ވޭލްސް ގައުމީ ޓީމުގެ ކެޕްޓަން ގެތަރު ބޭލް ފުޓްބޯޅަ ކުޅުން ހުއްޓާލިކަން ރޭ އިއުލާން ކޮށްފިއެވެ.
ޓޮޓެންހަމް ހޮސްޕާއިން ވިދާލުމަށްފަހު ސްޕެއިނުގެ ރެއާލް މެޑްރިޑަށް ބަދަލުވެ އެކްލަބާއެކު ޗެމްޕިއަންސް ލީގް 5 ފަހަރު ކާމިޔާބު ކުރި ބޭލް،33، ކުޅުން ހުއްޓާލިއިރު ކުޅެމުންދިޔައީ އެމެރިކާ މޭޖަރ ސޮކަރ ލީގުގެ ލޮސް އެންޖެލިސް އެފްސީއަށެވެ.
ބޭލް، ރެއާލްއަށް ބަދަލުވީ 2013 ވަނަ އަހަރުއެވެ. އެކަމަކު އެޓީމުގައި އޭނާއަށް ކުޅެން މާގިނަ ފުރުސަތެއް ނުލިބެއެވެ. ކޯޗުންނާއި މައްސަލަ ޖެހުމާއި ކްރިސްޓިއާނޯ ރޮނާލްޑޯގެ ހިޔަނީގައި ރެއާލްގައި ބޭލް ގިނަ ދުވަސްތައް ހޭދަކުރަން ޖެހުނީ ބެންޗާއި ބެޗުން ބޭރުގައެވެ. ރެއާލްގައި ހޭދަކުރި 10 އަހަރު ތެރޭގައި ރެއާލްއަށް ކުޅެން އޭނާއަށް ފުރުސަތު ލިބުނީ 176 މެޗެވެ. މިމެޗުތަކުގައި އޭނާ ވަނީ 81 ލަނޑު ކާމިޔާބު ކޮށްފައެވެ. ރެއާލްގެ ކޯޗުން ބޮޑަށް ބޭލްގެ ބޭނުން ހިފާފައި ވަނީ ފައިނަލް މެޗުތަކުގައެވެ. ހާއްސަކޮށް ޗެމްޕިއަންސް ލީގް ފައިނަލް މެޗުތަކުގައެވެ. މީގެ ތެރެއިންވެސް އެންމެ ފާހަގަ ކޮށްލެވެނީ 2018 ވަނަ އަހަރު ޗެމްޕިއަންސް ލީގް ފައިނަލުގައި ބަދަލު ކުޅުންތެރިއެއްގެ ގޮތުގައި އަރައި ލިވަޕޫލް ކޮޅަށް ހިތްގައިމު ދެލަނޑު ކާމިޔާބު ކޮށްދިނުމެވެ. އޭރު ދެޓީމު އޮތީ 1-1 އިން އެއްވަރުވެފައެވެ.
ބޭލް ވަނީ ވޭލްސް ގައުމީ ޓީމަށް 111 މެޗް ކުޅެދީ 42 ލަނޑު ކާމިޔާބު ކޮށްދީފައެވެ. ވޭލްސް ގައުމީ ޓީމާއެކު އޭނާ ވަނީ އެންމެފަހުގެ ވަރލްޑް ކަޕުގައިވެސް ކުޅެފައެވެ.
