ދުނިޔެއިން ތާލިބާނުންގެ ވެރިކަން ބަލައި ނުގެންފައި ވަނީ އެމީޙުންގެ ޝަރުއިއްޔަތެއް ނެތުމުންނެވެ. އެމީހުންނަށް ބައިނަލްއަގްވާމީ މުޖުތަމައުން ވަނީ އިންތިޚާބަކާ ކުރިމަތިލައިގެން ޝައުއިއްޔަތު ހޯދުމަށް ގޮވާލާފައެވެ. ނަމަވެސް އެކަން ކުރުމުގެ ބަދަލުގައި ތާލިބާނުން ދަނީ ވެރިކަމުގައި އެމީހުންގެ ވަހި ހިއްޕައި މުޖުތަމައު އެކަހެރިކޮށް ޚުދުމުޚުތާރު ގޮތްތަކެއް ދައްކަމުންނެވެ. އެކަމުގެ ނަތީޖާއެއްގެގޮތުން ދުނިޔެއިން ދަނީ ތާލިބާން އެކަހެރިކުރަމުންނެވެ. އެކަމަކު އެފަސް މަންޒަރުގައި ފައިދާ ނަގައިގެން ޗައިނާއިން ވަނީ ތާލިބާނާއެކު ވިޔަފާރި މުއާމަލާތު ފަށާފައެވެ.
މިކަމުގެ އެންމެ ފަހު މަސައްކަތަކީ ޗައިނާގެ ތެޔޮ ނަގާ ކުންފުންޏަކުން ތާލިބާންގެ ސަރުކާރާއެކު ތެޔޮ ނެގުމަށް އެއްބަސްވުމެއް އެކުލާލުމެވެ. ޗައިނާގެ ޝިންޖިއާން ސެންޓްރަލް އޭޝިއާ ޕެޓްރޯލިއަމް އެންޑް ގޭސް ކުންފުނިން ވަނީ އަފްޣާނިސްތާނުގެ ތާލިބާނުންގެ ވެރިކަމާ އެކު ކޮންޓްރެކްޓެއްގައި ސޮއިކޮށްފައެވެ. އެއާއެކު ކުރިއަށް އޮތް 25 އަހަރަށް އަފްޣާނިސްތާނުގެ އުތުރުގައި އޮންނަ އަމޫ ދަރިޔާ ކޯރުން ތެޔޮ ނެގުމުގެ ހައްގު ތާލިބާނުން ވަނީ ޗައިނާ ކުންފުންޏަށް ދީފި އެވެ.
އަފްޣާނިސްތާން ތާލިބާނުންގެ ކޮންޓްރޯލްގެ ދަށަށް އައިތާ 16 މަސް ދުވަސް ވެގެން ހިނގައްޖެއެވެ.
އޭޝިއާ ފައުންޑޭޝަނުން 11 ޖެނުއަރީގައި ޝާއިއުކޮށްފައިވާ ދިރާސާގައި ބުނެފައި ވަނީ އަފްޣާނިސްތާންގައި ފަގީރުކަމާއި ވަޒީފާނެތް މީޙުންގެ އަދަދު ހަލުއި ކަމާއެކު އިތުރު ވބަމުން އަންނަ ކަމަށެވެ. އިގްތިސާދު ފުނޑުފުނޑުވެ، އާންމު ހިދުމަތްތައް ވަރަށް ބޮޑަށް އަސަރުކޮށްފައިވާ ކަމަށެވެ.
މިހުރިހައި ކަމަކާއެކު ތާލިބާނުން ވަނީ އިތުރަށް މުޅި މުޖުތަމައަށް މުސީބާތަކަށް ވެފައެވެ. އަންހެނުންނަށް ވަޒީފާ އަދާ ކުރުމުގެ ހައްގެއް ނެތެވެ. އުގެނުމުން ވަނީ އެމީހުން މަހުރޫމް ކޯށްފައެވެ. ގެއިން ބޭރުގައި އުޅުން މަނާ ކޮށްފައެވެ.
ބައިނަލްއަގްވާމީ މުޖުތައުން ބުނަނީ ތާލިބާނުންގެ ހަނި ވިސްނުމުން ސިޔާސަތުތައް ބައްޓަން ކުރުމުން ގައުމު އިތުރަށް ދެމިގެންދާ ކާރިސާއަކަށް ވައްޓާލާނެ ކަމަށެވެ.
