އެމެރިކާގެ މިނިސޯޓާގެ ހެމްލައިން ޔުނިވާސިޓީގެ ޕްރޮފެސަރަކު ކުލާހުގައި ކީރިތި ރަސޫލާ ދައްކާ ކުރެހުމެއް ކަމަށް ބުނެ ކުރެހުމެއް ދެއްކުމާ ގުޅިގެން ވަޒީފާއިން ވަކިކޮށްފިއެވެ. އުމުރުން 42 އަހަރުގެ ޕްރޮފެސަރ އެރިކާ ލޮޕޭޒް ޕްރެޓާ ހެމްލައިން ޔުނިވާސިޓީގެ ވަޒީފާއިން ވަކިކުރީ 14 ވަނަ ގަރުނުގެ ކުރެހުމެއް ކުލާހަށް ދެއްކުމުން، މުސްލިމު ދަރިވަރުން މައްސަލަ ޖެއްސުމާ ގުޅިގންނެވެ.
އޭނާ ވަޒީފާއިން ވަކިކޮށްފައިވަނީ ހަރުކަށި ޚިޔާލުގެ މީހުންގެ ފިކުރަށް ޔުނިވަރސިޓީން ތަބާވެގެން ކަމަށް މައްސަލަ ޖައްސާ ފަރާތްތަކުން ވަނީ ޕްރޮފެސަރގެ ސަޕޯޓްގައި އޮންލައިން ޕެޓިޝަނެއް ފަށާފައެވެ. 10 ހާސް ސޮއި ބޭނުންވާ މި ޕެޓިޝަނަށް މިހާތަނަށް އަށް ހާސް ސޮއި ލިބިފައި ވެއެވެ.
