ޕާކިސްތާނުން މި މަހު 159 ކޮންޓެއިނަރުގެ ހަތިޔާރާއި ވަޒަން ޔޫކްރޭނަށް ފޮނުވަން ރާވާފައިވާ ކަމަށް މީޑިއާއިން ރިޕޯޓް ކުރެއެވެ. އެ ސާމާޏު ޕާކިސްތާނުން ޔުކްރެއިންއަށް ފޮނުވާނީ ޕޮލެންޑްގެ ބަނދަރެއް މެދުވެރިކޮށް ކަމަށްވެސް ރިޕޯޓްގައި ބުނެއެވެ.
މީޑިއާ ރިޕޯޓްތައް ބުޏާ ގޮތުން ޕާކިސްތާނުގެ ޝިޕިން ކުންފުންޏެއް ކަމަށްވާ ޕްރޮޖެކްޓް ޝިޕިން އިން ޖެނުއަރީ މަހުގެ މެދުތެރޭގައި ކަރާޗީ ބަނދަރުން ޕޮލެންޑްގެ ގްޑަންސްކް ބަނދަރަށް މި 159 ކޮންޓެއިނަރުގެ ވަޒަން ބޭރުކުރާނެއެވެ.
ޕާކިސްތާނުން ވަނީ މީގެ ކުރިންވެސް އިނގިރޭސިވިލާތުގެ ކުންފުންޏެއްގެ އެދުމަށް ޔޫކްރޭނަށް ހަތިޔާރު ހޯދައި ދިނުމުގައި ވަރަށް މުހިންމު ދައުރެއް އަދާކޮށްފައެވެ. ޔޫކްރޭންއާ ބޯޑަރުވާ އިރުމަތީ ޔޫރަޕްގެ ބައެއް ގައުމުތަކުގައި ހުންނަ ޑިފެންސް ކުންފުނިތައް ވެސް ވަނީ ޕާކިސްތާނުން އުފައްދާ އަސްކަރީ ސާމާނު ޔުކްރެއިންއަށް އެތެރެ ކޮށްދިނުމަށް އެހީވުމަށް ނިންމާފައެވެ. ބެލެވެ ގޮތުގައި ޕާކިސްތާނުން އެހީވެދިނުމުން ޕާކިސްތާންގައި ބޭނުން ކުރާ އެމްއައި 17 މަރުކާގެ ހެލިކޮޕްޓަރުތައް މަރާމާތުކޮށް އަޕްގްރޭޑް ކުރުމަށް ޔުކްރެއިން އިން އެހީވެދޭނެއެވެ.
އިސްލާމްއާބާދުގައި ހުންނަ ހަތިޔާރު ސަޕްލައިކުރާ ކުންފުނި ޑީއެމްއައި އެސޯސިއޭޓްސް އިން ދަނީ އިރުމަތީ ޔޫރަޕްގެ ޑިފެންސް ކުންފުނިތަކާ ގުޅިގެން ޔޫކްރޭންގެ ސިފައިން ދޭ އޯޑަރުތައް ބަލައިގަނެ ހަތިޔާރު ސަޕްލައި ކުރުމުގެ މަސައްކަތް ކުރަމުންނެވެ.
ޔޫކްރޭނާއި ޕާކިސްތާނާ ދެމެދު އަސްކަރީ އަދި ސިނާއީ ގޮތުން ގާތް ގުޅުމެއް އުފެދިފައި ވެއެވެ. ޕާކިސްތާނުން ވަނީ ޔޫކްރޭންގެ 320 އަށް ވުރެ ގިނަ ޓީ-80ޔޫޑީ ޓޭންކް ގަނެފަ އެވެ. އަދި އެ ޓޭންކްތައް ބެލެހެއްޓުމާއި ބޭނުންކުރުމާއި ވަޒަން އަދި ސްޕެއާ ޕާޓްސް ބަދަލުކުރުމުގައި ދެފަރާތުގައި ބަދަހި ގުޅުމެއް އުފެދިފައި ވެއެވެ.
1991 އާއި 2020 އާ ދެމެދު ޔޫކްރޭނުން ވަނީ ޕާކިސްތާނާ އެކު ގާތްގަނޑަކަށް 1.6 ބިލިއަން ޑޮލަރުގެ ހަތިޔާރުގެ ކޮންޓްރެކްޓްތައް ހަދާފަ އެވެ. ރިޕޯޓްތައް ބުނާ ގޮތުގައި އިސްލާމްއާބާދުން ވަނީ 85.6 މިލިއަން ޑޮލަރު ހަރަދުކޮށްގެން ޓީ-80ޔޫޑީ ޓޭންކް ފްލީޓް މަރާމާތު ކުރުމަށް އެއްބަސްވުމެއްވެސް ހަދާފަ އެވެ.
