އިޚްލާސްތެރި ބުރަ މަސައްކަތް ކުރުމުގެ ހަދިޔާ އަކަށް ވާނީ ބާރު ލިބުމާއެކު ނަގައި އެއްލާލުން ކަމަށް ކުރީގެ ޖެންޑަރ މިނިސްޓަރ ޝިދާތާ ޝަރީފް ވިދާޅުވެއްޖެއެވެ.
މިހާރު އެމްއެންޕީގެ ސްޕޯކްސް ޕާސަންގެ މަގާމު ފުރުއްވަމުން ގެންދަވާ ޝިދާތާ ޝަރީފް ވަނީ ނުސީދާކޮށް އެހެން ވާހަކައެއް ވިދާޅުވެފައެވެ. އޭނާ ވިދާޅުވެފައިވަނީ "ރައީސް އިބޫ އިތުރު ދައުރަކަށް ގެންނަން އަތުކުރި އޮޅައިގެން ތިބި ބަޔަކު ނަމަ ވިސްނާ ފިކުރު ކޮށްލާ،" ކަމަށެވެ. އެހެންނަމަވެސް އޭގެ އެއްވެސް ތަފްސީލެއް ދެއްވައިފައި ނުވެއެވެ. ބެލެވޭ ގޮތުގައި ޝިދާތާ އެވިދާޅުވަނީ އެމްޑީޕީގެ އިސްމެމްބަރުންގެ ތެރޭގައި ހިމެނޭ އެޕާޓީގެ ނާއިބު ރައީސް މުހައްމަދު ޝިފާޒާއި، އެސްޓީއޯގެ އެމްޑީއަކަށް ކުރިން ހުންނެވި ހުސައިން އަމްރު މަގާމުން ވަކިކުރުމުން އެވާހަކައެވެ.
ޝިފާޒު ވަކިކުރުމުން އެމްޑީޕީގެ ރައީސް މުހައްމަދު ނަޝީދު ވަނީ ޝިފާޒަށް ހިތްވަރު ދެއްވައި ޓުވީޓު ކުރައްވައިފައެވެ. އެމަނިކުފާނު ވިދާޅުވެފައިވަނީ އެއްގޮތަކަށް ވެސް ކަންބޮޑުވެވަޑައިނުގަތުމަށާއި ފަހުން ރަނގަޅުވާނޭ ކަމަށެވެ.