މިހާލަތުގައި ފާހަގަ ކުރެވެނީ ބައިނަލްއަގްވާމީ މުޖުތަމައުން ތާލިބާނުން ހަމަމަގަށް އެޅުވުމަށް އެމީހުންނަށް ފިއްތުންތައް ކުރިމަތި ކުރާއިރު ޗައިނާއިން ފަހަތު ދޮރުން ތާލިބާނުންގެ ވެރިކަން ބަލައި ގަންނަކަން އެމީހުންނަށް ދެއްކުމަށް މަސައްކަތް ކުރަމުންދާ ކަމެވެ. ތާލިބާނުން އައްޔަން ކޮށްފައިޞޥާ ޑިޕްލޮމެޓުން ބަލައިގެންފައިވާ ހަމައެކަނި ދެ ގައުމަކީ ޗައިނާއާއި ޕާކިސްތާނެވެ.
އިސްލާމީ ގައުމުތަކުންނާއި އެހެން ގައުމުތަކުން ވަނީ ހުޅުވާފައިވާ އެމްބަސީތައް އެގޮތުގައި ބަހައްޓާފައެވެ. ގުޅުން އިތުރަށް ބަދަހި ކޮށްފައެއް ނުވެއެވެ.
ޗައިނާއިން އަފްޣާނިސްތާންގައި ހާސިލުކުރަން ބޭނުންވާ ސާފު ދެ މަގްސަދެއް އޮވެއެވެ. އެއިން އެއް މަގްސަދަކީ، އަފްޣާނިސްތާނުން އުއިގޫރު މުސްލިމުންގެ ހައްގުތަކަށް ކަނު ލޮލަކާއި ބީރު ކަންފަތެއް ދިނުމެވެ. އަދި އެމައްސަލާގައިި ވާހަ ނުދެއްކުމާއި އެމީހުންނަށް އަފްޣާނިސްތާންގައި ފުރުސަތު ނުދިނުމެވެ. ދެ ވަނަ ކަމަކަށް ޗައިނާއިން ބޭނުން ވަނީ ސިލްކު ރޯޑްގައި އަފްޣާނސްތާން ބައިވެރިވާށެވެ.
ޗައިނާގެ ޕީޕަލްސް ލިބަރޭޝަން އާމީގެ ކުރީގެ އިސް ކާނަލް ޒޯ ބޯ މިދިޔަ އަހަރު ލިޔުއްވި އާޓިކަލްއެއްގައި ވިދާޅުވީ އެހެން ގައުމުތަކުން އަފްޣާނިސްތާން ފަތަހަ ކުރަން އުޅުނީ ހަތިޔާރުންނެވެ. ޗައިނާއިން އަފްޣާނސްތާން ފަތަހަ ކުރާނީ ކޮންސްޓްރަކްޝަން މަސައްކަތުންނެވެ. ޗައިނާއަށް އެކަން ކުރެވިދާނެއެވެ. ނަމަވެސ ޗައިނާއިން ހިންގާފައިވާ ކޮންސްޓްރަކްޝަން މަސައްކަތް ނިމޭއިރު ގައުމު އޮންނަނީ ދިގު ދެމިގެންވާ ދަރަނީގެ ކަސްތޮޅަކުން ހިލިހިލާ ޖެހިފައެވެ.
ޗައިނާއިން އަފްޣާނިސްތާނުގެ ހާލަތަށް ބަލައި ތާލިބާނުންނާ ގަޔާވާ އެހެން އެދުމެއްވެސް އޮވެއެވެ. އަފްޣާނިސްތާނަކީ ގިނަ އަދަދަކަށް ނާދިރު މައުދަން ހިމެނޭ ގައުމެއް ކަމުން ތާލިބާނުންނާއެކު ކުރާ މުއާމަލާތުގައި އަމުރުބިލްމައުރޫފްގެ ކަންކަން އެމީހުންގެެ ނިޒާމުގެ ތެރޭން ފަސޭހަކަމުން ޗައިނާއިން ބޭނުންވާ ހުއްދަތައްފަސޭހައިން ލިބުމަކީ ޗައިނާ ނިކަން ގަޔާވާ ކަމެކެވެ.
އަފްޣާނސްތާންގައި މިނަރަލް ރިޒާވްސްއާއި، ކޮޕަރ، ލިތިއަމް، އަޔަން އޯރ، އަދި އެހެނިހެން ގުދުރަތީ ވަސީލަތްތައް ގިނަ އަދަދަކަށް ހުރިކަމަށް ބެލެވެއެވެ.
