލިޔުންތެރިންނާއި 840 އަންހެން ޕަބްލިޝަރުން އެބަތިއްބެވެ.
އީރާންގެ އަންހެނުންގެ ސިއްހަތު:
އީރާނަކީ ރަހިމުގެ ކެންސަރު ޖެހިގެން އެންމެ މަދުން މީހުން މަރުވާ އެއް ގައުމެވެ. ދުނިޔޭގެ ގިންތި ކުރުމުގައި އީރާން އޮތީ އަންހެނުންގެ ސިއްޙީ ދާއިރާގައި 10 ވަނައިގައެވެ. އަންހެނުންގެ އެވަރެޖު އުމުރު 78 އަހަރަށް އިތުރުވެފައި ވެއެވެ. އަދި ކޮންމެ 100،000 ވިހެއުމުގެ ތެރޭގައި ޅަފަތުގައި މަރުވާ އުޅެނީ 8.2 ޕަސެންޓަށް ދަށް ކުރެވިފައިވެ އެވެ.
އީރާނުގެ ހުރިހާ ޑޮކްޓަރުންގެ ތެރޭން 40 ޕަސެންޓަކީ އަންހެން ޑޮކްޓަރުންނެވެ. އަދި ހުރިހާ ސްޕެޝަލިޓީ ޑޮކްޓަރިންގެ 30 ޕަސެންޓަކީ އަންހެނުންނެވެ. ގައިނެކޮލޮޖިކަލް ސާޖަނުންގެ ނިސްބަތަކީ 98 އިންސައްތައެވެ. އަދި ވިއްސާ ޑޮކްޓަރުންގެ 95 ޕަސެންޓަކީ އަންހެނުންނެވެ.
އީރާން އަންހެނުން ވިޔަފާރިވެރިކަމުގައި:
އީރާންގެ ގައުމީ އިގްތިސާދަށް ވިޔަފާރިވެރިންގެ ގޮތުގައި އަންހެނުން ވަރަށް ބޮޑަށް ޙިއްޞާއެއް އަދާ ކުރެއެވެ. ނޮލެޖް ބޭސްޑް ކުންފުނިތަކުގައި މެނޭޖިން ޑިރެކްޓަރުންގެ ގޮތުގައި 735 އަށް ވުރެ ގިނަ އަންހެނުން މަސައްކަތް ކުރަމުންދެއެވެ. އަދި އެފަދަ ކުންފުނިތަކުގައި ފައުންޑަރ ޑިރެކްޓަރުންގެ ގޮތުގައި 250 އަށް ވުރެ ގިނަ އަންހެނުން މަސައްކަތް ކުރެ އެވެ. އޭގެ އިތުރުން 2390 އަށް ވުރެ ގިނަ އަންހެނުން ނޮލެޖް ބޭސްޑް ކުންފުނިތަކުގެ ޑިރެކްޓަރުންގެ ބޯޑުގައި ހިމެނެއެވެ.
ސަރުކާރުން ދަނީ އަންހެނުންނަށް ޚާއްޞަކޮށްގެން ނޭޝަނަލް އެމްޕްލޯއިމަންޓް އެމްޕަވަރމަންޓް ޕްލޭނެއް ތަންފީޒު ކުރަމުންނެވެ. ރަށްފުށުގެ އަންހެނުންނާއެކު އަންހެނުންނަށް ސޯޝަލް ސެކިއުރިޓީ އިންޝުއަރެންސް ކަވަރޭޖް ލިބެ އެވެ. ރަށްފުށުގެ އަންހެނުންނަށް 1200 ބިލިއަން ރިޔާލްގެ ކްރެޑިޓް ސްކީމެއް ސަރުކާރުން ތައާރަފް ކޮށްފައި ވެއެވެ. އަދި 4200 އަށް ވުރެ ގިނަ މައިކްރޯ ކްރެޑިޓް ފަންޑު އަންހެުންނަށް ޓަކައި ހުޅުވާފައި ވެއެވެ. އަދި ގޭގައި ތިބޭ އަންނެހުންނަށްވެސް ސޯޝަލް ސެކިއުރިޓީ އިންޝުއަރެންސް ކަވަރޭޖް ލިބޭ ގޮތަށް ހަދާފައިވެއެވެ.
