ސްޕެނިޝް ލަލީގާގައި މިރޭ މަޔޯކާ އަތުން 1-0 އިން ބަލިވުމުން ރެއާލް މެޑްރިޑަށް މުހިއްމު ތިން ޕޮއިންޓް ގެއްލިއްޖެއެވެ.
މަޔޯކާގެ ދަނޑުގައި ކުޅުނު މިމެޗުގައި ފެނިގެންދިޔަ ހަމައެކަނި ލަނޑަކީ 13 ވަނަ މިނެޓުގައި ރެއާލްގެ ޑިފެންޑަރު ނަޗޯ އަތުން ބައިކޮޅަށް ވަން ލަނޑެކެވެ. މެޗުގެ ނަތީޖާ ހަމަހަމަ ކުރުމަށް 57 ވަނަ މިނެޓުގައި ރެއާލްއަށް ރަނުގެ ފުރުސަތެއް ލިބުނެވެ. މަޔޯކާގެ ކީޕަރު، ރެއާލްގެ ވިނީޝިއަސްއަށް ކުރި ފައުލަކަށް ލިބުނު ޕެނަލްޓީ މާކޯ އެސެންސިއޯ ފޮނުވާލުމުން މަޔޯކާގެ ކީޕަރު ދިފާއު ކުރީއެވެ. ކުދި ޕާސްތަކެއް ޖަހައިގެން މަޔޯކާގެ ޑިފެންސް ފޫއަޅުވާނުލެވުމުން ރެއާލްއިން މެޗުގެ ފަހު ވިއްސަކަށް މިނިޓް މަސައްކަތް ކުރީ މަތިން މަޔޯކާގެ އޭރިޔާގެ ތެރެއަށް ބޯޅަތަކެއް ލައިގެން ލަނޑު ޖެހުމަށެވެ. އެކަމަކު ގޯލަށް ފޮނުވާލަން މަސައްކަތް ކުރި ގިނަ ހަމަލާތައް ގޯލާ އަމާޒުވާ ގޮތެއް ނުވިއެވެ.
މެޗުގެ އުސްއަލިތަކުގެ ލިންކް:
https://www.youtube.com/watch?v=1gUvZw5KDBs
މިމެޗުން ރެއާލް ބަލިވުމުން އެންމެ ބޮޑު ހިތްހަމަ ޖެހުމެއް ލިބޭނީ ތާވަލުގެ ކުރީގައި އޮތް ބާސެލޯނާއަށެވެ. 20 މެޗުން ރެއާލްއަށް 45 ޕޮއިންޓް ހޯދިފައިވާއިރު، ބާސެލޯނާ ތާވަލުގެ އެއްވަނައިގައި އޮތީ 19 މެޗުން 50 ޕޮއިންޓް ހޯދައިގެންނެވެ. އަމިއްލަ ދަނޑުގައި މިރޭ ރާއްޖޭ ގަޑިން ދަންވަރު 1 ޖަހާއިރު ސެވިއްޔާއާ ދެކޮޅަށް ކުޅޭ މެޗުން ބާސެލޯނާ މޮޅުވެއްޖެނަމަ ތާވަލުގެ ކުރީގައި 8 ޕޮއިންޓުގެ ލީޑެއް ބާސާއަށް ލިބޭނެއެވެ.
ސްޕެނިޝް ލީގުގައި ރެއާލްއަށް ދެން މެޗެއް އޮންނާނީ މިމަހުގެ 16 ވަނަ ދުވަހުއެވެ. އޭގެ ކުރިން ރެއާލްއިން ކްލަބު ވަރލްޑް ކަޕުގައި ސެމީފައިނަލުގައި މިމަހުގެ 9 ވަނަ ދުވަހު މިސްރުގެ އަލް އަހްލީއާ ދެކޮޅަށް ކުޅޭނެއެވެ. އަދި ފައިނަލަށް ގޮސްފިނަމަ މިމަހުގެ 12 ވަނަ ދުވަހު ފައިނަލް މެޗް ކުޅެން ޖެހޭނެއެވެ.
