މަސައްކަތްތެރިކަމުގެ ދާއިރާތަކަށް މީހުން ބިނާކުރުމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އާއި މޯލްޑިވްސް ޕޮލިޓެކްނިކާ ދެމެދު ފަހުމުނާމާއެއްގައި ސޮއިކޮށްފިއެވެ.
މި އެއްބަސްވުމުގައި ސްޓެލްކޯގެ ފަރާތުން ސޮއި ކުރެއްވީ މެނޭޖިން ޑިރެކްޓަރު އަހްމަދު ޝަރީފްއެވެ. އަދި ޕޮލިޓެކްނިކްގެ ފަރާތުން ސޮއި ކުރެއްވީ ސީއީއޯ މުހައްމަދު ހާޝިމްއެވެ.
ސްޓެލްކޯގައި މިއަދު ހެނދުނު ބޭއްވި މި ރަސްމިއްޔާތުގައި، މި ހަފްލާގައި ވާހަކަ ދައްކަވަމުން ސްޓެލްކޯގެ އެމްޑީ ޝަރީފު ވިދާޅުވީ، ޕްލިޓެކްނިކާއި ސްޓެލްކޯއާ މިއަދު ވި އެއްބަސްވުމަކީ ވަރަށް ތާރީހީ އަދި މުހިންމު އެއްބަސްވުމެއް ކަމަށާއި މި އެއްބަސްވުމުގެ ދަށުން ސަރުކާރުގެ ދެ މުއައްސަސާގައި ލިބިފައި ހުރި ވަސީލަތްތައް އެއްބަޔަކު އަނެއް ބަޔަކަށް ބޭނުން ކުރުމަށް ފުރުސަތު ތަނަވަސްވެގެން ދާނެކަމަށެވެ. އަދި އެ ވަސީލަތްތަކުގެ ބޭނުން އަތުން ހިފާ، ތަޖުރިބާކުރުމުގެ ފުރުސަތު ޕޮލީޓެކްނިކަށް ތަމްރީނު ވެވޭނެ، ކުދިންނަށާއި އަދި ލެކްޗަރާއިންނަށް އެފުރުސަތު ތަނަވަސްވެގެންދާނެ ކަމަށްވެސް ވިދާޅުވިއެވެ.
އެހަފްލާގައި ވާހަކަ ދައްކަވަމުން ޕޮލިޓެކްނިކްގެ ސީއީއޯ ހާޝިމް ވިދާޅުވީ، ސްޓެލްކޯއާކު މިއަދު ވި އެއްބަސްވުމުގެ ސަބަބުން ޕޮލިޓެކްނިކްގެ ސްޓާފުންނަށާއި ދަރިވަރުންނަށް އަދި ސްޓެލްކޯގެ ސްޓާފުންނަށް ވެސް އިތުރު ކުރިއެރުމެއް އަދި އިތުރު ކާމިޔާބީތަކެއް ލިބިގެންދާނެ ކަމަށެވެ.
