ކުރިއަށްއޮތް ރިޔާސީ އިންތިޚާބުގައި އެމްޑީޕީން ވާދަކުރައްވާނޭ ކެންޑިޑޭޓަކު ހޮވުމަށް ބާއްވާ ރިޔާސީ ޕްރައިމަރީގައި ރައީސް އިބްރާހީމް މުހައްމަދު ސާލިހަށް ދާއިދު ކުރައްވަން ފޮނަދޫ ދާއިރާގެ މަޖިލިސް މެމްބަރ މޫސާ ސިރާޖު ނިންމަވައިފިއެވެ.
ސިރާޖު ވިދާޅުވީ އެގޮތަށް ނިންމެވީ ދާއިރާގެ ރައްޔިތުންނާ ބައްދަލު ކުރައްވައި ރައްޔިތުންގެ ޚިޔާލު ހޯއްދެވުމަށް ކަމަށެވެ. އޭނާ ކުރައްވައިފައިވާ ޓުވީޓެއްގައި ވިދާޅުވެފައިވަނީ އެމްޑީޕީން ރިޔާސީ ކެންޕޭނަށް ނެރެންވާނީ އިންތިޚާބު ކާމިޔާބު ކުރެވޭވަރުގެ ކެންޑިޑޭޓެއް ކަމަށެވެ.
"ކުރިއަށް އޮތް ރިޔާސީ އިންތިޚާބު އެމްޑީޕީއަށް ކާމިޔާބު ކޮށްދެވޭނެ ކެންޑިޑޭޓަކާއެކު އިންތިޚާބަށް ނުކުތުން މުހިންމު ކަމަށް ފެންނާތީ، ދާއިރާގެ ރައްޔިތުންގެ މަޝްވަރާއާއެކު އެމްޑީޕީގެ ރިޔާސީ ޕްރައިމަރީގައި ރައީސް އިބްރާހީމް މުޙައްމަދު ސާލިހަށް ތާއީދުކުރުމަށް ނިންމައިފިން،" އޭނާ ކުރައްވާފައިވާ ޓުވީޓުގައި ވިދާޅުވެފައިވެއެވެ. މޫސާ ސިރާޖުގެ މި ނިންމެވުމަށް އެމްޕީ ރޮޒައިނާ އާދަމް ވަނީ މަރުހަބާ ވިދާޅުވެފައެވެ.
އެމްޑީޕީގެ ރިޔާސީ ޕްރައިމަރީގެ ވޯޓުލުން ބޭއްވުމަށް ހަމަޖެހިފައިވަނީ ޖަނަވަރީ 28 ވަނަދުވަހުއެވެ. ރިޔާސީ ޕްރައިމަރީގައި ވާދަކުރައްވަނީ އެމްޑީޕީގެ އިސްލީޑަރ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހާއި އެމްޑީޕީގެ ރައީސް، ރައީސް މުހައްމަދު ނަޝީދެވެ. މި ދެ ބޭފުޅުން މިހާރު ގެންދަވަނީ ފޯރިއާއެކު ކެންޕޭން ކުރައްވަމުންނެވެ.
