އިންޑިއާގެ ދެމީހަކު ވެގެން ދުނިޔެ ވަށައި ދަތުރުކޮށް ގިނިސް ވޯލްޑް ރެކޯޑު މުގުރާލައިފިއެވެ. ޑރ އަލީ އިރާނީ އާއި ސުޖޯއީ ކުމާރު މިތުރާ ވަނީ އެންމެ ހަތަރު ދުވަހުގެ ތެރޭގައި ދުނިޔޭގެ ހަތް ބައްރަށް އެންމެ އަވަހަށް ދަތުރުކުރި ފުރަތަމަ މީހުންގެ ގޮތުގައި ދުނިޔޭގެ ރެކޯޑް ފޮތަށް ވަދެފައެވެ.
އީރާނީ އާއި މިތުރާ ވަނީ އޭޝިއާ، އެފްރިކާ، ޔޫރަޕް، އުތުރު އެމެރިކާ، ދެކުނު އެމެރިކާ، އެންޓާޓިކާ، އަދި އޯޝޭނިއާ ހިމެނޭ ގޮތަށް ދުނިޔޭގެ ހަތް ބައްރަށް އެންމެ ތިން ދުވަހާއި އެއް ގަޑިއިރާއި، ފަސް މިނެޓު ހަތަރު ސިކުންތު ހޭދަކޮށްގެން ދަތުރުކޮށްފައެވެ.
މި ދެވެރިންގެ ދަތުރު ފަށާފައި ވަނީ ފައިބެ އަހަރުގެ ޑިސެމްބަރު 4 ގައެވެ. އެންޓާޓިކާއިން ފެށި ދަތުރު ނިންމާލާފައި ވަނީ އޮސްޓްރޭލިއާގެ މެލްބަންގައި 7 ޑިސެމްބަރ 2022 ގައެވެ.
މިތުރާ އާއި އިރާނީ އަކީ ވެސް ދަތުރުފަތުރަށް ޝައުގުވެރިވާ ބައެކެވެ. އުމުރުން 64 އަހަރުގެ ޑރ އިރާނީ އަކީ އިންޑިއާގެ ކްރިކެޓް ޓީމުގެ ފިޒިއޮތެރަޕިސްޓެއްގެ ގޮތުގައި މަސައްކަތް ކުރައްވާފައިވާ އޭނާގެ ދާއިރާއިން ފާހަގަ ކޮށްލެވޭ ނަމެކެވެ. އޭނާ ވަނީ މިހާތަނަށް 90 އަށް ވުރެ ގިނަ ގައުމަށް ދަތުރުކޮށްފަ އެވެ.
ސުޖޯއީ މިތުރާ އަކީ ދަތުރުފަތުރު ކުރުމަށް ހުސްވުމަށްޓަކައި ކޯޕަރޭޓް ލައިފް ދޫކުރައްވައި، ދަތުރުފަތުރުގެ ދާއިރާއިން ވިޔަފާރިއެއް ފަށްޓަވާފައެވެ. ސުޖޯއީގެ ހުވަފެނަކީ އެންމެ ގިނައިން ގައުމުތަކަށް ދަތުރުކުރި އިންޑިއާ މީހާގެ ރެކޯޑް ހަދާށެވެ.
ގިނިސް ވޯލްޑް ރެކޯޑްސްގައި ލިސްޓްކޮށްފައިވާ ގޮތުން މީގެ ކުރިން އެންމެ ކުރު މުއްދަތެއްގައި ދުނިޔެ ވަށާ ޖަހާފައި ވަނީ ތިން ދުވަހާއި 14 ގަޑިއިރާއި 46 މިނެޓް 48 ސިކުންތުން ޔުނައިޓެޑް އަރަބް އެމިރޭޓްސް (ޔޫއޭއީ) ގެ ޑރ ޚަވްލާ އަލްރުމައިތީ އެވެ. އޭނާގެ ރެކޯޑް ސިޑްނީގައި ހަދާފައި ވަނީ 13 ފެބްރުއަރީ 2020 ގަ އެވެ. އިރާނީ އާއި މިތުރާގެ ދަތުރު ނިންމާލީ 2022 ވަނަ އަހަރުގެ ޑިސެމްބަރު މަހުގެ 7 ވަނަ ދުވަހު މެލްބަންގަ އެވެ.
