ކޮވިޑް-19 ފެތުރުން މަދުކުރުމަށްޓަކައި އަޅާ ރައްކާތެރި ފިޔަވަޅެއްގެ ގޮތުގައި މާލޭ ސިޓީގައި އިއުލާން ކުރި ކާފިއު އެޗްޕީއޭ އިން އުވާލައިފިއެވެ.
މާލޭ ސިޓީގައި ރޭގަނޑު 12:00 އިން ފެށިގެން ފަތިހު 4:00 އާ ހަމައަށް މަގުމަތީގައި އުޅުން މަނާކޮށް ކުރިން އިއުލާންކޮށްފައިވާ ކާފިއު އުވާލީ އެޗްޕީއޭގެ ޑިރެކްޓާ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ސޮއިކުރައްވައި ނެރުއްވި އެންގުމެއްގައެވެ.
މާލޭގެ ކާފިއު އެއްކޮށް އުވާލާފައި މިވަނީ ކޮވިޑްގެ ކޭސްތައް މަދުވަމުން އަންނާތީ، މީގެކުރިން އަޅާފައިވާ ގިނަ ފިޔަވަޅުތަކަކަށް ލުއިތައް ދީފައި ވަނިކޮށެވެ.
ލުއިތައް ދިންނަމަވެސް މާލޭ ސިޓީން އެހެން ރަށްތަކަށް ދަތުރުކުރާނަމަ 10 ދުވަހުގެ މުއްދަތަކަށް އެރަށެއްގައި ކަރަންޓީނުވާން ޖެހޭ ޖެހުމަށް އެއްވެސް ބަދަލެއް ނުގެނެއެވެ.
މީގެކުރިން އެޗްޕީއޭ އިން ވަނީ ދިވެހީންނަށް ރިސޯޓްތަކަށް ދިޔުންވެސް މަނާކޮށްފައެވެ. ނަމަވެސް ދާދިފަހުން ވަނީ ކޮވިޑްގެ ނެގެޓިވް ޕީސީއާރް ޓެސްޓަކާއެކު ދިވެހީންނަށް ރިސޯޓްތަކަށް ދެވޭގޮތް ހަމަޖައްސާފައެވެ.
ކޮވިޑާ ގުޅިގެން އަޅާފައިވާ ފިޔަވަޅުތަކަށް ލުއިތައް ދިންނަމަވެސް ޕޮޒިޓިވް ކޭސްތައް މައްޗަށްކޮށް ހާލަތު އިތުރަށް ގޯސްވާނަމަ އަނެއްކާވެސް ފިޔަވަޅުތައް ހަރުކަށި ކުރާނެ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ވަނީ ބުނެފައެވެ.