އަފްޣާނިސްތާނުގެ ތާލިބާނުން އިސްވެ އޮވެ ޝިންޖިއަންގް ސެންޓްރަލް އޭޝިއާ ޕެޓްރޯލިއަމް އެންޑް ގޭސް ކޮމްޕެނީން ސޮއިކުރި އަމޫ ދަރިޔާ ކޯރުން ތެޔޮ ނެގުމުގެ ކޮންޓްރެކްޓްގައި މި ކޮންޓްރެކްޓްގައި ސޮއިކުރުންވެސް ޗައިނާއަށް ފަސޭހަވެފައި ވަނީ އެފަދައިންނެވެ.
އެ އެއްބަސްވުމުގައި ކާބުލްގައި ސޮއިކުރީ ތާލިބާނުންގެ އެކްޓިން މިނިސްޓަރު އޮފް މައިންސް އެންޑް ޕެޓްރޯލިއަމް ޝެއިޚް ޝަހާބުއްދީން ދިލާވަރެވެ. އަދި ޒިންޖިއަން ސެންޓްރަލް އޭޝިއާ ޕެޓްރޯލިއަމް އެންޑް ގޭސް ކޮމްޕެނީން ކޮންމެވެސް ވަރެއްގެ މަސްއޫލުވެރިއެކެވެ.
ޗައިނާއަށް ލިބިފައިވާ25 އަހަރުގެ ކޮންޓްރެކްޓްގައިވާ ގޮތުން ޗައިނާ ކުންފުނިން އަފްޣާނިސްތާނުގައި އަހަރަކު 150 މިލިއަން ޑޮލަރު އިންވެސްޓްކުރާނެއެވެ. ތާލިބާނުން ހިންގާ ވެރިކަމަށް މި މަޝްރޫއުން 20 ޕަސެންޓްގެ ހިއްސާއެއް ލިބޭނެއެވެ.
މިއާއެކު އުފެދޭ ސުއާލަކީ އަފްޣާނިސްތާނަކީ ޗައިނާއަށް އަމާން ތަނެއްކަމުގައި ވާނެތޯއެވެ. ދާދިފަހުން ކާބުލްގައި ހޮޓަކަށް ދީފައިޥާ އެންމެ ބޮޑު ހަމަލާ އަމާޒުކޯށްފައި ވަނީ ޗައިނާއިން ކާބުލްގައި ހިންގި ހޮޓަލަކަށެވެ. އެހަމަލަ ދީފައި ވަނީ އައިސިސް ޚުރާސާން ޖަމާއަތުންނެވެ. އަނެއް ކޮޅުން އަފްޣާނސްތާނާއި އަވަށްޓެރި ޕާކސްތާންގައިވެސް ޗައިނާގެ މީހުންނަށް ހަމަލަތައް އަމާޒު ކުރަމުން ދަނީ ޕާކިސްތާން ތާލިބާން ޖަމާއަތުންނެވެ.
އިތުރަށް ކިޔާލުމަށް
ޗައިނާ މީހުން އަފްޣާނިސްތާނުން ފައިބަން އަންގައިފި
އަފްޣާނިސްތާންގައި ޕާކިސްތާންގެ އިންޓެލިޖެންސް އޮޕަރޭޓަރުން ގިނަ އަދަދަކަށް އޮޕަރޭޓް ކުރާ ކަމަށް ސަލާމަތީ ފަރާތްތަކާއި މުހައްލިލުން ބުނެއެވެ. އެހެންވީއިރު ޗައިނާގެ މަސްލަހަތަށް އަފްޣާނިސްތާންގައި އެހައި ފަސޭހައިން އަމާޒުވާންވީ ކީއްވެގެން ހެއްޔެވެ؟
ލަންޑަން ސްކޫލް އޮފް އޮރިއަންޓަލް އެންޑް އެފްރިކަން ސްޓަޑީޒް ގެ ލިޔުންތެރިޔާ އަދި މުހައްލިލު އައިޝާ ސިއްދީގާ ވިދާޅު ވަނީ ޗައިނާގެ މަސްއޫލުވެރިން އަފްޣާނިސްތާންގައި ބާރުގަދަ ކުރުމަކީ އަވަށްތެރިޔާ ބޭނުންވާ ކަމއް ނޫން ކަމަށެވެ. އަދި އަވަށްތެރިޔާ ޗައިނާގެ ނިޔަތާ މެދު ޝައްކު ކުރާ ކަމަށެވެ.
ސުއާލަކީ ޗައިނާއިން އަފްޣާނިސްތާންގައި ހަމަޖެހިލައިގެން އުޅޭއިރު ޣީރަތްތެރި އަފްޣާން މުސްލިމުން، އެމީހުންގެ އަޚުން ކަމަށްވާ ޝިންޖިއާންގެ މުސްލިމުން މަތިން ހަނދާން ނައްތާލާނެ ހެއްޔެވެ؟
