އަފްޣާން ތާލިބާންއަކީ އަންހެނުންނަށް އެލާޖިކް ބައެއްކަން އެމީހުން ދަނީ ދައްކަމުންނެވެ. މުއްލާ ހިބަތުއްﷲ އަޚުންދުޒާދާއަކީ އަފްޣާން ތާލިބާންގެ އެންމެ އިސް ރޫހާނީ ލީޑަރެވެ. އަފްޣާން ސަރުކާރަކީ ރައްޔިތުންގެ ބައެއްގެ ތާއީދާއެކު ވެރިކަމަށް އައި ސަރުކާރެއް ނޫނެވެ. އަދި ދުނިޔޭގެ އެއްވެސ ްގައުމަކުން ބަލައިގެންފައިވާ ސަރުކާރެއް ނޫނެވެ.
ތާލިބާނުންގެ ވެރިކަމުގައި ދުވަސްތައް ފާއިތުވީވީ ހެން އެމީހުންގެ ގާނޫނާއި ގަވާއިދުތައް އަމާޒު ކުރެވެނީ މުޅިންވެސް އަންހެނުންނަށެވެ. ހީވަނީ އަންހެނުންގެ މައްޗަށް ވެރިކަން ކުރުމަށް އައި ސަރުކާރެއް ހެންނެވެ.
މުއްލާ އަޚުންދުޒާދާގެ ފަތުވާއަކުން ނިންމާފައި ވަނީ އަންހެނުން 45 މޭލު ނުވަތަ 70 ކިލޯމީޓަރަށް ވުރެން ދުރަށް މަހުރަމަކާ ނުލައި ދަތުރު ކުރަނީ ހަރާމް ކަމެއް ކަމަށެވެ. އަފްޣާން ކޮންމެ އަންހެނަކު އަތް ދަބަހުގައި ފޫޓް ފީތާއެއް ގެންގުޅޭ ކަމަށްވެސް ވެއެވެ.
އަޚުންދުޒާދާގެ އެހެން ފަތުވާއަކުން ވަނީ ބާލިޣު ވެފައިވާ އެއްވެސް އަންހެނަކު އެއްވެސް ދަރުސްގާހެއްގައި ތައުލީމު އުނގެނުމަށް އިށީދެ އިނުން މަނާ ކޮށްފައެވެ. އެފަތުވާ އިތުރަށް ތަންފީޒު ކުރުމުގެ ގޮތުން ތާލިބާނުން ވަނީ އެއްވެސް ތައުލީމީ މުއައްސަސާއަކާ ގާތަށް އަންހެނުން ކައިރިވުންވެސް މަނާ ކޮށްފައެވެ.
މުއްލާ އަޚުންދުޒާދާގެ ފަތުވާއަކުން ވަނީ އަންހެނުން ކުޅި ވަރު ކުޅެ އުޅުމަކީ ހަރާމް ކަމެއް ކަމުގައި ކަނޑައަޅާފައެވެ. އެކަމަކު އަންހެނުން ބުރުގާ އަޅައިގެން ކުޅިވަރު ކުޅުން ހަރުކަށި ކޮށް ތަންފީޒުކޮށްފައި ނުވާތީ އަންހެނުން ދަނީ ބުރުގާ އަޅައިގެން ކުޅިވަރު ޕްރެކްޓިސް ކުރަމުންނެވެ.
އެއްވެސް ފިރިހެނަކު އަންހެނެއްގެ ގައިގައި ފަރުވާގެ ބޭނުމަށްވެސް އަތް ލުމަކީ ހަރާމް ކަމެއް ކަމަށް ބުނެ މުއްލާ އަޚުންދުޒާދާ ވަނީ ފަތުވާއެއް ނެރެފައެވެ. އަފްޣާނސިްތާންގައި އަންހެނުންގެ ތައުލީމުގެ އުނގެނުމުގެ ތަދުމަޑުކަމެއް މި ވޭތިވެ ދިޔަ 40 އަހަރުގެ ތެރޭގައި އައިސްފައިވާތީ އަންހެން ޑޮކްޓަރުންނަކީ އެގައުމުގައި ލިބޭ ޒާރުގެ ފޮރަފެޝަނަލުންނެއް ނޫނެވެ. އެހެންވެ، އަޚުންދުޒާދާގެ ފަތުވާ ތަންފީޒު ކުރުމުގެ ސަބަބުން އަފްޣާން އަންހެނުންގެ 50 ޕަސެންޓް ސިއްޙީ ފަރުވާއެއް ނުލިބި ކައްވަޅަށް ދިއުން ގާތް ކަމަށް ބެލެވެއެވެ.
އަންހެނުންނަށް ބޯކޮށައި ދިނުމުގެ ޚިދުމަތް ދިނުމަކީ ހަރާމް ކަމެއްކަމަށް ބުނެ އަޚުނދުޒާދާ ފަތުވާ ނެރުމުން އަންހެނުންގެ ސެލޫންތައް ބަންދު ކުރުމަށް ތާލިބާނުން ވަނީ މަސައްކަތް ފަށާފައެވެ. އަފްޣާނިސްތާންގައި މަސާޖުކުރާ ތަންތާނގައި މަސައްކަތް ކުރަނީ ބާލިޣު ނުވާ ފިރިހެން ކުދިންނާއި ފުރާވަރަށް އަރާ ފިރިހެން ކުދިން ކަމުން އަޚުންޒާދާގެ ފަތުވާ މަސާޖު ކުރާ ތަންތަނަށް އަމާޒުވެފައެއް ނުވެއެވެ.
އަފްޣާނިސްތާންގެ ސަގާފަތުގައި އުމުރުން ދޮށީ މީހުން، ޅަ ފިރިހެން ކުދން ބޭނުންތަކަށް ގެންގުޅެއެވެ. އަފްޣާން ސަފާގަތުގައި "ބައްޗާ ބާޒީ" އަކީ ހުތުރު ކަމެއް ނޫނެވެ!
އެހީ ދިނުމާއި ހިލޭ ސާބަހަށް މަސައްކަތް ކުރުމުގައި އަންހެނުން ހަރަކާތްތެރިވުމަކީ ތާލިބާންގެ އިސް މުއްލާ އަޚުންދުޒާދާ ދެކޭ ގޮތުގައި އިސްލާމީ ޝަރީއަތާ ޚިލާފް އަމަލެކެވެ. އެހެންވެ، އަންހެނުން ހިލޭސާބަހަށް ނުވަތަ އެހީ ދިނުމަށް މަސައްކަްތ ކުރުން ވަނީ ހަރާމް ކޮށްފައެވެ.
އަފްޣާން އަންހެނުން ހަރަކާތްތެރިވާ ދާއިރާތައް ހަނިވެގެން ދިއުމުން މިހާރު އެމީހުންނަށް ހަރަކާތްތެރިވާން ލިބިފައިވާ ހަމައެކަނި ޖަގަހައަކީ، އެނދު މައްޗާއި ބަދިގެ ދުމަށްޓެވެ!
