އަފްޣާން މުސްލިމުންގެ 25 މީހުން މަރާލި ކަމަށ ްބުނެ އިނގިރޭސި އަމީރު ހެރީ ފޮނި ކެނޑުމުން އޭނާ އަމިއްލަ ސަލާމަތަށް ނުރައްކާ ކޮށްލީކަމަށް އިނގިރޭސި ސިފައިންގެ އޮފިސަރުން ބުނެއެވެ. ދަ ސަންއާ ވާހަކަ ދައްކަމުން އިނގިރޭސި ކާނަލް ރިޗާޑް ކެމްޕް ބުނީ ހެރީ އަމިއްލައަށް އެހެރީ އަމާޒުފަތްގަނދަކަށް ވެގެންފައި ކަމަށެވެ.
އަފްޣާނިސްތާނުގެ ހެލްމަންދު ޔުނިވަރސިޓީގައި ޒުވާނުން ވަނީ ހެރީގެ ފޮނި ކެނޑުމާ ދެކޮޅަށް މުޒާހަރާ ކޮށްފައެވެ. އަދި އޭނާ މަރާފައިވާ މީހުންނަށް ބަދަލު ލިބެން ޖެހޭނެ ކަމަށް މުޒާހަރާ ކުރި ޒުވާނުންނާއި ހެލްމަންދްގެ ސަރުކާރުން ބުނެއެވެ.
އިނގިރސިވިލާތުގެ ހަރުކަށި ދީނީ މީހެއް ކަމަށްވާ އަންޖުމް ޗައުދަރީވެސް ވަނީ ހެރީގެ ފޮނިކެނޑުން ކުށްވެރިކޮށްފައެވެ. އަންޖުމް ޗައުދަރީ ބުނެފައި ވަނީ ހެރީގެ ފޮނިކެނޑުމަކީ އިންޒާރުގެ ރަނގަބީލެއް ކަމަށެވެ. އަދި އޭނާ ސިފަ ކުރި ގޮތުގައި ހެރީއަކީ މުސްލިމުންގެ ގާތިލެކެވެ.
"ހަގީގަތުގައި އިނގިރޭސި ޝާހީ އާއިލާއަކީ މުސްލިމުންގެ ބިން ހިފުމާއި، މުސްލިމު ގައުމުތަކުގެ ވަސީލަތްތައް ފޭރިގަތުމައި، މުސްލިމުންނަށް އަނިޔާކުރުމަށް ވާގިވެރިވުމުގެ ދިގު އަދި އަނދިރި ތާރީހެއް އޮތް އާއިލާއެކެވެ." އަންޖުމް ޗައުދަރިއާ ހަވާލާދީ މީޑިއާއިން ރިޕޯޓް ކޮށްފައި ވެއެވެ.
"އެމެރިކާ، އިނގިރޭސިވިލާތް އަދި އެހެނިހެން ގައުމުތަކުން ކުރި ނުލަފާ ކަންތައްތަކުގެ ތެރޭގައި ހަތިޔާރު ނެތް މައުސޫމް މުސްލިމުން ތަކުރާރުކޮށް މަރާލާކަން މިހާރު އެނގެއެވެ." އޭނާއާ ހަވާލާދީ ބުނެފައި ވެއެވެ.
