ގްރޭޓާ މާލޭގައި ދިރިއުޅޭ ރައްޔިތުންނަށް ޖެއްސުންކޮށް ލިބޭ ހިދުމަތްތަކުގެ އަގު ބޮޑުކުރުމުގެ ނިޔަތުގައި މާލޭސިޓީކައުންސިލުން ގާނޫނާއި ހިލާފަށް އަމަލުކުރަން ފަށާފައިވާ ދެ އުސޫލެއް ބާތިލް ކުރުމަށް ސްޓެލްކޯއިން މިއަދު ވާނީ ދުސްތޫރީ މައްސަލައެއް ދިވެހިރާއްޖޭގެ ހައިކޯޓަށް ހުށަހަޅާފައި ކަމަށް އެކުންފުނީން ބުނެފިއެވެ.
ސްޓެލްކޯއިން މިއަދު ބުނީ މި މައްސަލައާމެދު ވަކި ގޮތެއް ކަނޑައަޅާ ނިމެންދެން އެ ދެ އުސޫލަށް އަމަލުކުރުން ފަސް ކުރުމުގެ ވަގުތީ އަމުރަކަށްވެސް ހައިކޯޓުގައި އެކުންފުނީން މިއަދު އެދިފައިވާނޭ ކަމަށެވެ.
އެ ކުންފުނިން ބާތިލް ކުރުމަށް އެދި ހައިކޯޓަށް ހުށަހަޅާފައިވަނީ ސިޓީކައުންސިލުން އަމަލުކުރަންފަށާފައިވާ މާލެސިޓީގެ މަގުމަތީގައި މަގުބަންދު ނުކޮށް އަދި މަގުބަންދު ކޮށްގެން މަސައްކަތްކުރުމާ ބެހޭ އުސޫލާއި، މަގު ކޮނުމާއި، ޖަންކްޝަން ފަދަ ތަންތަނުގެ މަތި ނަގައިގެން ޢާންމުކޮށް މަސައްކަތް ކުރުމުގެ އުސޫލެވެ. ސްޓެލްކޯއިން އިއްޔެ ވިދާޅުވީ މާލޭސިޓީން ކައުންސިލުން ވަނީ ޚިދުމަތުގެ އަގުތައް ވެސް އިންތިހާ ބޮޑުކޮށްފައި ކަމަށެވެ. އޭގެ ސަބަބުން ރައްޔިތުންނަށް ވަރަށްބޮޑަށް ދަތިވާކަމަށް ވެސް ސްޓެލްކޯއިން ވިދާޅުވެފައިވެއެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ޝަރީފް ވިދާޅުވީ ކުރިން 60 ރުފިޔާއަށް ދެމުން ގެންދިޔަ މަގުމަތީގައި ބަހައްޓާ ބޯޑެއްގެ އަގު މާލޭސިޓީން މިހާރުވަނީ 200 ރުފިޔާއަށް ބޮޑުކޮށްފައި ކަމަށެވެ. ރޯޑު ބްލޮކްކުރަން ބަހައްޓާ ބޯޑު ކުރިން 150 ރުފިޔާ ނަގަމުންއައިސް މިހާރު 300 ރުފިޔާއަށް ބަދަލުކޮށްފައިވާ ކަމަށް ވެސް ޝަރީފް ވިދާޅުވިއެވެ. އޭގެ އިތުރުން ކުރިން އެއްވެސް އަގެއްނުނަގައި ދެމުން އައި ޚިދުމަތެއް ކަމަށްވާ ޕޭވްމަންޓް މަތީގައި ކޮނެގެން އެއްޗެއް ވަޅުލަންޖެހިއްޖެ ނަމަ މިހާރު ކޮންމެ ފޫޓަކަށް 25 ރުފިޔާ ނަގަން ސިޓީކައުންސިލުން ނިމާފައިވާ ކަމަށެވެ. މަގުމަތީގައި ބަހައްޓާ ބޮލޮކްތަކަށް ކޮންމެ ފޫޓަކަށް 100 ރުފިޔާ މިހާރު ނަގާ ކަމަށް ވެސް ވިދާޅުވިއެވެ.
ޝަރީފް ވިދާޅުވީ އެއީ ކުރިން އެ ޚިދުމަތްތަކަށް އާންމުރައްޔިތުން ދައްކަމުންދިޔަ އަދަދުގެ 154 ޕަސެންޓު ބޮޑު އަދަދެއް ކަމަށެވެ.
