ދުނިޔޭގެ ފުރަތަމަ "ރޮބޮޓް ލޯޔަރ" އެމެރިކާގައި އަންނަ މަހު ދައުވާ ކުރަން ފަށާނެއެވެ. އެސޮރުގެ އެންމެ ފުރަތަމަ ޝަރީއަތަކީ، ބާރު ސްޕީޑެއްގައި ދުއްވި މައްސަލައެއްގައި ތުހުމަތު ކޮށްފައިވާ މީހެއްގެ ދިފާއީ ވަކީލެއްގެ ގޮތުގައި އެހީތެރިވުމަށް ލޯޔަރެއްގެ ގޮތުން ބައިވެރިވުމެވެ.
މަސްނޫއީ ސިކުނޑި ބޭނުންކުރާ މި ރޮބޮޓް ލޯޔަރު އުފެއްދީ ޑޫނޮޓްޕޭ ނަމަކަށް ކިޔާ ސްޓާޓްއަޕަކުންނެވެ. އިންސާނީ ވަކީލެއް ފަދައިން މި ރޮބޮޓު ވެސް ދައުވާ ލިބޭ މީހާއަށް ދިފާއުގައި ބުނާނެ އެއްޗެއް ހެޑްފޯނުން ކިޔައިދޭނެ އެވެ.
ގާނޫނީ ހިދުމަތްތަކަށް ޗެޓްބޮޓް އުފައްދާ ޑޫނޮޓްޕޭ އަކީ ސްޓެންފޯޑްގެ ކޮމްޕިއުޓަރު ސައިންޓިސްޓް ޖޯޝުއާ ބްރޯޑާ، 2015 ވަނަ އަހަރު އުފެއްދި ކުންފުންޏެކެވެ.
އެ ކުންފުނިން އިޝްތިހާރު ކުރާ ގޮތުގައި އެއީ، "ދުނިޔޭގެ ފުރަތަމަ ރޮބޮޓް ލޯޔަރ" ގެ ލޯ ފާމެވެ. ބްރޯޑާ ބުނާ ގޮތުގައި މަސްނޫއީ ސިކުނޑީގެ ރޮބޮޓް ލޯޔަރުން ތަމްރީނު ކުރަން ގިނަ ވަގުތުހޭދަވެއެވެ.
ސައިންޓިފިކް އަދި ޓެކްނޮލޮޖީގެ މަޖައްލާ "ނިއު ސައިންޓިސްޓް" އިން ބުނެފައިވަނީ އާޓިފިޝަލް އިންޓެލިޖެންސް ރޮބޮޓުން ކޯޓުގައި އަޑުއަހާ މައުލޫމާތު ޕްރޮސެސްކޮށް ތަހުލީލުކޮށް އޭގެ ފަހުން ދައުވާ ލިބޭ މީހާއަށް ޖަވާބުދާރީވުމަށް ލަފާދޭނެ ކަމަށެވެ.
ޑޫނޮޓްޕޭ އިން އެއްބަސްވެފައި ވަނީ މައްސަލަގައި ދައުވާ ލިބޭ މީހާ ބަލިވެއްޖެނަމަ އޭނާ ދައްކަން ޖެހޭ ހުރިހައި ޖުރިމާނާއެއް ޑޫނޮޓްޕޭއިން ދެއްކުމަށެވެ.
ޑޫނޮޓްޕޭގެ އަމާޒަކީ ބޮޑެތި ކުންފުނިތަކާ ދެކޮޅަށް ޝަރީއަތުގައި ހަނގުރާމަކޮށް، ބިއުރޯކްރެސީ ކަނޑުވާލައި، ބަޓަނަކަށް ފިއްތާލުމުން ކޮންމެ މީހަކަށްވެސް ގާނޫނީ އެހީތެރިކަން ލިބިގެން ދިއުމެވެ.
