އޭ! މިހިރަ ދޮން ސޮރާއެވެ! އިންސާނުން މަރަން ކަލޭ ތީ ކާކު ހެއްޔެވެ؟ މިއިބާރާތުން ވާހަކަ ދައްކަވައި، ތުރުކީގެ ޕާލަމެންޓްގެ ރައީސް މުސްތަފާ ޝަންތޫޕް ވަނީ އަމީރު ހެރީއަށް ފާޑު ވިދާޅުވެފައެވެ. ހެރީ ވަނީ އަފްޣާނިސްތާނުގައި 25 މުސްލިމުން މަރާލި ކަމަށް ބުނެ އޭނާގެ ބައޮގްރަފީގައި ފޮނިކަނޑާފައެވެ.
ތުރުކީގެ ހުޅަނގުގެ އެދިރްނާ ސްޓޭޓްގައި ބޭއްވި ހިލޭ ސާބަހަށް މަސައްކަތް ކުރާ ޖަމިއްޔާތަކުގެ ބައްދަލުވުމެއްގައި ޗަންތޫޕު ވަނީ، ހެރީ މަރާލި މީހުންނަކީ، ރާޒުވާގެ ކުޅިބައެއް ކަމަށް ސިފަކުރުމުން އެމީހުންގެ އިންސާނީ ސިފައަށްވެސް އިންކާރުކޮށްފައި ކަމަށް ވިދާޅުވެފައެވެ.
"ޕްރިންސް ހެރީ އެއްބަސްވީ އަފްޣާނިސްތާނުގައި 25 މީހުން މަރާލި ކަމަށް. ޔޫރަޕްގެ ދޮން ކުއްޖާ އެކަމާ ލަދެއްވެސް ނުގަނޭ! ތިއީ ކާކު؟ އިންސާނެއްތަ؟ އަފްޣާނިސްތާނުގައި ކޯޗެއް ހޯދަން ގޮސް އުޅުނީ؟ އެތާނގައި މީހުން މަރާލަން ކީއްކުރަން ގޮސް އުޅުނީ". ޝަންތޫޕް ވިދާޅުވިއެވެ.
ތުރުކީގެ ޕާލަމެންޓްގެ ރައީސް ވިދާޅުވީ ވިހިވަނަ ގަރުނަކީ އިންސާނީ ތާރީހުގައި އެންމެ ގިނައިން ލޭއޮހޮރުވާލާފައިވާ ގަރުނު ކަމަށެވެ. އަދި އޭނާ ވިދާޅުވީ "ދުނިޔޭގައި އެންމެ ގިނައިން މީހުން މަރާފައިވާ މީހުންނަކީ ޔޫރަޕުގެ މީހުން" ކަމަށެވެ.
ޝަންތޫޕް އިތުރަށް ވިދާޅުވީ "ޔޫރަޕް މީހުން ފުރަތަމަ ބޮޑު ހަނގުރާމައިގައި 20 މިލިއަނަށް ވުރެ ގިނަ މީހުން މަރާލި" ކަމަށެވެ. އަދި އޭގެ ފަހުން ދެވަނަ ބޮޑު ހަނގުރާމައިގައި 75 މިލިއަން މީހުން މަރާލިކަމަށްވެސް ވިދާޅުވިއެވެ. އެކަމަކު ބައެއް އަންދާސާތަކުން ދެވަނަ ބޮޑު ހަނގުރާމައިގައި ޔޫރަޕް މީހުން މަރާލި މީހުންގެ އަދަދު 100 މިލިއަނަށް ވުރެ ގިނަ ކަމަށްވެސް އޭނާ ވިދާޅުވިއެވެ.
