މިއަދާ ހަމައަށް ހުޅަނގު ޔޫރަޕުން އުޅެ އުޅެ އަމިއްލައަށް ސެޓެލައިޓެއް ޖައްވަކަށް ނު ފޮނުވުނެވެ. އެންމެ ފަހުން އިނގިރޭސިވިލާތުގެ ކޮރްނޯލް އިން އިއްޔެ ކުރި މަސައްކަތްވެސް ވަނީ ނާކާމިޔާބު ވެފައެވެ.
ވާޖިން އޯބިޓް އިން ރާވާފައި ވަނީ އެކުންފުނިން ތައްޔާރުކޮށްފައިވާ ބޯއިން 747ގެ މަތންދާބޯޓެއްގެ ފިޔަގަނޑުގެ ދަށުން ރޮކެޓެއް އުދުއްސާ ލުމަށެވެ.
ކޮސްމިކް ގަރލްގެ ނަމުން ނަންދިން މަތިން ދާބޯޓުން ފޮނުވާލި ރޮކެޓް ވަނީ ހިސާބަކުން އޭގެ ބޫސްޓާ މަސައްކަތް ނުކޮށްގެން ދުނިޔޭގެ ޖައްވުން ބޭރުވާން ނުކުޅެދިގެން ވެއްޓިފައެވެ.
ހުޅަނގު ޔޫރަޕުން ވަނީ ޑިސެމްބަރު މަހުގެ ފަހުކޮޅުވެސް ފްރެންޗް ގަޔާނާއިން ރޮކެޓެއް ފޮނުވުމަށް މަސައްކަތް ކޮށްފައެވެ. އިޓަލީގައި އުފެއްދި ވެގާ-ސީ ރޮކެޓްގެ މިޝަންވެސް ނާކާމިޔާބު ވެގެން ދިޔައީއެވެ. ވޭތުވެދިޔަ އަހަރު ޔޫރަޕަށް ގިނަ ނާކާމިޔާބީތަކެއް ކުރިމަތިވެފައިވާއިރު، މުހިއްމު އެރިއަން 6 ލޯންޗާއަށް ވެސް ލަސްތަކެއް ދިމާވެފައި ވެއެވެ. ޔޫކްރޭން ހަނގުރާމައިގެ ސަބަބުން ރަޝިޔާގެ ސޮޔޫޒް ރޮކެޓްތައް ލިބުން ދަތިވުމުން މިހާރު ވެގާ ރޮކެޓް ލޯންޗާ ވަނީ ގްރައުންޑް ކޮށްފައެވެ.
