ބައެއް މީހުން ބުނާ ގޮތުގައި މިއީ އެހާ ރަނގަޅު އާދައެއް ނޫނެވެ. ތަޖުރިބާ ކާރުން އަދި ދިރާސާ ވެރިން ބުނާ ގޮތުގައި މިކަމުގައި ގެއްލުމެއް ނެތެވެ. ދެން އޮތީ އަމިއްލަ ތަޖުރިބާގެ ވާހަކައެވެ. މިއީ ވަރަށް ރަނގަޅު ހީލަތެކެވެ. ކޮންކަމަކަށް ހެއްޔެވެ. ނުނިދިގެން، ނިދި ނައިސްގެން ނަފުސާ ހަނގުރާމަކޮށް، އެނދުގައި ބުރު އެނބުރުމަށް ވުރެ މިގޮތް ހަމަ ވަރަށް ރަނގަޅެވެ.
ނަފުސާނީ މައްސަލަތައް ހުންނާތީ ޑިޕްރެޝަނަށް ބޭސް ކެއުމަށާއި ނިދާ ބޭސް ކެއުމަށް އިރުޝާދު ދިނީ ޑޮކްޓަރެކެވެ. ބޭސް ކެއުމަކީ ކަށީގަ ނެތް، އަމުދުން ވަރަށް އުނދަގުލުން ކުރާ ކަމަކަށް ވާތީ އެހާ ފަސޭހައިން މި ފަރުވާ އަކަށް އެއްބަހެއް ނުވެވުނެވެ. ކައުންސެލަރެއްގެ ގާތަށް ދިއުމުން ހަޔާތުގެ އެތައް ބައިވަރު ސޮފްހާތަކެއް ހުޅުވަ ހުޅުވުވާފައި ލައްޕަ ލައްޕާފައި ދިނީ އާންމުކޮށް މާމަމެން ދޭކަހަލަ ނަސޭހަތެކެވެ.
ނިދުމުގެ ކުރިން ދަތްއުނގުޅާ، އަތްފަޔާއި މޫނު ދޮވެ، ވުޟޫކޮށް ކުރަން ޖެހޭ ކަންތައް ކޮށްގެން ނިދުމުގެ ޒިކުރުކޮށްގެން އޮށޯވެ ގައިން ވަރު ދޫ ކޮށްލުމުން އިސާހިތު ނިދިދާނެ އެވެ. ހިތަށް އެރި އެއްޗެހި ގިނަކަމާއި ވީދެރަ އާއި އައި ރުޅިން ފެންކަޅި ވުން ނޫން ކަމެއް ނުވިއެވެ. ބަލަގަ އެތަނަކަށް މިދިޔައީ މިގޮތަކަށް ދިރިއުޅޭތާ އުމުރުން ވީ ދުވަސް ވުމަށް ފަހުގައި ދާދި ފަހަކުން ދިމާވި ގިލަންވެރި ކަމަކުން ސަލާމަތް ނުވެގެން ނޫންހެއްޔެވެ. ބޭކާރު ގޮތެއްގައި އަމިއްލަ ބައެެއް ވާހަކަ ކިޔައިދެވުނު މޮޔަ ހީވިއެވެ.
ދެން ފެށީ ނިދަން އޮށޯންނަމުން ފެންނަ މަންޒަރަކަށް ތަބާވެ އެގޮތަށް ކަންތައް ކުރާށެވެ. ކޮންމެ ރެއަކު ނިދަން ވީމަ މަޑު ރާގަކަށް ވާރޭ ވެހޭ އަޑު ހުންނަ މިޔުޒިކެއް ޖަހާ އަޑު އިވޭނެއެވެ. ނޫނީ ހިމޭން ރާގެއްގެ ކޮންމެވެސް ވާހަކައެއް ބައެއްރޭތަކުގައި ތާހިރު އަހުލުބައިތުންގެ ވާހަކަ ޖަހައިގެންވެސް އޮވެފާނެއެވެ. އެހެން ބަޔަކަށް ނީވޭވަރަށް ކަންފަތް ކައިރީގައި ފޯން ބާއްވައިގެން ފުރަތަމަ ރޭ އަޑު އެހީ ވާރޭ ވެހޭ އަޑެވެ. މާ ފަސޭހައިން ހަމަ އޮށޯވެލި ތަނާ ނިދުނީއެކޭ ނުބުނެވޭނެ އެވެ. އެހެނެއްކަމަކު ޔަގީނުންވެސް މެދުދަމަށް ޖެހުނުއިރު އޮތީ ބޮޑު ގުގުރީގައެވެ.
މިއާދަ ހަރުލަން ފެށުމުން އެއްވެސް ރެއަކު އެކެއް ދޭއް ތިނެއް ޖަހާ ފަހުން ނުނިދިގެން އެނބުރެމުން ގޮސް ހެނދުނު ހައެއް ޖެހީމަ ފާޑަކަށް ގަބުކައިފަ ލޯމެރި ވަރުދެރަ އޮތަސް ހަގީގަތަކީ ހަމަނުނިދޭ ކަމެވެ. އެކަމަކު މިބުނިހެން ކޮންމެވެސް އެއްޗެއް ނިދަން އޮށޯންނަމުން އަޑު އެހުމުން އެލިބުނު ފަސޭހައާއި ނިދެމުން އަންނަ އަރާމު ގޮތް މީހަކަށް ބުނެދޭނީވެސް ކިހިނެއް ހެއްޔެވެ. ދެން ބައްދަލު ކުރީ ސައިކޭޓްރިސްޓަކާއެވެ.
ދާދިފަހުން ސައިކޮލޮޖީ އިން ޑިގްރީ ނިންމައިގެން އައިސް ދާއިރާއަށް ނުކުތުމުގެ މަސައްކަތް ކުރަމުންދާ މިސައިކޭޓްރިސްޓް ބުނެލީ، އޭނާގެ 13 އަހަރުގެ ކެރިއަރގައި "އިޓްސް ދަ ބެސްޓް ޓްރިކް އެވާ ހާޑް" އޭނާއަށް އާންމު މީހަކު އަމިއްލައަށް ނިދުމަށް ހެދި އުކުޅަކަށް ވިޔަސް އަދި އެހެން ކަމަކަށް ހެދި އުކުޅަކަށް ވިޔަސް އޭނާއަށް މިއަދާ ހަމައަށް އިވުނު އެންމެ ފުރިހަމަ އުކުޅު ކަމަށެވެ.
ކޮންމެއަކަސް ޔަގީންވާ ކަމަކީ ނިދުމަށާއި ސިކުނޑިއަށް ވަަރަށް ހަމަޖެހުމާއި އަރާމު ލިބިދޭ ކަމަކަށް ނިދަމުން އަޑު އެހުން ވެއްޖެ ކަމެވެ. އަދި މިއީ ޔަގީނުންވެސް އަމިއްލަ ތަޖުރިބާ ގައި މިއަށްވުރެ ނުނިދިގެން އުޅޭ މީހަކަށް ރަގަޅު ފަރުވާއެއް ނުފެނެއެވެ.