އީރާން މީޑިއާގައި އަންހެނުންގެ ދައުރު:
އީރާނުގެ އަންހެނުން ވަނީ މީޑިއާ އާއި ފިލްމު އުފެއދުމުގެ ސިނާއަތުގައި ކުރި ހޯދާފައެވެ. އަންހެން ފިލްމު އުފައްދާ ފަރާތްތަކުން ބާއްވާ މަޝްހޫރު ފެސްޓިވަލްތަކުން އީރާން އަންހެނުން ވަނީ ގައުމީ އަދި ބައިނަލްއަގްވާމީ 128 އެވޯޑެއް ހޯދާފަ އެވެ. އީރާން އަންހެނުން ވަނީ ބައިނަލްއަގްވާމީ 45 ފިލްމު ފެސްޓިވަލެއްގައި ޖޫރީންގެ ގޮތުގައި މަސައްކަތް ކޮށްފައެވެ. ފިލްމީ ދާއިރާގައި 903 އަންހެން ފިލްމު ޕްރޮޑިއުސަރުން ތިބިއިރު، ކެމެރާތަކުގެ ފަހަތުގައި 2000 އަށް ވުރެ ގިނަ އަންހެން ސްޕެޝަލިސްޓުން ހަރަކާތްތެރިވެއެވެ.
އީރާންގެ ކުޅިވަރުގައި އަންހެނުން:
އޮލިމްޕިކް އަދި ޕެރަލިމްޕިކް ކޯޓާތަކެއް ހޯދުމުގެ އިތުރުން ބައިނަލްއަގްވާމީ ކުޅިވަރު އިވެންޓްތަކުން އީރާނުގެ އަންހެނުން ވަނީ 3302 މެޑަލް ހޯދާފައެވެ. ދުނިޔޭގެ އެކި ކަންކޮޅުތަކުގައި ކުޅިވަރު ފެޑެރޭޝަންތަކުގެ ބައިނަލްއަގްވާމީ 97 ގޮނޑިއެއް އީރާނުގެ އަންހެނުންނަށް ލިބިފައިވެ އެވެ. އީރާނުގައި އެކި ކުޅިވަރު ފެޑެރޭޝަންތަކުގައި 51 އަންހެން ރައީސުންނާއި ނައިބު ރައީސް ތިބޭއިރު ގައުމުގެއެކި ޕްރޮވިންސްތަކުގެ ކުޅިވަރު އެސޯސިއޭޝަންތަކުގެ އިސްވެރިންގެ ގޮތުގައި 70 އަންހެނުން ދަނީ މަސައްކަތް ކުރަމުންނެވެ. އަދި 16111 ޖިމެއް އަންހެނުން ބޭނުން ކުރަން ލިބެން ހުރެއެވެ.
އީރާންގައި ނިންމުންތައް ނިންމުމުގައި އަންހެނުން:
އީރާންގެ ޕލަމެންޓަކީ އިސްލާމީ ދުނިޔޭގައި އެންމެ ފުރަތަމައަށް ލައިވްކޮށް ޕާލަމެންޓް ޖަލްސާތައް ދުރަށް ފޮނުވަން ފެށި ޕާލަމެންޓެވެ. އީރާންގެ ޕާލަމެންޓްގެ 11 ވަނަ ދައުރުގައި މަޖިލީހަށް ވަން އަންހެން ކެންޑިޑޭޓުންގެ އަދަދު 227 (ދުއިސައްތަ ހަތާވީސް) ޕަސެންޓަށް އިތުރުވެފައި ވެއެވެ. މިއީ ފުރަތަމަ ދައުރުން ފެށިގެން މިހާތަނަށް އައިއިރު އަންހެން މެންބަރުން 16.5 ގުނައަށް އިތުރުވި އަދަދެކެވެ. އޭގެ އިތުރުން އީރާނުގައި އަންހެނުންނަކީ އެންމެ މަތީ، މެދު އަދި އެގްޒެކެޓިވް މަގާމުތައް ހިމެނޭ ގޮތަށް ހުރިހާ ފެންވަރެއްގައި ސަރުކާރުގެ އިދާރާތަކުގައި ހަރަކާތްތެެރިވާ ބައެކެވެ. ހުރިހާ މަގާމުތަކެއްގައި އަންހެނުންގެ ނިސްބަތް 25.2 ޕަސެންޓަށް އަރައެވެ. އަދި އީރާންގައި ފަނޑިޔާރުންގެ ގޮތުގައި 1000 އަށް ވުރެ ގިނަ އަންހެން ގާޟީން މަސައްކަތް ކުރެއެވެ. އަދި ތިމާވެށީގެ ދާއިރާއިން މަތީ ފެންވަރުގެ އެގްޒެކެޓިވް މަގާމުތަކުގައި އަންހެނުންގެ ނިސްބަތް 25 ޕަސެންޓަށް އަރައެވެ.
