ފިލިޕީންސްގެ ނާއިބް ރައީސް (ފޮޓޯގައި) އެ ގައުމުގެ ރައީސުލްޖުމްހޫރިއްޔާއަށް ދެއްވި މަރުގެ އިންޒާރާ ގުޅިގެން ރައީސްގެ ސަލާމަތީ ފިޔަވަޅުތައް ވަރުގަދަ ކޮށްފިއެވެ.
ފިލިޕީންސްގެ އެންމެ ބާރުގަދަ ދެ ސިޔާސީ އާއިލާގެ މެދުގައި އޮތް ހަތުރުވެރި ޑްރާމާގައި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ނާއިބް ރައީސް ސާރާ ޑޫޓާޓޭ ވިދާޅުވީ އޭނާގެ ފުރާނައަށް ނުރައްކަލެއް ކުރިމަތި ވެއްޖެނަމަ، ރައީސް ފާޑިނަންޑް މާކޯސް ޖޫނިއަރާއި ޕާލަމެންޓްގެ ރައީސް ވަގުތުން އަވަހާރަކޮށްލުމަށް ޓަކައި ގޭންގް ގްރޫޕަކާ އެމަސައްކަތް ހަވާލުކޮށްފައި ވާނެ ކަމަށެވެ.
"އަހަރެން ވާނީ ގޭންގް ބަޔަކާ ވާހަކަ ދައްކާފަ. އަހަރެން ބުނީމު، އަހަރެން މަރާލައިފިއްޔާ ދާގޮތަށް ގޮސް މާކޯސް، މަހާ ރެހެނދި ލީޒާ އަރަނެޓާ، އަދި ސްޕީކަރު މާޓިން ރޮމުއަލްޑޭޒް ވަގުތުން ނައްތާލަން. މިއީ ސަމާސާއެއް ނޫން. އަސްލުވެސް ސަމާސާއެއް ނޫން،" ނޫސްވެރިންނާ ވާހަކަ ދައްކަވަމުން ޑޫޓާޓޭ ވިދާޅުވިއެވެ.
ނައީބް ރައީސް ޑޫޓާޓޭ ނޫސްވެރިންގެ ބައްދަލުވުމުގައި ދެއްވި އިންޒާރަކީ 2022 ވަނަ އަހަރު އިންތިހާބު ކާމިޔާބު ކުރެއްވި ދެ ލީޑަރުންގެ ދެމެދުގެ ހަތުރުވެރިކަން ހާމަވެގެންދާ ކަމުގެ ހެއްކެކެވެ.
ނާއިބް ރައީސް ޑޫޓާޓޭ ގެ ބައްޕަ، ރޮޑްރިގޯ ޑޫޓާޓޭއަކީ ކުރީގެ ނުލަފާ ރައީސެވެ. އޭނާގެ ވެރިކަމުގައި މަސްތުވާތަކެއްޗާ ދެކޮޅަށް ހަނގުރާމަ ކުރުމުގެ ނަމުގައި ދެކޮޅުވެރިންގެ އެތައް ހާސް ބަޔަކު ޝަރީއަތަކާ ނުލައި މަރާލާފައި ވެއެވެ. އިންޓަރނޭޝަނަލް ކްރިމިނަލް ކޯޓުން ދަނީ އޭނާގެ އެ އަމަލުތަކަކީ އިންސާނިއްޔަތާ ދެކޮޅަށް ހިންގި ޖަރީމާއެއް ތޯ ބަލަމުންނެވެ.
ނާއިބް ރައީސްގެ އިންޒާރާ ގުޅިގެން ރިޔާސީ ސެކިއުރިޓީ ކޮމާންޑުން ބުނީ ސަލާމަތީ ޕްރޮޓޮކޯލްތައް މަތިކޮށްފައިވާ ކަމަށެވެ.
ޕޮލިސް ޗީފް ރޮމެލް ފްރާންސިސްކޯ މާބިލް ވިދާޅުވީ މިއިންޒާރުތަކާ ގުޅިގެން ތަހުގީގެއް ކުރަމުންދާ ކަމަށެވެ.
ޑޫޓާޓޭ ކުރިން އޭނާ އަކީ މާކޯސްގެ ކެބިނެޓްގައި ހިމެނިވަޑައިގަތް ބޭފުޅެކެވެ. ނަމަވެސް ޕޮލިސީ ދެބަސްވުންތަކާ ހެދި އޭނާ ވަނީ މަގާމުން އިސްތިއުފާ ދެއްވާފައެވެ.
އޭގެ ތެރޭގައި ދެކުނު ޗައިނާ ކަނޑާއި ފިލިޕީންސް ކަނޑުގައި ޗައިނާއާ ދެކޮޅަށް ގެންގުޅޭނެ ސިޔާސަތާ މެދު ދެބަސްވުން އުފެދިފައި ވެއެވެ.
ޑޫޓާޓޭގެ ޗީފް އޮފް ސްޓާފް ޒުލައިޚާ ލޯޕޭޒާ ދެކޮޅަށްވެސް ސަރުކާރުން ވަނީ ކުރީގެ މަގާމުތަކުގައި އޭނާ ހިންގާފައިވާ ކޮރަޕްޝަންގެ މައްސަލަތަކާ ގުޅޭ ތަހުގީގެއް ފަށާފައެވެ.
އޭގެ އިތުރުން ޑޫޓާޓޭ ގެ އޮފީހާއި ގޭގެ ބަޖެޓްވެސް ވަނީ ކުޑަކޮށްފައެވެ.
ނާއިބް ރައީސް ޑޫޓާޓޭ ތުހުމަތު ކުރައްވާ ގޮތުގައި ޕާލަމެންޓްގެ ރައީސްގެ މަގާމު ފުރުއްވާ ރައީސްގެ ދެބެއިންގެ ދެދަރި ސްޕީކަރު ރޮމުއަލްޑޭޒް ވަނީ ނައިބު ރައީސަށް އުދަގޫ ކުރުމަށް އޭނާގެ އޮފީހުގެ ބަޖެޓްގެ ގާތްގަނޑަކަށް ދެބައިކުޅަ އެއްބައި އުނިކޮށްފައެވެ.
ފިލިޕީންސްގައި ނައިބު ރައީސަކީ ރައީސުލްޖުމްހޫރިއްޔާއާ ވަކިން އިންތިހާބު ކުރާ މަގާމެކެވެ. ނަމަވެސް އޭނާއަށް ރަސްމީ އެއްވެސް ވާޖިބެއް ނޯވެއެވެ.
ބައެއް ނާއިބް ރައީސުން ވަނީ މީގެ ކުރިން ކެބިނެޓްގެ މަގާމުތައް ފުރުއްވާފައެވެ. އަދި އަނެއް ބައި ނާއިބް ރައީސުން ވަނީ އިޖުތިމާއީ ދާއިރާގެ މަސައްކަތްތައް ކުރިއަށް ގެންދަވާފައެވެ.
ފިލިޕީންސްގެ ރައީސްގެ ދައުރަކީ 6 އަހަރެވެ. ނާއިބް ރައީސްގެ ގޭންގެއްގެ އަތުން ސަލާމަތްވެއްޖެނަމަ، ރައީސް މާރކޯސް ދައުރު ނިންމަވާނީ 2028ގައެވެ.
